جوبانىڭ سەرىكتەستەرى بولىپ تابىلاتىن ALMAU ساياسات جانە قۇقىق مەكتەبى, استانا حالىقارالىق ۋنيۆەرسيتەتى, «قازاقستاندىق مەدياتسيا ورتالىعى» جم, SmartCharity قوعامدىق قورى, «بەلەس» تالداۋ جانە ستراتەگيا ورتالىعى» قوعامدىق بىرلەستىگى ۇكىمەتتىك ەمەس ۇيىمدار وكىلدەرىن كاسىبي تۇرعىدا وقىتۋ ىسىندە بەلسەندىلەر قاتارىنان تابىلدى. «ۇەۇ اكادەمياسى» جوباسى باستالعاننان بەرى جالپى ءبىلىم بەرۋ كومپونەنتىن يگەرۋ, الەۋمەتتىك كاسىپكەرلىك مەكتەبى جانە ترەنەرلەرگە ارنالعان ترەنينگتەر ءوتتى. وسىلايشا, سەگىز اي ىشىندە ەل وڭىرلەرىندە ورنالاسقان ۇكىمەتتىك ەمەس ۇيىمداردىڭ مىڭنان استام وكىلدەرى ارنايى بىلىكتىلىك ترەنينگتەرىنەن ءوتىپ, سەرتيفيكاتقا يە بولدى.
تۇلەكتەردى ماراپاتتاۋ سالتاناتىندا اقپارات جانە قوعامدىق دامۋ ۆيتسە-ءمينيسترى بولات تىلەپوۆ «ۇەۇ اكادەمياسى» ازاماتتىق قوعامدى دامىتۋداعى ماڭىزدى ءارى ەلىمىزدەگى ۇكىمەتتىك ەمەس ۇيىمدار ءۇشىن اۋقىمدى جوبا ەكەنىن اتاپ ءوتتى. بۇگىندە ءتيىستى مينيسترلىكتىڭ قولداۋىمەن ۇەۇ قوعامداعى ءرولى ارتىپ كەلەدى. ال سالادا ەڭبەك ەتىپ جۇرگەن مامانداردىڭ كاسىبي بىلىكتىلىگى كەلەشەگىمىز ءۇشىن اسا ماڭىزدى.
اكادەميا جۇمىسى اياسىندا زەرتتەۋلەر جاسالىپ, تسيفرلى باعىتتاعى, سونىمەن قاتار ءموبيلدى قوسىمشالار ارقىلى جۇمىس ىستەۋ تاجىريبەسىنە كوپ كوڭىل ءبولىندى. ALMAU رەكتورى گۇلنار كۇرەنكەەۆا ۇكىمەتتىك ەمەس سەكتور ءۇشىن ماڭىزدى جوبانىڭ ازاماتتىق قوعامدى دامىتۋداعى الەۋەتىنە, سونىمەن بىرگە وسى اكادەميا اياسىندا قامتىلعان باعدارلامالاردىڭ ەرەكشەلىگىنە توقتالىپ ءوتتى.
ال جوبانىڭ مىندەتتەرى تۋرالى تانىستىرعان جوبا جەتەكشىسى يرينا ۆيگوۆسكايا ازاماتتىق سەكتورداعى ءبىلىم بەرۋ قىزمەتتەرىنىڭ قاجەتتىلىگىنە زەرتتەۋ جۇرگىزۋ, ۇەۇ وكىلدەرىنە قاشىقتىقتان جانە ءموبيلدى وقىتۋدى ۇيىمداستىرۋ, جاتتىقتىرۋشىلاردى وقىتۋ ماسەلەسىنە دەن قويىپ, وسى باعىتتاعى مىندەتتەردىڭ بارلىعى دەرلىك ورىندالعانىن جەتكىزدى. ونىڭ ايتۋىنشا, جوبا تاياۋ كەلەشەكتە ازاماتتىق سەكتوردىڭ الەۋەتىن ارتتىرۋعا, كاسىپكەرلىك پەن ازاماتتاردىڭ ءوزىن ءوزى ۇيىمداستىرۋ تەتىگىن كۇشەيتۋگە, حالىقتىڭ مەملەكەتتىڭ ەكونوميكالىق ساياساتىنا دەگەن سەنىمىن قالپىنا كەلتىرۋگە, سونداي-اق ۇەۇ-نىڭ قارجىلىق, كادرلىق, ماتەريالدىق جانە ماتەريالدىق ەمەس رەسۋرستارىن باسقارۋ تيىمدىلىگىن ارتتىرۋعا مۇمكىندىك بەرەدى. سونداي-اق ي.ۆيگوۆسكايا قازاقستاندا بەيىمدەلگەن وقىتۋ كۋرسى بار ءموبيلدى قوسىمشا ىسكە قوسىلاتىنىن اتاپ ءوتتى. قازىرگى ۋاقىتتا ول تەستىلەۋ رەجىمىندە جۇمىس ىستەيدى.
