ايماقتار • 26 قازان، 2021

27 مىڭنان استام جاڭا جۇمىس ورنى اشىلادى

35 رەت كورسەتىلدى

جامبىل وبلىسىنىڭ اكىمدىگىندە وبلىستىق ءماسليحاتتىڭ كەزەكتەن تىس ح سەسسياسى ءوتىپ، وبلىس اكىمى بەردىبەك ساپارباەۆ توعىز ايدىڭ قورىتىندىسى بويىنشا دەپۋتاتتار الدىندا ەسەپ بەردى. جيىندى وبلىستىق ءماسليحاتتىڭ حاتشىسى ماحمەتعالي سارىبەكوۆ جۇرگىزدى.

ب.ساپارباەۆ ەكونوميكانىڭ بارلىق سا­لاسىندا وڭ ديناميكا ساقتالىپ وتىر­عانىن، ەسەپتى كەزەڭدە وڭىردەگى ەكو­­نوميكالىق ءوسىم 4،6 پايىزدى قۇ­را­­عانىن اتاپ ءوتتى. اتاپ ايتساق، جىل باسىنان بەرى 480،6 مىڭ شارشى مەتر تۇرعىن ءۇي پايدالانۋعا بەرىلىپ، 11 پايىزعا وسسە، 267 ملرد تەڭگە ينۆەستيتسيا تارتىلىپ، 11 پايىزعا ۇلعايعان.

 «2025 جىلعا دەيىن 2،5 ترلن تەڭگەنى قۇرايتىن 107 ينۆەستيتسيالىق جوبا ىسكە اسىرىلادى. بيىل 171 ملرد تەڭگەگە 31 جوبا جوسپارلانىپ، جالپى 78،2 ملرد تەڭگەنىڭ 13 جوباسى ىسكە استى. «قاراپايىم زاتتار ەكونوميكاسى» اياسىندا 175 جوبا 560 ملن تەڭگەگە نەسيەلەندىرىلدى. جەرگىلىكتى قامتۋ ۇلەسى ونەركاسىپتىڭ 8 باعىتى بويىنشا 51،1 پايىزدى، قۇرىلىس-مونتاج جۇمىستارى بويىنشا 86،4 پايىزدى قۇرادى»، دەدى ب.ساپارباەۆ.

سونىمەن قاتار وبلىس اكىمى فارماتسەۆتيكا سالاسىنداعى ءونىم كولەمى 2،8 ەسەگە وسكەنىن، بيولو­گي­يالىق قاۋىپسىزدىك پروبلەمالارى عىلىمي-زەرتتەۋ ينس­­تيتۋتى جا­نىن­داعى ۆاكتسينالار شى­عاراتىن بيو­فارماتسەۆتيكالىق زاۋىت­تىڭ قۇرى­لى­سى اياقتالعانىن، 1 ملن 750 مىڭ دوزا ۆاكتسينا «سك-فارماتسيا» حابىنا جىبەرىلىپ، ەلىمىزدىڭ بارلىق وڭىرىنە جەتكىزىلگەنىن ايتىپ ءوتتى. ودان بولەك، قىرعىزستان مەملەكەتىنە دە 25 مىڭ دوزا گۋمانيتارلىق كومەك جىبەرىلگەن.

سونداي-اق ب.ساپارباەۆ كاسىپ­كەر­لەرگە شاعىن نەسيە بەرۋ ءۇشىن جالپى 8،1 ملرد تەڭگە قارالىپ، ونىڭ 7،9 ­ملرد تەڭگەسى يگەرىلگەنىن دە ايتتى. «اۋىل شارۋاشىلىعى سالاسىن دامىتۋعا 19،4 ملرد تەڭگە سۋبسيديا قارالىپ، 13،7 ملرد تەڭگەسى يگەرىلدى. 2025 جىلعا دەيىن 350،4 ملرد تەڭگەگە 50 ينۆەستيتسيالىق جوبانى ىسكە اسىرۋ جوسپارلانىپ وتىر. ەگىستىك كولەمى 752 مىڭ گەكتارعا جەتىپ، وتكەن جىلمەن سالىستىرعاندا 30،3 مىڭ گەكتارعا ارتتى. سوڭعى ءۇش جىلدا 59،1 مىڭ گەكتار سۋارمالى جەر قالپىنا كەلتىرىلىپ، سۋ ۇنەمدەۋ تەحنولوگياسى 40 مىڭ گەكتارعا ەنگىزىلدى. مال ازىعىن دايىنداۋ جۇمىستارى دا قىزۋ ءجۇرىپ جاتىر. جوسپارداعى 1،7 ملن توننا مال ازىعى تولىقتاي دايىندالدى»، دەدى وبلىس اكىمى.

