Kazakhstan Security Systems – قاۋىپسىزدىك سالاسىنداعى زاماناۋي ازىرلەمەلەردى, تەحنولوگيالاردى ۇسىناتىن, قاۋىپسىزدىك قۇرالدارىنىڭ ماماندارى مەن تۇتىنۋشىلارىنىڭ, قوعامداستىق پەن مەملەكەتتىك بيلىك وكىلدەرىنىڭ كەڭ اۋديتورياسىن بىرىكتىرەتىن ىسكەرلىك الاڭى.
ءىس-شارا بارىسىندا تەرروريزمگە قارسى ورتالىق شتابتىڭ ءبولىم باسشىسى جاناربەك جاڭاباەۆ 2018-2020 جىلدارى ەل كولەمىندە تەرروريزمدى قارجىلاندىرۋعا قاتىستى 26 فاكتى تىركەلىپ, جولى كەسىلگەنىن مالىمدەدى. ء«بىز قارجىلىق مونيتورينگ اگەنتتىگىمەن تەرروريستىك ارەكەتتەردى قارجىلاندىرۋعا قارسى كۇرەستى بىرلەسىپ جۇرگىزىپ جاتىرمىز. ەلىمىزدە ءدىني دەسترۋكتيۆتى اعىمداردى قارجىلاندىرۋ ماسەلەسى باستى نازاردا. ۇقك, ءىىم, باس پروكۋراتۋرا, قارجىلىق مونيتورينگ اگەنتتىگى جانە قارجى مينيسترلىگى كىرىستەر كوميتەتىنىڭ بۇل جونسىزدىككە قارسى بىرلەسىپ كۇرەسۋ مەحانيزمى ازىرلەندى. ستاتيستيكاعا سۇيەنسەك, 2018-2020 جىلدارى ەل كولەمىندە تەرروريزمدى قارجىلاندىرۋعا قاتىستى 26 فاكتى تىركەلىپ, جولى كەسىلدى. اتالعان فاكتىلەر بويىنشا قىلمىستىق ءىس قوزعالدى. بۇل ورايدا اقپارات جانە قوعامدىق دامۋ مينيسترلىگى دە حالىق اراسىندا ءتۇسىندىرۋ جۇمىستارىن ۇيىمداستىردى. بيىلدىڭ وزىندە ەكسترەميستىك قىلمىسقا بارعان 3 ازاماتتىڭ ۇستىنەن ءىس قوزعالدى», دەدى ج.جاڭاباەۆ.
ودان بولەك «جۋسان» وپەراتسياسىنىڭ ناتيجەسىندە قازاقستاندىق 77 ايەل راديكالدى يدەولوگيادان ءوز ەركىمەن باس تارتقانى ايتىلدى. «سيريادا تەرروريستىك ۇيىمداردىڭ قۇربانى بولىپ, «جۋسان» وپەراتسياسى بارىسىندا قۇتقارىلعان بىرقاتار وتانداسىمىز تۋرالى بىلەسىزدەر. اتالعان وپەراتسيا الدىندا دايىندىق جۇمىستارى جۇرگىزىلدى. «جۋسان» وپەراتسياسى ارقىلى بارلىعى 607 قازاقستاندىق ەلگە ورالدى. ونىڭ ىشىندە 37 ەركەك, 157 ايەل جانە 413 بالا (سونىڭ ىشىندە 34 جەتىم بالا) ەلگە امان-ساۋ جەتكىزىلدى. 59 ادام قىلمىستىق جاۋاپقا تارتىلدى. قازاقستانعا كەلگەن سوڭ وتانداستارىمىزدى بەيبىت ومىرگە بەيىمدەۋ شاراسى وتكىزىلدى. ناتيجەسىندە, 88 ايەل ءداستۇرلى ءدىنىمىزدى قايتا قابىلداپ, 77 ايەل راديكالدى يدەولوگيادان باس تارتتى», دەدى ول.
