قوعام • 26 قازان، 2021

17 ميلليوننان اسا ادام حالىق ساناعىنا قاتىستى

60 رەت كورسەتىلدى

قازاقستاندىقتاردىڭ 91،6% نەمەسە 17 428 058 ادام جالپىۇلتتىق حالىق ساناعىنا قاتىستى. ازاماتتاردىڭ 40،4%-ءى ساناقتان ونلاين، 51،2%-ءى وفلاين ءوتتى. بۇل تۋرالى ۇلتتىق ستاتيستيكا بيۋروسىنىڭ باسشىسى نۇربولات ايداپكەلوۆ مالىمدەدى، دەپ حابارلايدى Egemen.kz.

«ساناقتان وتكەندەر سانى بويىنشا الماتى قالاسى كوش باستاپ تۇر. مۇندا ساناققا قاتىسقاندار قاتارى بۇعان دەيىن تىركەلگەن حالىق سانىنا شاققاندا 107،5% قۇراعان. ياعني، قولدا بار مالىمەت بويىنشا الماتى تۇرعىندارىنىڭ سانى 2005496 دەپ كورسەتىلگەن. ال ساناق ساۋالدارىنا 2154907 ادام جاۋاپ بەرگەن. دەمەك، حالىق ساناعى قازىردىڭ وزىندە مەگاپوليس حالقىنىڭ ناقتى سانىن كورسەتۋگە كومەكتەسەتىنىن سەنىممەن ايتا الامىز»، دەدى بيۋرو باسشىسى.

ەكىنشى ورىندا - تۇركىستان وبلىسى، وندا حالىق ساناعىنا 98،6% نەمەسە 2032333 ادام قاتىستى. ءۇشىنشى ورىندا جامبىل وبلىسى، مۇنداعى ساناقتان وتكەندەر سانى حالىقتىڭ 98،6%-ءىن نەمەسە 1129863 ادامدى قامتيدى.

ءبىر ايتا كەتەرلىگى، ساناققا ونلاين قاتىسۋدا شىعىس قازاقستان وبلىسىنىڭ تۇرعىندارى بەلسەندىلىك تانىتتى مۇندا ساناقتىڭ 57،7% جاڭا فورماتتا ءوتتى. ەكىنشى ورىندا 52،9% كورسەتكىشپەن قىزىلوردا وبلىسى تۇر. كوشباسشىلار ۇشتىگىن جامبىل وبلىسى تۇيىندەيدى، وندا تۇرعىنداردىڭ 47،2% حالىق ساناعىنا ونلاين قاتىستى.

ءداستۇرلى فورماتتاعى ساناققا قاتىسۋدىڭ ەڭ جوعارى كورسەتكىشى الماتىدا تىركەلگەن – تۇرعىنداردىڭ 76،1%-ءى پاتەرلەردى ارالاۋ كەزىندە ساناقتان وتكەن. ەكىنشى ورىندا – 69،6% كورسەتكىشپەن شىمكەنت، ال ءۇشىنشى ورىندا – الماتى وبلىسى، وندا تۇرعىنداردىڭ 60%-ءى حالىق ساناعىنا قاتىسۋدىڭ ءداستۇرلى فورماتىن تاڭداعان.

«وسى الماتى وبلىسىنداعى كەربۇلاق اۋدانىندا ساۋالناما مارەسىنە جەتكەن. حالىق ساناعى اياسىندا مالىمەتتەر جيناۋ جۇمىسى شىعىس قازاقستان وبلىسىنىڭ اباي اۋدانىندا اياقتالدى. ال پاۆلودار وبلىسىن 8 بىردەي اۋدانى (اقتوعاي، جەلەزين، ەرتىس، تەرەڭكول، اققۋلى، ماي، ۋسپەن، شارباقتى) ساناق اياسىندا ساۋالناما جۇرگىزۋ شارالارىن ءبىتىردى»، دەدى نۇربولات ايداپكەلوۆ.

2021 جىلعى ۇلتتىق ساناقتىڭ نەگىزگى كەزەڭى قازاقستاندا 1 قىركۇيەكتەن 30 قازانعا دەيىن ءوتىپ جاتىر. قاراشانىڭ 8-نە دەيىن ساناق وتكىزۋ ادىستەمەسىنە سايكەس، ناقتىلاۋ شارالارى قاراستىرىلعان.

سوڭعى جاڭالىقتار

ۇقساس جاڭالىقتار