 جيىندا جامبىل وڭىرىندەگى اتقارىلىپ جاتقان وزگە دە شارۋالار تۋرالى ايتىلدى. ماسەلەن، بۇگىندە ايماقتاعى «تاسوتكەل» سۋ قويماسى قالپىنا كەلتىرىلۋدە. سول سياقتى، قوسىمشا تاعى دا 7 سۋ قويماسى قالپىنا كەلتىرىلەدى. ەسەپتى كەزەڭدە 363 توننا بالىق اۋلانسا، ونىڭ ىشىندە 200 توننا فورەل بالىعى بار. سونداي-اق 332،8 توننا بال وندىرىلگەن. مەملەكەت باسشىسىنىڭ تاپسىرماسىنا سايكەس، وبلىس اكىمى «القاپتان سورەگە دەيىن» جوباسىنىڭ اياسىندا وبلىس ورتالىعى مەن ون اۋداندا بارلىعى 32 الەۋمەتتىك پاۆيلون اشىلعانىن دا جەتكىزدى.

«وبلىستا 4 482 پاتەرلى 76 تۇرعىن ءۇي قۇرىلىسى جۇرگىزىلۋدە. جىل سو­ڭىنا دەيىن 2 902 پاتەرلى 50 ءۇي تاپ­سى­رىلادى. مەملەكەتتىك باعدار­لا­مالار اياسىندا 3،6 شاقىرىم جول سالىنىپ، 440،7 شاقىرىم جولعا ورتا جوندەۋ جۇمىستارى جۇرگىزىلىپ جاتىر. ناتيجەسىندە، قاناعات­تا­نار­لىق جاعدايداعى جەرگىلىكتى اۆتو­جول­داردىڭ ۇلەسى 95 پايىزعا جەتەدى. 12 اۋىلدىق ەلدى مەكەنگە سۋ قۇبىرى جۇرگىزىلىپ، قامتىلۋ دەڭگەيى 88،7 پايىزعا دەيىن ارتادى. 20 ەلدى مەكەن تابيعي گازبەن قامتىلىپ، 83،8 پا­يىزعا جەتەدى. بارلىق مەملەكەتتىك باعدارلامالار مەن جەكە باس­تامالار اياسىندا 27،1 مىڭ جاڭا جۇمىس ورنى اشىلدى»، دەدى ب.ساپارباەۆ. ونىڭ 14،8 مىڭى تۇراقتى جۇمىس ورنى بولسا، بيىلعى 8 ايدا وبلىستاعى ورتاشا جالاقى 25،8 پايىزعا، ياعني 203،8 مىڭ تەڭگەگە ارتقان. جىل باسىنان بەرى جاڭا 5 مەملەكەتتىك مەكتەپ پايدالانۋعا بەرىلسە، جىل سو­ڭىنا دەيىن تاعى 3 ءبىلىم وشاعىنىڭ قۇ­رى­لىسى اياقتالادى. ودان بولەك، جەكە ينۆەستيتسيا ەسەبىنەن 12 جەكە مەكتەپ سالىنىپ، 3-6 جاس ارالىعىنداعى بالالار تولىعىمەن مەكتەپكە دەيىنگى ۇيىمدارمەن قامتىلعان. وڭىردەگى 43 700 پەداگوگتىڭ جالاقىسى 25 پايىزعا وسكەن. وسى ورايدا، وبلىس اكىمى تاراز قالاسىندا العاش رەت «وقۋشىلار سارايىنىڭ» قۇرىلىسى جۇرگىزىلىپ جاتقانىن دا ايتتى.

