– انيماتسيا ونەرى ارقىلى وسكەلەڭ ۇرپاقتى تاربيەلەۋ – ۇلتتىق «رۋحاني جاڭعىرۋ» جوباسىنىڭ ماڭىزدى مىندەتتەرىنىڭ ءبىرى. وزدەرىڭىزگە ءمالىم, العاشقى قازاق مۋلتتۋىندىسىنىڭ جارىق كورگەنىنە بيىل 54 جىل تولدى. وسى ۋاقىت ىشىندە ۇلتتىق انيماتسيانىڭ جەتكەن جەتىستىگى دە, كوتەرىلگەن بيىگى دە از ەمەس. ەڭ باستىسى, تالاي تالانتتار ءوسىپ, ۇلتتىق مەكتەپ قالىپتاستى. دەسە دە, زامان كوشى ىلگەرى كەتۋدە. وعان ىلەسۋ ءۇشىن ءبىزدىڭ ەلىمىزدە بارلىق مۇمكىندىك بار. ءبىلىمى مەن بىلىگى مول شىعارماشىل جاستار, ماماندىق ءناسىبىن پايدالى كاسىپكە اينالدىرعان جەكەمەنشىك ستۋديالار, جاڭا يدەيالار مەن تىڭ باستامالار جانە, ەڭ باستىسى, وسى ەڭبەكتى تۇتىنۋعا دايىن ۇلان-عايىر ەل, جاسامپاز اۋديتوريا بار, – دەپ اتاپ ءوتتى ۆيتسە-مينيستر.
بولات تىلەپوۆ ءوز سوزىندە مەملەكەتتىك تاپسىرىستى تياناقتى رەتتەيتىن, ماقساتتى جۇمسايتىن جۇيە جوق ەكەنىن العا تارتتى. ۆيتسە-مينيستر سول سەبەپتى انيماتسيامەن اينالىساتىن شىعارماشىلىق توپتاردى قولداۋدىڭ جاڭا جۇيەسى پايدا بولاتىنىن حابارلادى.
– سوندىقتان دا كەلەسى جىلدان باستاپ, جاڭادان قابىلدانعان ۇلتتىق جوبا اياسىندا «قازاقفيلم» كينوستۋدياسى جانىنان «قازاق انيماتسيا» شىعارماشىلىق بىرلەستىگى ءوز جۇمىسىن باستايتىن بولادى. ونىڭ نەگىزگى مىندەتى – ۇلتتىق انيماتسيا نارىعىندا جۇرگەن شىعارماشىل توپتارعا ءبىر ورتالىقتان قولداۋ بولىپ, وتاندىق ءونىمنىڭ ءورىسىن كەڭەيتۋ ءۇشىن جاعداي جاساۋ. ەكىنشىدەن, انيماتسيا ونەرىن تەك بالالار كونتەنتى رەتىندە ەمەس, كينو مەن جارنامانىڭ, كومپيۋتەرلىك ويىندار مەن ۆەب-كوممۋنيكاتسيا تىلىنە اينالدىرۋ ارقىلى تولىققاندى ۇلتتىق اقپاراتتىق رەسۋرس قالىپتاستىرۋ. ۇشىنشىدەن, ارينە الەمدىك مۋلتيندۋستريا وكىلدەرى مەن ونىڭ ىشىندە بۇگىنگى فەستيۆالگە قاتىسىپ وتىرعان شەتەلدىك ارىپتەستەرمەن دە تىعىز بايلانىس ورناتىپ, قازاق انيماتسياسىن حالىقارالىق دارەجەگە كوتەرۋ, – دەدى ب.تىلەپوۆ.
ەسكە سالساق, 29-30 قازان كۇندەرى تۇركىستاندا قازاقستان, ازەربايجان, باشقۇرتستان (رف), قىرعىزستان, وزبەكستان, تاتارستان (رف), تاجىكستان مەن تۇركيانىڭ بىلىكتى مۋلتيپليكاتورلارىن ءبىر الاڭعا جيعان ÁMEN انيماتسيالىق كينوفەستيۆالى ءوتىپ جاتىر.
