ونەر • 28 قازان، 2021

قىش قۇپياسى

58 رەت كورسەتىلدى

ەلەنا جانە ۆلاديمير گريگوريان­داردىڭ اۆتورلىق قىش شەبەرحاناسى ساز سيقىرىنان ساۋلە تاپقان تۋىندىگەرلەر توپتاسقان رۋحاني بىرلەستىك. ءا.قاستەەۆ اتىنداعى ونەر مۋزەيىنىڭ ورتالىق كور­مە زالىندا اتالعان ۇجىم شاكىرت­تە­رىنىڭ «ساز ۇندەستىگى» اتتى كور­مە­سى اشىلدى.

ساز بالشىق – وركەنيەت پايدا بولعالى ادامزاتپەن بىرگە جاساپ كەلە جاتقان، مىڭداعان جىلدىق تاريحى بار تابيعي ماتەريال. «شامشىراق»، «توستاعاندار»، «ۋاقىت بەدەرلەرى» اتتى نەگىزگى ءۇش تاقىرىپتىق ينستاللياتسيادان قۇرالعان ونەر جارمەڭكەسىنە 16 شەبەردىڭ قولتاڭباسى قويىلعان. توپىراقتىڭ ءتىلىن بىلگەن قىششىلار تابيعاتتان، تاريحتان جانە جەتىستىكتەر كوزىنەن شابىت الادى. ولار جاساعان جۇمىستار كۇندەلىكتى ومىردە كەزدەسەتىن زاتتاردىڭ رۋحاني، كوركەمدىك جانە تاكتيلدى الەۋەتىن اشىپ، شەبەر قولىنىڭ جىلۋىمەن شۇرايلانا تۇسكەن.

ەجەلگى ۋاقىتتا ادامدار قۇمىرا­شىلاردىڭ سيقىرلى كۇشى بار دەپ سەندى. قىشتان جاسالعان تۋىندىلاردى قالىپتاۋ پروتسەسىنە ادامنان باسقا ءتورت ەلەمەنت قاتىسادى. بۇلار: جەر، سۋ، اۋا، وت. جەر – بۇل سازدىڭ ءوزى، سۋ – ونى سۇيىلتۋعا قىزمەت ەتسە، اۋا – مۇسىن­دەل­گەن پىشىندەردى كەپتىرەدى، ال وت ولار­دى كۇيدىرىپ، بۇيىمعا سوڭعى بەينە بەرەدى. ەڭ باستىسى بۇلاردىڭ بارلىعى شەبەرگە باعىنادى.

ەكسپوزيتسياداعى ايشا يۋسۋپوۆا، الينا درۋزيك، انەل قۇلاحمەتوۆا، ارينا ۆان ەنگەلەن، ەلەنا مازۋر، يري­نا ارويان، ەلزا كيم، يرينا شلى­گينا، قالامقاس بەكتۇرعانوۆا، كارينا دميتريەۆا، لاريسا اريۋتكينا، ليليا گوبەكلىوعلى، ناتاليا پوكيدوۆا، نيكە سكي­دانوۆا، تاتيانا گروحوتوۆا، يۋليا لەنگارد سىندى قىش قۇپياسىن مەڭ­گەرگەن شەبەرلەردىڭ قولتاڭباسى ءبىر-بىرىنە مۇلدە ۇقسامايدى. اۆتورلار ءوزى قا­لىپتاعان تاقىرىبىن وزدەرىنشە سەزىنىپ، وزدەرىنشە تۇيسىنەدى.

– كورمە كوللەكتسيالىق ديزاين وبەك­تىلەرى مارتەبەسىنە زاڭدى تۇردە وتكەن قازىرگى الەمدەگى قىش بۇيىمدارىنىڭ كەسكىندى، ۇيلەسىمدى «دىبىستالۋىن» كور­سەتەدى. تەحنولوگيانىڭ ورىستەۋى جاڭا ەكسپرەسسيۆتى قۇرالدار – كۇردەلى اشەكەي­لەر مەن انگوبالاردى تابۋعا، كۇيدىرۋ ­ساپاسىن ارتتىرۋعا، ەلەكترلى كوزە ۇرشى­عىن جاسايتىن جاڭا بەينەلەۋ قۇرالدا­­رىن پايدالانۋعا مۇمكىندىك بەرەدى. دەگەن­مەن بۇكىل ارتىقشىلىقتاردى قول­دانسا دا، ساز بالشىقپەن جۇمىس ىس­تەۋ ادىستەرى وزگەرىسسىز قالا بەرەدى، ال ادام قولى – ­قىش جاساۋدىڭ نەگىزگى قۇرالى. «ساز ۇندەس­تىگى» كورمەسى – شىعارماشىلىققا بەت ا­ل­عان، قىشتى سۇيەتىن جانە وقىپ-ۇيرەنۋگە تاباندىلىق تانى­تاتىندار ءۇشىن تاماشا مۇمكىندىك، – دەيدى كورمە جەتەكشىسى ۆيولەتتا ۆولوگودسكايا.

ەلەنا جانە ۆلاديمير گريگوريان­داردىڭ شەبەرحاناسى – كاسىبي قىش سۋرەت­شىلەرى مەن مۇسىنشىلەرىن پلاس­تيكالىق شە­­بەرلىككە ۇيرەتەتىن قازاقستانداعى العاش­قى اۆتورلىق قىش گالەرەياسى. ول 2012 جىلى وتاندىق سۋرەتشىلەردىڭ باس­تاما­سىمەن قۇرىلدى. مۇندا كاسىبي شەبەر­لىككە ماشىقتانعان ونەر يەلەرى الەمدىك دەڭگەيدەگى كورمەلەرگە قاتىسىپ، باي­قاۋ­لاردا جوعارى ماراپاتتارعا يە بولىپ ءجۇر.

1

2

 

الماتى

 

سوڭعى جاڭالىقتار

ۇقساس جاڭالىقتار