ەسكەرتكىش-ءبيۋستىڭ اشىلۋ راسىمىنە الماتى قالاسىنىڭ اكىمى باقىتجان ساعىنتاەۆ قاتىستى.
«ەلىمىزدىڭ تاريحىندا وشپەستەي ءىز قالدىرعان نۇرتاس ءداندىباي ۇلى كوپتەگەن يگىلىكتى ىستەردىڭ باسى-قاسىندا بولىپ, سوناۋ قيىن زاماندا ۇلت مۇددەسى ءۇشىن باتىل قادامدارعا بارا العان ۇلى تۇلعا. قانداي جوعارى لاۋازىمدى قىزمەتتە جۇرسە دە ەل تاۋەلسىزدىگىن, حالىقتىڭ ءوز بايلىعىن ءوزى يگەرۋ ءىسىن, ۇمىتىلۋعا اينالعان انا ءتىلىمىز بەن سالت-ءداستۇرىمىزدى قايتا ءتىرىلتۋ ماسەلەلەرىن بارىنەن دە جوعارى قويدى. ۇلى وتان سوعىسى مەن ونان كەيىنگى ەڭ اۋىر جىلداردا قازاقستان ۇكىمەتىن باسقاردى. رەسپۋبليكامىزدىڭ الەۋمەتتىك-ەكونوميكالىق دامۋىنا, مادەنيەتى مەن ونەرىنىڭ, عىلىمى مەن ءبىلىمىنىڭ وركەندەۋىنە بارىنشا كۇش سالدى. نۇرتاس وڭداسىنوۆتىڭ ونەگەلى ءومىرى مەن حالقىنا جاساعان قالتقىسىز قىزمەتىن ناسيحاتتاۋ, جاس ۇرپاقتىڭ ساناسىنا ءسىڭىرۋ – ءبىزدىڭ ابىرويلى مىندەتىمىز», دەدى قالا اكىمى قۇتتىقتاۋ سوزىندە.
نۇرتاس وڭداسىنوۆ سوعىس جىلدارى رەسپۋبليكامىزدا عىلىم اكادەمياسىنىڭ دەربەس شاڭىراق كوتەرۋىنە, قازاق مەملەكەتتىك قىزدار پەداگوگيكالىق ينستيتۋتى مەن ۇلتتىق كونسەرۆاتوريانىڭ اشىلۋىنا, شەت تىلدەرى, دەنە تاربيەسى يستيتۋتتارىنىڭ جانە بارلىق وبلىس ورتالىقتارىندا مۇعالىمدەر دايارلايتىن جوعارى وقۋ ورىندارىنىڭ قۇرىلۋىنا بىردەن ءبىر ۇيىتقى بولعان.
سونىمەن قاتار نۇرتاس ءداندىباي ۇلى ەلىمىزدەگى ءىرى قۇرىلىستاردىڭ – ەرتىس-قاراعاندى, ارىس-تۇركىستان, ءمىرزاشول كانالدارىنىڭ, اتىراۋ, تەمىرتاۋ, جەزقازعان, بالقاش, اقتوبە قالالارىنداعى ءىرى زاۋىتتاردىڭ, مويىنتى-شۋ تەمىر جولىنىڭ سالىنۋىنا تىكەلەي باسشىلىق ەتكەن تۇلعا.