القالى جيىن اياسىندا قازاقستان رەسپۋبليكاسى تەرروريزمگە قارسى ورتالىعىنىڭ قولداۋىمەن تەرروريستىك تۇرعىدان وسال (تتو) وبەكتىلەردى تەرروريزمنەن قورعاۋ, سونداي-اق لاڭكەستىك قاتەرلەرگە قارسى ءىس-قيمىل شارالارىن جەتىلدىرۋ ماسەلەلەرى بويىنشا رەسپۋبليكالىق كونفەرەنتسيا وتكىزىلدى.
كونفەرەنتسيا ورتالىق مەملەكەتتىك جانە جەرگىلىكتى اتقارۋشى ورگانداردىڭ, ۇلتتىق قاۋىپسىزدىك كوميتەتىنىڭ, عىلىمي-ساراپتامالىق قوعامداستىقتىڭ, بيزنەس ورتانىڭ وكىلدەرىن, سونداي-اق تتو وبەكتىلەردىڭ يەلەرىن, باسشىلارىن جانە وزگە دە بەيىندى قىزمەتكەرلەرىن جينادى. مەملەكەتتىك ورگانداردىڭ ماماندارى مەن ۇلتتىق قاۋىپسىزدىك سالاسىنداعى ساراپشىلار وبەكتىلەردىڭ تەرروريزمگە قارسى قورعالۋىنىڭ قازاقستاندىق جۇيەسىنىڭ اعىمداعى جاي-كۇيى مەن دامۋ پەرسپەكتيۆالارىن تالقىلادى. تەرروريستىك سيپاتتاعى قازىرگى زامانعى قاۋىپ-قاتەرلەرگە قولدانىستاعى, اسىرەسە ادامدار كوپ جينالاتىن وبەكتىلەر مەن ءبىلىم بەرۋ مەكەمەلەرىندەگى قاۋىپسىزدىك جۇيەلەرىنىڭ ماسەلەلەرى جەكە قارالدى.
ىشكى ىستەر مينيسترلىگىنىڭ ساراپشىسى كۇزەت قىزمەتىن ليتسەنزيالاۋ بويىنشا قابىلدانعان زاڭنامالىق باستامالاردى دامىتۋدا تەرروريستىك تۇرعىدان وسال وبەكتىلەردىڭ قاۋىپسىزدىگىن قامتاماسىز ەتۋگە تارتىلاتىن جەكە كۇزەت ۇيىمدارىنا قويىلاتىن تالاپتاردى جاريا ەتتى. تەرروريزمگە قارسى ورتالىق شتابى تۇرعىسىنان وسى جىلى ۇكىمەت قاۋلىلارىمەن بەكىتىلگەن تەرروريستىك تۇرعىدان وسال وبەكتىلەرگە جاتقىزۋدىڭ جاڭا قاعيدالارى مەن ولشەمشارتتارى, سونداي-اق ولاردى قورعاۋدى ۇيىمداستىرۋعا قويىلاتىن تالاپتار ءتۇسىندىرىلدى. وسى الاڭدا تەرروريزمگە قارسى ءىس-شارالاردى جاريالاۋ, ونىڭ ىشىندە تەرروريزمگە قارسى وپەراتسيا وتكىزۋ كەزەڭىندە مەملەكەتتىك ورگاندار مەن باق-تىڭ ءوزارا ءىس-قيمىل دەڭگەيىن ارتتىرۋ ءۇشىن جۋرناليستەرگە ارنالعان «تەرروريستىك قاۋىپ-قاتەرلەرگە اقپاراتتىق دەن قويۋداعى باق-تىڭ ءرولى, سونداي-اق ءدىني ەكسترەميزم مەن تەرروريزمگە قارسى ناسيحات ۇيىمداستىرۋ» تاقىرىبىندا سەمينار-ترەنينگ ۇيىمداستىرىلدى.
