جاريالانعان قۇجاتقا سايكەس, سىبايلاس جەمقورلىققا قارسى قىزمەتتىڭ سۇراۋى بويىنشا ىزدەستىرىلىپ جاتقان تالعات اردان مەن قانات سۇلتانبەكوۆكە قر ءىىم ينتەرپول ارنالارى بويىنشا حالىقارالىق ىزدەستىرۋ جاريالاندى.
«تالعات ارداننىڭ تۇرىك رەسپۋبليكاسىنىڭ اۋماعىندا بولۋى تۋرالى قولدا بار اقپاراتقا بايلانىستى اتالعان قۇزىرەتتى ورگاندارعا ونى مەملەكەتكە بەرۋ تۋرالى سۇراۋ جىبەرىلدى. 15 ساۋىردە تۇركيانىڭ ينتەرپولىنان ستامبۋل قالاسى باكىركەي اۋدانىنىڭ قىلمىستىق سوتى ۇستاپ بەرۋ تۋرالى سۇراۋ سالۋ نەگىزىندە اردان تالعاتتى قاماۋعا الۋ تۋرالى قاۋلى شىعارعانى تۋرالى اقپارات كەلىپ ءتۇستى. قازىرگى ۋاقىتتا ىزدەستىرىلۋشىنى تۇركيا اۋماعىندا انىقتاۋ جانە ۇستاۋ بويىنشا ءىس-شارالار جۇرگىزىلۋدە», دەلىنگەن جاۋاپتا.
سونىمەن قاتار, حابارلامادا قانات سۇلتانبەكوۆتى ىزدەۋ تۋرالى دا ايتىلعان.
«سونداي-اق, سۇلتانبەكوۆتىڭ اقش اۋماعىندا بولۋىنا بايلانىستى اقش ادىلەت مينيسترلىگىنە ونى قازاقستانعا تاپسىرۋ تۋرالى سۇراۋ جىبەرىلدى. ساۋال امەريكالىق تاراپتىڭ قاراۋىندا جاتىر», دەدى عيزات نۇرداۋلەتوۆ.
ەسكە سالا كەتسەك, تەرگەۋ بارىسىندا انىقتالعان زالال سوماسى 5,8 ميلليارد تەڭگەنى قۇرادى.
«تەرگەۋ بارىسىندا ءىس بويىنشا 45 ملن تەڭگە وتەلدى. وتكىزىلگەن ءىس-شارالاردا باعالاۋ قۇنى 3,08 ملرد تەڭگە بولاتىن ق. سۇلتانبەكوۆتىڭ اتىنا تىركەلگەن م ۇلىك انىقتالدى. اتالعان م ۇلىككە تەرگەۋ سوتىنىڭ 22.01.2020 جىلعى قاۋلىسى بويىنشا تىيىم سالىندى. ال ت. ارداندا تىيىم سالىناتىن جانە تاركىلەنەتىن م ۇلىك تابىلعان جوق», دەلىنگەن حابارلامادا.
قارجى مونيتورينگى اگەنتتىگىنىڭ مالىمەتىنشە, اتالعان تۇلعالار مەن ولاردىڭ جاقىندارىنان, ونىڭ ىشىندە باسقا ەلدەردەن قانداي دا ءبىر اكتيۆتەر تابىلعان جوق.
ەسكە سالا كەتسەك, 2021 جىلعى 28 مامىردا نۇر-سۇلتاندا «استانا LRT»-دەگى ۇرلىق تۋرالى ىسكە نۇكتە قويىلدى.
«استانا LRT» كومپانياسىمەن جۇمىس ىستەگەن جەتى ەكس-شەنەۋنىك پەن كومپانيا قىزمەتكەرلەرى 7 جىلدان 10 جىلعا دەيىنگى مەرزىمگە سوتتالدى. ال «استانا LRT» جشس-ءنىڭ بۇرىنعى باسقارما توراعاسى تالعات اردان مەن ەلوردا اكىمىنىڭ بۇرىنعى ورىنباسارىنا حالىقارالىق ىزدەۋ جاريالاندى.
