قوعام • 25 قازان، 2021

مەملەكەتتىك قىزمەت كورسەتۋ ساپاسىن جاقسارتۋ قادامدارى

78 رەت كورسەتىلدى

ماجىلىستە «ۇكىمەت ساعاتى» ءوتىپ، وندا مەملەكەتتىك قىزمەت كورسەتۋ پروتسەستەرىن جاقسارتۋ ماسەلەسى تالقىلاندى. جيىن بارىسىندا تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات ءمۋسيننىڭ بايانداماسى تىڭدالدى.

ۆەدومستۆو باسشىسى وسى باعىتتا اتقا­رىلىپ جاتقان جۇمىستار تۋرالى ايتىپ بەردى. مينيستر قازىرگى تاڭدا مەملەكەتتىك قىزمەتتەردىڭ 90 پايىزى، ياعني 690 مەملەكەتتىك قىزمەتتىڭ 624-ءى ەلەكتروندى فورماتتا كورسەتىلەتىنىن اتاپ ءوتتى. «بۇل تۇرعىدا ەلەكتروندى قىزمەتتەردىڭ ساپاسىنا ءمان بەرىلىپ وتىر. ياعني تۇرعىندار بۇل قىزمەتتەردى ەلەكتروندى تۇردە الماي، نەگە حالىققا قىزمەت كورسەتۋ ورتالىقتارىنا جۇگىنەدى؟ وسى ماسەلەلەردىڭ بارلىعىن زەرتتەپ، ەلەكتروندى ونلاين قىزمەتتەردىڭ ساپاسىن كوتەرۋگە ەكپىن قويىپ وتىرمىز. مەملەكەتتىك قىزمەتتەردى الۋدىڭ بىرنەشە ءتاسىلى بار. ولار: eGov، حقو، مينيسترلىكتەر مەن اكىمدىكتەردىڭ قىز­مەتتەرى ارقىلى. سونىمەن قاتار مەملە­كەت­تىك قىزمەتتى الۋدىڭ ىڭعايلى تاسىلدەرىن ۇلعايتۋ بويىنشا جۇمىس جۇرگىزىلىپ جاتىر. مىسالى، بانكتەردىڭ قوسىمشاسى ارقىلى اۆتوكولىكتەردى تىركەۋ جۇزەگە اسىرىلادى. سول سەكىلدى باسقا دا قوسىمشالاردا مەم­لەكەتتىك قىزمەتتەر كورسەتىلەدى»، دەدى ب.مۋ­سين.

ۆەدومستۆو باسشىسى كەلتىرگەن دەرەكتەرگە سۇيەنسەك، قازاقستان بۇۇ-نىڭ ەلەك­ترون­دى ۇكىمەتتى دامىتۋ يندەكسى بو­يىنشا 29-ورىندا تۇر. وسى يندەكستىڭ ون­لاين قىزمەتتەردىڭ دامۋ دەڭگەيى جونى­نەن 11-ساتىعا ورنالاسقان. «جۇرگىزىلىپ جاتقان جۇمىستاردى ەسكەرىپ، رەيتينگىمىز ارتادى دەپ ەسەپتەيمىز. مەملەكەتتىك قىزمەت كورسەتۋ ساپاسى دا باسىم باعىت­تاردىڭ ءبىرى. ادىستەمەگە سايكەس، ەلەكتروندى قىزمەتتەردى باعالاۋ مىنانداي كورسەتكىشتەر بويىنشا جۇرگىزىلمەك. اۆتو­ماتتاندىرۋدىڭ تيىمدىلىگى، كورسەتىلگەن قىزمەتتەر كولەمى، مەملەكەتتىك قىز­مەت كورسەتۋ كەزىندە پايدالانىلاتىن اقپاراتتىق جۇيەنىڭ ىستەن شىعۋى. مينيسترلىك مەملەكەتتىك قىزمەت كورسەتۋ ساپاسىن جاقسارتۋ ماقساتىندا بىرقاتار جۇمىس اتقاردى. قىزمەت كورسەتۋ مەرزىمىن بەرۋ مونيتورينگى، Egov پورتالىندا قىزمەت الۋ ساپاسىن باعالاۋى، حقو-دا قىزمەت كورسەتۋ ساپاسىن باعالاۋى ەسكەرىلەدى. احۋالدىق ورتالىق ارقىلى ساپا ناشار دەپ باعالاعان ازاماتتارعا كەرى بايلانىس، قوڭىراۋ شالۋى، سونداي-اق 1414 ءنومىرى ارقىلى بىرىڭعاي جۇيەگە حابارلاسۋى ماڭىزدى»، دەدى مينيستر.