«بالالاردىڭ قاۋىپسىزدىگىن قام­تاماسىز ەتۋ ماقساتىندا بارلىق 443 مەكتەپ بەينەباقىلاۋ كامەرالارىمەن تولىق قامتاماسىز ەتىلدى. 370 مەكتەپكە دابىل تۇيمەسى، 85 مەكتەپكە تۋرنيكەت ورناتىلادى. تاراز قالاسىنداعى 60 مەكتەپ جەدەل باسقارۋ ورتالىعىنا قوسىلدى. ءوڭىردى دارى­گەر­لەرمەن قامتاماسىز ەتۋ ءۇشىن س.اسفەندياروۆ اتىنداعى قازاق ۇلت­تىق مەدي­تسي­نالىق ۋنيۆەرسيتەتىنىڭ في­ليا­لى اشىلدى. Primary Health Care ۇلتتىق قاۋىمداستىعىمەن جاسالعان ىنتىماقتاستىق تۋرالى مە­موراندۋم اياسىندا ءتورت ۇزدىك تاجىريبە ورتالىعى قۇرىلدى. 10 دەنە شىنىقتىرۋ- ساۋىقتىرۋ كەشەنىنىڭ قۇرىلىسى جوس­پارلانىپ، بۇگىندە ەكەۋى پايدالانۋعا بەرىلدى. جىل سو­ڭى­نا دەيىن تاعى تورتەۋى اشىلادى. دەمەۋشىلەر ەسەبىنەن 1،5 ملرد تەڭگەگە تاراز قالاسىندا گيمناس­تي­كا جانە ۇستەل تەننيسى سپورت كەشەنى، 1،1 ملرد تەڭگەگە «اناعا تاعزىم» ورتا­لىعى سالىندى»، دەدى وبلىس اكىمى.

 جامبىل وبلىسىندا بيۋدجەتتەن تىس قارجىعا جوبالاردى جۇزەگە اسىرۋ يگى ۇردىسكە اينالعان. «جومارت تۇلەك» جوباسى شەڭبەرىندە تابىستى تۇلەكتەردىڭ دەمەۋشىلىگىمەن 2،8 ملرد تەڭگەگە 73 ەلدى مەكەندە جوبالار جۇزەگە اسۋدا. «اسارلاتىپ ءۇي سالۋ» جوباسى اياسىندا بىلتىر 103 مۇقتاج وتباسى اۋىلداستارىنىڭ كومەگىمەن باسپانالى بولسا، بيىل تاعى 138 ءۇيدىڭ قۇرىلىسى باستالىپ، بۇگىندە 38 ءۇي پايدالانۋعا بەرىلگەن. ال «تارازعا تارتۋ» جوباسى اياسىندا وبلىس ورتالىعىنداعى 42 نىساندا اباتتاندىرۋ جۇمىستارى قولعا الىنىپ، قازىرگى تاڭدا ونىڭ 37-ءسى اياقتالعان. سونىمەن قاتار بۇگىندە ARAI ەمحاناسى جۇمىسىن باستادى. جالپى ايتقاندا، دەمەۋشىلەر تاراپىنان 12،7 ملرد تەڭگەگە 10 الەۋمەتتىك نىسان بوي كوتەرگەن. كەزدەسۋدە ب.ساپارباەۆ جۋىردا تاراز قالاسىندا وتكەن «قازىرگى كەزەڭدەگى ەتنوسارالىق كەلىسىم: تاجىري­بە مەن الداعى مىندەتتەر» اتتى حا­لىق­ارالىق كونفەرەنتسياسىنىڭ جو­عا­رى دەڭ­گەي­دە ۇيىمداستىرىلعانىن اتاپ ءوتتى. رەسەي، ۋكراينا، يزرايل، بولگاريا ەلدەرىنەن كەلگەن بەلگىلى ساراپشىلار تاراز قالاسىن وركەنيەت وشاعى رەتىندە باعالاپ، ونىڭ تاريحي تاعىلىمىنا ايرىقشا نازار اۋدار­عا­نى، قاتىسۋشىلاردىڭ مەملەكەت باس­شى­سىنىڭ تاپسىرماسىمەن وبلىستا جۇزەگە اسىپ جاتقان «بەيبىتشىلىك پەن كەلىسىم» جوباسىن تاجىريبە رەتىندە تاراتۋدى ۇسىنعانى ايتىلدى. جيىن سوڭىندا ەرقانات مانجۋوۆ، ەربولات ساۋرىقوۆ، ساۋلە رىسباەۆا سياقتى بىرقاتار ءماس­ليحات دەپۋتاتتارى وبلىس اكىمىنە سۇراقتار قويىپ، ءتيىستى جاۋاپ الدى. جالپى، ءماسليحات دەپۋتاتتارى وبلىس اكىمىنىڭ ەسەبىن ءبىراۋىزدان ماقۇلداپ، وڭ باعا بەردى.

 

جامبىل وبلىسى

سوڭعى جاڭالىقتار

ۇقساس جاڭالىقتار