ۇيىم باسشىسىنىڭ ايتۋىنشا, پاندەميانىڭ بەتى قايتپاۋىنا نەگىزىنەن ونىمەن كۇرەس قۇرالدارىنا قولجەتىمدىلىك اركەلكى بولعانى سەبەپشى بولىپ وتىر. بۇل مۇقتاجدىق ءۇشىن ددۇ-عا 23 ملرد دوللاردان استام قاراجات قاجەت.
«بۇگىندە ءبىز COVID-19 ۆيرۋسىمەن كۇرەس جۇرگىزۋدى جوسپارلاۋ ءۇشىن جاڭا بيۋدجەتتى جاريالاپ وتىرمىز. ەلدەرگە ۆيرۋسپەن كۇرەس جۇرگىزۋ جولىندا ۇلكەن ماقساتتارعا قول جەتكىزىپ, قاجەتتى قۇرالدار ۇسىنۋ ءۇشىن الداعى 12 ايدا 23,4 ملرد دوللار قاراجات كەرەك. بۇل باستامانى تولىق قارجىلاندىرۋ – ددۇ ستراتەگياسىنىڭ, دايارلىق جانە ەلەۋ جوسپارىنىڭ, پاندەميانى باقىلاۋعا الۋ بويىنشا ءبارىن قامتيتىن جوسپارىمىزدىڭ ماڭىزدى بولىگى», دەپ اتاپ ءوتتى ت.گەبرەيەسۋس.
كەيىنگى ەكى ايدا قاۋىپتى ينفەكتسياعا شالدىققاندار مەن قايتىس بولعاندار سانى ءبىرشاما ارتقان. ۇيىم باسشىسى تەدروس گەبرەيەسۋستىڭ ايتۋىنشا, ينفەكتسيامەن كۇرەس قۇرالدارى ءالى كۇنگە دەيىن ءادىل بولىنبەي كەلەدى. سونىڭ سالدارىنان ىندەتتى جەڭۋ مۇمكىن بولماي تۇر. بۇگىندە الەمدە 245 ميلليونداي ادام كوۆيد جۇقتىرعان. 5 ميلليونعا جۋىعى قايتىس بولدى.
ۇيىمنىڭ ەۋروپالىق بيۋروسىنىڭ باسشىسى گانس كليۋگە بىلتىرعى شەكتەۋلەردەن ميلليونداعان بالا پسيحيكالىق جانە الەۋمەتتىك تۇرعىدان زيان شەككەنىن ايتادى. ول بيىلعى قىستا وتكەن قاتەلىكتەردى قايتالاماۋىمىز كەرەك دەپ قازىردەن ەسكەرتىپ جاتىر. دۇنيەجۇزىلىك دەنساۋلىق ساقتاۋ ۇيىمى ىندەت قاتتى تارالعاننىڭ وزىندە مەكتەپتەردى جاپقاننىڭ ورنىنا, اراقاشىقتىق ۇستانۋ, قولدى ءجيى جۋ, ماسكا تاعۋ, سىنىپتاردى جەلدەتۋ سياقتى سانيتارلىق تالاپتاردى ساقتاۋ اناعۇرلىم پايدالى دەپ ەسەپتەيدى.
