ونىڭ ايتۋىنشا, كەشە جاستار اراسىندا تۇسىنبەۋشىلىك بولىپ, ونىڭ ارتى تارتىپسىزدىكككە ۇلاسقان.
«تارتىپسىزدىك ەڭ ءبىرىنشى روزىباكيەۆ اتىنداعى مەكتەپتەگى ەكى بالانىڭ اراسىنداعى جانجالدان شىقتى. توبەلەستەن ءبىر بالا جاراقات الىپ, اۋرحاناعا تۇسكەن. بالا امان-ەسەن, بۇگىن كىرىپ, ءحالىن ءبىلىپ شىقتىم. تۇندە وتا جاسالعان, قازىر جاعدايى جاقسى. باسىنان جاراقات الىپتى, دارىگەرلەر گەماتوماسىن الىپ تاستادى. سول توبەلەستەن كەيىن كەشكىسىن جاستار جينالىپ, ۇلتتىق ماسەلەنى كوتەرگەن. قازىر وبلىس اكىمىنىڭ تاپسىرماسىمەن مۇندا شتاب قۇرىلدى. وبلىس اكىمىنىڭ ورىنباسارى, ءىىد-نەن ادامدار كەلدى. قازىر كەشە نە بولعانىن انىقتاپ جاتىر. مەنىڭشە, بۇل جاعدايعا جاستاردىڭ تۇسىنبەۋشىلىگى سەبەپ بولدى. بۇگىن اۋىلدىڭ ازاماتتارىن جيناپ, ولارمەن جۇمىس ىستەپ جاتىرمىز», دەدى اۋدان اكىمى.
مەكتەپتەگى توبەلەستەن كەيىن كەشكىسىن جاستار جينالىپ ۇيعىر حالقى وكىلدەرى تۇراتىن ۇيگە تاس لاقتىرعان. سول كەزدە ۇلكەن ءبىر كىسى جاراقات الىپتى.
سونىمەن قاتار اكىم الەۋمەتتىك جەلىدە تاراعان ورتەنگەن ءۇيدىڭ بۇل وقيعاعا ەش قاتىسى جوق ەكەنىن ايتتى.
«ورتەنگەن ءۇي وسى اۋىلدىكى. جاستار كوشەگە شىققان ساتتە ءۇي ورتەنگەن. ونىڭ بۇل جاعدايعا ەش قاتىسى جوق. ول ءۇيدىڭ تۇرعىندارىن تۋعان-تۋىستارىنا ورنالاستىردىق. الداعى ۋاقىتتا ول ءۇيدىڭ شاتىرىن جابۋعا كومەكتەسەمىز. ءۇيدىڭ يەسى قازاق», دەدى تالعات ومىراليەۆ.
ايتا كەتسەك, كەشە الەۋمەتتىك جەلىدە پانفيلوۆ اۋدانىنداعى جانجال جايلى ۆيدەولار تارادى. وندا مەكتەپتەگى وقۋشىلار اراسىنداعى توبەلەس پەن تۇنگى ۋاقىتتا توپتاسقان ادامداردىڭ بەلگىسىز ۇيگە تاس لاقتىرپ جاتقانى جانە ۇيلەردىڭ ورتەنگەنى بەينەلەنگەن.