ءبىلىم بەرۋ باعدارلامالارىن ىسكە قوسپاس بۇرىن قانداي سالالاردا ءبىلىم مەن تاجىريبە جەتىسپەيتىنىن انىقتاۋعا كومەكتەسەتىن عىلىمي-زەرتتەۋ جۇمىستارىنىڭ دا جۇرگىزىلگەنىن اتاپ وتكەن ءجون. زەرتتەۋ ناتيجەلەرىنە سۇيەنە وتىرىپ, ساراپشىلار وقىتۋ تاقىرىپتارىنىڭ تىزىمدەمەسىن جاسادى. جالپى ءبىلىم بەرۋ كومپونەنتىندە ارقايسىسى 5 ترەنينگتەن تۇراتىن 8 ءبىلىم بەرۋ ءمودۋلى قاراستىرىلعان. وقىتۋ تاقىرىپتارىنىڭ قاتارىنا ماركەتينگ جانە PR, فاندرايزينگ, جوبالاردى باسقارۋ, اقپاراتتىق تەحنولوگيالار, الەۋمەتتىك جوبالاۋ جانە باسقالار كىرەدى. وسى ورايدا 811 ادام ارنايى سەرتيفيكاتقا يە بولدى.
قازاق جانە ورىس تىلدەرىندە ءۇش لەكتە ۇيىمداستىرىلعان «ورەلى ۇرپاق» الەۋمەتتىك كاسىپكەرلىك مەكتەبىندە وقىتۋ جەكە باعىتتا ءوتتى. مۇندا ۇەۇ-نىڭ 167 وكىلى الەۋمەتتىك ماركەتينگ, قارجىلىق ساۋاتتىلىق, ءتيىمدى باسقارۋ جانە تاعى باسقا سالالار بويىنشا زاماناۋي ءبىلىمدى يگەردى.
«بۇگىندە الەۋمەتتىك كاسىپكەرلىك يدەياسى كوپتەگەن الدىڭعى قاتارلى ەلدەردىڭ ساياساتىندا جەتەكشى مانگە يە. الەۋمەتتىك بيزنەس ەلدەگى الەۋمەتتىك ساياساتتىڭ تۇجىرىمداماسى مەن كورىنىسىن وزگەرتۋ قۇرالىنا اينالۋدا, الەۋمەتتىك يكەمدىلىكتى, ينتەگراتسيانى دامىتۋعا, جۇمىسپەن قامتۋدى ۇلعايتىپ, كەدەيلىكتى ازايتۋعا, حالىقتى جانداندىرۋعا, قوعامنىڭ يننوۆاتسيالىق دامۋىنا ىقپال ەتەدى. مۇنداي جوبانى قولداۋ حالىقتى ەكونوميكانى دامىتۋعا, جاڭا جۇمىس ورىندارىن قۇرۋعا, الەۋمەتتىك ناقتى ماسەلەلەردى شەشۋگە تارتۋعا مۇمكىندىك بەرەدى», دەدى ءوز سوزىندە جوبا سەرىكتەسى, «استانا» حالىقارالىق ۋنيۆەرسيتەتىنىڭ پرەزيدەنتى سەرىك ىرساليەۆ.
الەۋمەتتىك كاسىپكەرلىك بويىنشا ۇيلەستىرۋشى زۋبيراش سماعۇلوۆا قازاق جانە ورىس تىلدەرىندە ءۇش لەكتە ۇيىمداستىرىلعان «ورەلى ۇرپاق» الەۋمەتتىك كاسىپكەرلىك مەكتەبىندەگى ءبىلىم بەرۋ بارىسىنا كەڭىنەن توقتالىپ ءوتتى. جوبا اياسىندا «ترەنەرلەرگە ارنالعان ترەنينگ» باعدارلاماسى – بىلىكتى ترەنەرلەردى دايىنداۋعا جانە ولاردىڭ جەكە وقىتۋ كۋرستارىن ازىرلەۋگە باعىتتالدى. باعدارلاما بويىنشا 42 قاتىسۋشى وقىتىلدى. ترەنەرلەر تالىمگەرلەرمەن بىرگە جۇمىس ىستەي وتىرىپ, اۆتورلىق ترەنينگتەرىن وتكىزۋ مۇمكىندىگىنە يە بولدى.
«ۇەۇ اكادەمياسىنىڭ» تۇلەكتەرى جوبا اياسىندا قازاق تىلىندەگى باعدارلاما, وقۋ قۇرالدارىنىڭ جەتكىلىكسىزدىگىنە توقتالىپ, الداعى ۋاقىتتا وسى ماسەلەگە كەڭىنەن نازار اۋدارۋ قاجەتتىگىمەن قاتار, سالادا قاپەرگە الاتىن ماسەلەلەردى اتاپ ءوتتى.
الماتى
