بيىل ءۇشىنشى رەت ۇيىمداستىرىلعان شارانىڭ اشىلۋ سالتاناتىنا اقپارات جانە قوعامدىق دامۋ ۆيتسە-ءمينيسترى بولات تىلەپوۆ, ءماجىلىس دەپۋتاتى, اقىن ماقپال تاجماعامبەتوۆا, ارداگەر رەجيسسەر-مۋلتيپليكاتور تامارا مۇقانوۆا, تۇركىستان وبلىسى اكىمىنىڭ ورىنباسارى ۇلان تاجىباەۆ, «رۋحاني جاڭعىرۋ» قوعامدىق دامۋ ينستيتۋتى باسقارما توراعاسىنىڭ ورىنباسارى امانبەك تولەپبەرگەنوۆ, Nur Otan پارتياسى تۇركىستان وبلىستىق فيليالى توراعاسىنىڭ ءبىرىنشى ورىنباسارى بەيسەن تاجىباەۆ, حالىقارالىق قازاق-تۇرىك ۋنيۆەرسيتەتىنىڭ باسشىلىعى سىندى مەملەكەت جانە قوعام قايراتكەرلەرى قاتىستى. سونىمەن قاتار, بىلىكتى تۇرىك انيماتسيا رەجيسسەرى مۋساب گۇندۇز بەن زاماناۋي كوميكس سۋرەتشىسى مۇستافا احمەت قارا, ونەر تارلانى تانىمال ءجۇسىپ اقشورا جانە ءانشى ۇشقىن جامالبەك تە فەستيۆال تورىنەن كورىندى.
سالتاناتتى جيىندا ءسوز العان قوناقتار قاتىسۋشىلاردى شىن جۇرەكتەن قۇتتىقتاپ, كينوفەستيۆال جۇمىسىنا ساتتىلىك تىلەدى. سونىمەن قاتار, ارداگەر رەجيسسەر تامارا مۇقانوۆا قازاق انيماتسيا ونەرىنىڭ دامۋىنا سىڭىرگەن ەرەن ەڭبەگى مەن ناسيحاتىنا قوسقان زور ۇلەسى ءۇشىن حالىقارالىق ÁMEN انيماتسيالىق فيلمدەر فەستيۆالىنىڭ قۇرمەت ديپلومىمەن ماراپاتتالدى.
وتاندىق جانە باۋىرلاس تۇركى ەلدەردىڭ, اتاپ ايتقاندا ازەربايجان, باشقۇرتستان (رف), قىرعىزستان, وزبەكستان, تاتارستان (رف), تاجىكستان مەن تۇركيانىڭ بىلىكتى مۋلتيپليكاتورلارى ورتالىق ازياداعى ەڭ ءىرى انيماتسيالىق فەستيۆالدىڭ قىزىل كىلەمىمەن ءجۇرىپ ءوتتى.
بيىل بايقاۋعا بارلىعى 57 ءوتىنىم كەلىپ ءتۇستى, ونىڭ 49-ى ىرىكتەۋدەن ءوتىپ, ايگىلى شەتەل انيماتور-مۋلتيپليكاتورلارى مەن وتاندىق بىلىكتى مامانداردىڭ باعاسىن الادى. ولاردىڭ قاتارىندا الەمگە تانىمال سۋرەتشى-انيماتور, «نۋ, پوگودي!», «مۋلان», «كورول لەۆ», «فيكسيكي» سىندى «سويۋزمۋلتفيلم» مەن Disney ستۋديالارىنىڭ 40-تان اسا جوباسىنا قاتىسقان الەكساندر دوروگوۆ, قر مەملەكەتتىك سىيلىعىنىڭ يەگەرى روزا مۇقانوۆا, كينوتانۋشى, كينوسىنشى ءنازيرا مۇقىشەۆا, ۇلتتىق كينونى قولداۋ ورتالىعىنىڭ باس پروديۋسەرى اداي ابەلدينوۆ, انيماتسيا پروديۋسەرى جانە رەجيسسەر مۋساب گۇندۇز, رەجيسسەر-ستسەناريست, قر مادەنيەت قايراتكەرى, رەجيسسەر-مۋلتيپليكاتور باتىرحان داۋرەنبەكوۆ, سونداي اق حالىقارالىق كينوفەستيۆالدەردىڭ جۇلدەگەرى تۇردىبەك مايدان بار.
ايتا كەتەرلىگى, فەستيۆال جۇمىسى ەكى كۇنگە سوزىلادى. ۇيىمداستىرۋشىلاردىڭ ايتۋىنشا, شارا اياسىندا قالا كورەرمەندەرى تۇركى ەلدەرىنىڭ ۇزدىك مۋلتفيلمدەرىن تەگىن تاماشالاپ قانا قويماي, انيماتسيالىق جوبا جاساۋدىڭ قىر-سىرىنا قانىعادى.
