ءبىلىم • 26 قازان، 2021

مەكتەپ كىتاپحانالارى 2،5 ملن-داي كوركەم ادەبيەتپەن قامتاماسىز ەتىلدى

58 رەت كورسەتىلدى

«وقۋعا قۇشتار مەكتەپ» جوباسى اياسىندا مەكتەپ كىتاپحانالارىنا 2،5 ميلليونعا جۋىق كوركەم ادەبيەت ساتىپ الىندى. بۇل تۋرالى بۇگىن اپپاراتتىق كەڭەستە رەسپۋبليكالىق عىلىمي-پراكتيكالىق ءبىلىم بەرۋ مازمۇنىن ساراپتاۋ ورتالىعىنىڭ ديرەكتورى ەلدوس نۇرلانوۆ ءمالىم ەتتى، دەپ جازادى Egemen.kz.

كىتاپتاردىڭ باسىم بولىگى شىعىس قازاقستان، جامبىل جانە پاۆلودار وبلىستارىندا ساتىپ الىندى. ەلدوس نۇرلانوۆتىڭ ايتۋىنشا، كىتاپحانا قورىنىڭ باسىم بولىگى مەملەكەتتىك تىلدەگى ادەبيەتتەرمەن تولىقتىرىلعان.

«وتكەن جىلمەن سالىستىرعاندا نەگىزگى قور 2،5 ميلليون كىتاپقا ارتتى. ناتيجەسىندە جاس وقىرمانداردىڭ سانى ايتارلىقتاي ءوستى. جوبانى ىسكە اسىرۋ كەزەڭىندە مەكتەپ وقۋشىلارىنىڭ كىتاپحاناعا دەگەن قىزىعۋشىلىعى ارتا ءتۇستى. وسى وقۋ جىلىنىڭ باسىنان باستاپ تۇركىستان، پاۆلودار، سولتۇستىك قازاقستان جانە قوستاناي وبلىستارىندا ءبىر وقۋشى كىتاپحاناعا ورتا ەسەپپەن 10 رەتتەن استام، ال الماتى، شىمكەنت قالالارىندا، قىزىلوردا، ماڭعىستاۋ، اتىراۋ جانە باسقا دا وبلىستاردا 6-9 رەت بارعان. بۇل بالالاردىڭ كوركەم ادەبيەتكە كوبىرەك قىزىعۋشىلىق تانىتا باستاعانىن كورسەتەدى»، دەدى رەسپۋبليكالىق عىلىمي-پراكتيكالىق ءبىلىم بەرۋ مازمۇنىن ساراپتاۋ ورتالىعىنىڭ ديرەكتورى ەلدوس نۇرلانوۆ.

«وقۋعا قۇشتار مەكتەپ» جوباسى جۇزەگە اسىرىلا باستاعاننان بەرى مەكتەپ كىتاپحانالارى مەن ونداعى ورىندار سانى دا كوبەيدى. مەكتەپتەردە بالالاردىڭ كىتاپ وقۋى ءۇشىن قولايلى جاعدايلار جاسالىپ جاتىر. وسى ماقساتتا جالپى رەسپۋبليكا بويىنشا 121 كوۆوركينگ-ورتالىعى اشىلدى.

بالالاردىڭ وقۋعا دەگەن قىزىعۋشىلىعىن ارتتىرۋ ءۇشىن 3،7 مىڭنان استام ءىس-شارا ۇيىمداستىرىلدى. ءبىلىم جانە عىلىم ءمينيسترى اسحات ايماعامبەتوۆ «وقۋعا قۇشتار مەكتەپ» جوباسىن جۇزەگە اسىرۋدىڭ ماڭىزدىلىعىن اتاپ ءوتىپ، وقۋشىلاردىڭ وقۋعا دەگەن قىزىعۋشىلىعىن ارتتىرۋ بويىنشا كەشەندى جۇمىستى جالعاستىرۋدى تاپسىردى.

«وقۋعا قۇشتار مەكتەپ» جوباسى مەملەكەت باسشىسىنىڭ تاپسىرماسى بويىنشا جۇزەگە اسىرىلۋدا. ءبىز قويىلعان مىندەتتى ورىنداپ جاتىرمىز، قازىردىڭ وزىندە وڭ ناتيجە بار دەپ ايتۋعا بولادى. جوبا ىسكە اسىرىلعاننان باستاپ مەكتەپ كىتاپحانالارىندا كوركەم ادەبيەت سانى ايتارلىقتاي ءوستى، ونىڭ ىشىندە مەملەكەتتىك تىلدەگى ادەبيەتتەر. ەگەر بۇعان دەيىن قازاق تىلىندەگى ادەبيەتتەر از بولسا، قازىر كىتاپ قورىنىڭ باسىم بولىگىن مەملەكەتتىك تىلدەگى ادەبيەتتەر تولىقتىردى. سونىمەن قاتار تەك قازاقستاندىق اۆتورلاردىڭ عانا ەمەس، الەمدىك ادەبيەت تۋىندىلارى دا بار. «وقۋعا قۇشتار مەكتەپ» – وتە ماڭىزدى جوبا، سوندىقتان بۇل جۇمىستى جالعاستىرۋ قاجەت»، دەپ اتاپ ءوتتى اسحات ايماعامبەتوۆ.

سوڭعى جاڭالىقتار

مەركەل قىزمەتىنەن كەتتى

ساياسات • بۇگىن، 17:30

ساراپشى گولوۆكيندى قاتتى سىناپ تاستادى

كاسىپقوي بوكس • بۇگىن، 16:15

ۇقساس جاڭالىقتار