نۇربەك امانگەلدى ۇلى گاز جەلىسى ۇيىمدارىنىڭ وكىلدەرىنەن جالپى سوماسى 6,3 ملن پارا الدى دەگەن كۇدىككە ءىلىندى. ول 2020 جىلدىڭ 16 قاراشاسىنان باستاپ قاماۋدا بولدى.
«سوت نۇربەك امانگەلدى ۇلىن قىلمىس جاساعانى ءۇشىن كىنالى دەپ تانۋعا جانە مەملەكەتتىك قىزمەتتە, سۋديا, جەرگىلىكتى ءوزىن-ءوزى باسقارۋ ورگاندارىندا, قر ۇلتتىق بانكىندە جانە ونىڭ ۆەدومستۆولارىندا, قارجى نارىعى مەن قارجى ۇيىمدارىن رەتتەۋ, باقىلاۋ جانە قاداعالاۋ جونىندەگى ۋاكىلەتتى ورگاندا, مەملەكەتتىك ۇيىمدار مەن كۆازيمەملەكەتتىك سەكتور سۋبەكتىلەرىندە لاۋازىمداردى اتقارۋ قۇقىعىنان ءومىر بويىنا ايىرا وتىرىپ, قاۋىپسىزدىگى بارىنشا تومەن قىلمىستىق-اتقارۋ جۇيەسى مەكەمەسىندە وتەۋمەن وعان 8 جىل باس بوستاندىعىنان ايىرۋ تۇرىندەگى جازا تاعايىنداۋعا ۇكىم شىعاردى», دەپ وقىپ بەردى سۋديا.
نۇربەك امانگەلدى ۇلى قاماۋعا الۋ تۇرىندەگى بۇلتارتپاۋ شاراسىن ۇكىم زاڭدى كۇشىنە ەنگەنگە دەيىن سول كۇيىندە قالدىردى. باس بوستاندىعىنان ايىرۋ تۇرىندەگى جازانى وتەۋ مەرزىمى ۇكىم زاڭدى كۇشىنە ەنگەن كۇننەن باستاپ ەسەپتەلەدى.
سوت سونداي-اق «SK LTD KZ» جشس گاز جەلىسى ۇيىمىنىڭ ديرەكتورى ب. ب. ۋتاروۆقا ۇكىم شىعاردى.
ول قر قىلمىستىق كودەكسىنىڭ 367-بابىنىڭ 2-بولىگىندە (پارا بەرۋ) كوزدەلگەن قىلمىستى جاساعانى ءۇشىن كىنالى دەپ تانىلىپ, ەڭ تومەنگى قاۋىپسىزدىك قىلمىستىق-اتقارۋ جۇيەسى مەكەمەسىندە وتەۋمەن ءۇش جىلعا دەيىن باس بوستاندىعىنان ايىرۋ جازاسى تاعايىندالدى.
سوت جازا تاعايىنداۋ كەزىندە ەكى سوتتالۋشىعا قاتىستى زاڭدا (قك-ءنىڭ 53-بابى) كوزدەلگەن جەڭىلدەتەتىن ءمان-جايلاردىڭ جوق ەكەنىن ەسكەرگەنى حابارلانادى.
