شيرەك فينال جولداماسىنا تالاسقان التى بوكسشىمىزدىڭ جەڭىستى جورىعىن 57 كيلو سالماقتاعى سەرىك تەمىرجانوۆ باستاپ بەرگەنىن بۇعان دەيىن جازعانبىز. ول ءۇندى جىگىتى روحيت موردى ويقاستاپ ءجۇرىپ ەركىن جەڭگەن ەدى. سەرىكتەن كەيىن شارشى الاڭعا شىققان ۇلتتىق قۇرامانىڭ كاپيتانى, 67 كيلو سالماقتاعى ساڭلاعىمىز ابىلايحان ءجۇسىپوۆ تە سەنىمدى تۇردە جەڭىسكە جەتتى. ول پولشالىق داميان دۋركاچتى جارىس جولىنان ىعىستىردى.
75 كيلو سالماقتاعى نۇرقانات رايىس تا تاماشا بوكس كورسەتتى. اۋعانستان ورەنى سۋليمان اسلاميمەن قولعاپ تۇيىستىرگەن ول قارسىلاسىن ەكىنشى راۋندتا ەسەڭگىرەتىپ تە الدى. قورىتىندىسىندا قارسىلاسىنان 5:0 ەسەبىمەن باسىم ءتۇستى. 51 كيلو سالماقتا ەل ءۇمىتىن ارقالاعان ساكەن بيبوسىنوۆتىڭ جۇدىرىقتاسۋ ءستيلى كوز ءسۇيسىنتتى. ءۇندى وعلانى دەپاكتىڭ ەكى اياعىن ءبىر ەتىككە تىققان ول دا شيرەك فينالعا شىقتى. 63,5 كيلو سالماقتا ەل نامىسىن قورعاپ جاتقان ەگىزدىڭ سىڭارى ءساناتالى تولتاەۆ ۋكراينالىق دەنيس پەسوتسكيدى ۇيىنە قايتاردى. 80 كيلو سالماق دارەجەسىندە سىنعا ءتۇسىپ جاتقان نۇربەك ورالباي ۆەنگريالىق پال كوۆاچتى جەڭىپ, جانكۇيەرلەردى جەلپىنتتى. قىسقاسى, الەم چەمپيوناتىنىڭ شيرەك فينالىنا قالعان التى بوكسشىمىز دا جولداما الدى. بۇعان دەيىن ءتورت بوكسشىمىز شيرەك فينالعا شىققان بولاتىن. ولار ەندى ءبىر كەزدەسۋدە جەڭىسكە جەتسە, جۇلدەگەر اتانادى.