ب.ءمۋسيننىڭ ايتۋىنشا، 2020-2021 جىلدارى اقپاراتتىق جۇيەلەردىڭ ىستەن شىعۋى تىركەلگەن. ماسەلەن، 2020 جىلى دەنساۋلىق ساقتاۋ مينيسترلىگىنە تيەسىلى قىزمەت ءتۇرى 83 ساعاتتان استام، باس پروكۋراتۋرانىڭ جۇيەلەرى 60 ساعاتتان استام ۋاقىت بويى جۇمىس ىستەمەي قالعان. ال بيىلعى 9 ايدا جالپى العاندا مەملەكەتتىك ورگانداردىڭ اقپاراتتىق جۇيەلەرى 482 ساعات ىستەن شىققان. «مەملەكەتتىك قىزمەتتەردى ازا­ماتتارعا ىڭعايلى ءارى ساپالى كورسەتۋ ءۇشىن مينيسترلىك تسيفرلى ترانسفورماتسيا ورتالىعى جاڭاشىل تاسىلدەردى ەنگىزەدى. ولاردىڭ قاتارىندا پرواكتيۆتى قىزمەت كورسەتۋ، تانىمال قوسىمشالار ارقىلى قىزمەت كورسەتۋ، تسيفرلى قۇجاتتار مەن بيومەتريانى ەنگىزۋ، تەلەفون ارقىلى قىزمەت كورسەتۋ بار. ماسەلەن، مۇمكىندىگى شەكتەۋلى ادامداردى تىركەۋ، ولار ءۇشىن وڭالتۋ قۇرالدارىن ۇسىنۋ بولىگىندە بۇل پروتسەسس وڭتايلاندىرىلدى. بۇرىن بۇل قىزمەتتى الۋ ءۇشىن بىرنەشە مەكەمەدەن ءوتۋ قاجەت ەدى. قازىرگى تاڭدا مەديتسينالىق مەكەمەگە بارسا جەتكىلىكتى. قالعان پروتسەسس اقپاراتتىق جۇيەلەردىڭ ينتەگراتسيالانۋى ارقىلى پرواكتيۆتى تۇردە جۇرەدى. مۇنداي ءتاسىل 23 قىزمەت تۇرىنە قولدانىلادى»، دەدى ب.مۋسين.

مەملەكەتتىك قىزمەتتەردى سىرت­قى پلاتفورمالارعا شىعارۋ پروتسەستى ايتار­لىق­تاي وڭتايلاندىرۋ مەن اۆتومات­تان­دىرۋعا، سونداي-اق ازاماتتاردىڭ ۋاقىتى مەن شىعىندارىن ۇنەمدەۋگە اسەر ەتتى. بۇل جاعدايدا اۆتوكولىكتى ساتىپ الۋشىعا دا، ساتۋشىعا دا ءوتىنىش بەرۋ ءۇشىن حقو-عا بارۋدىڭ، كەزەك كۇتۋدىڭ قاجەتتىلىگى جوق. ماسەلەن، 2021 جىلدىڭ قاڭتار ايىندا عانا بانكتەردىڭ قوسىمشالارى (Kaspi، Halyk) ارقىلى 104 468 اۆتوكولىك تىركەۋ/قايتا تىركەۋدەن ءوتتى. ونىڭ ىشىندە ونلاين تىركەۋ 5 پايىزدى قۇرايدى. 2021 جىلعى قىركۇيەك ايىنىڭ قورىتىندىسى بو­يىنشا 167 561 اۆتوكولىك تىركەۋ/قايتا تىركەۋدەن وتكەن. ونلاين راسىمدەۋ 36 پايىزعا دەيىن ءوستى (63 057 ءوتىنىم).

2021 جىلى «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ ماقساتىندا مەملەكەتتىك ورگانداردىڭ ازاماتتاردىڭ وتىنىشتەرىن قابىلداۋ ءتاسىلى وزگەردى. ۆەدومستۆو باسشىسىنىڭ اي­تۋىنشا، بۇرىن ءوتىنىش بەرۋ ءۇشىن بىرنەشە ارنا بار ەدى. شەنەۋنىكتەر ءبىر-بىرىنە سۇرا­نىستاردى جىبەرە المادى، سوتقا شاعىم بەرەتىن جۇيە ىڭعايسىز-تۇعىن. قازاق­ستاندىقتار مەكەمەلەر اراسىندا ءجۇرىپ، ءتۇرلى قۇجاتتار جيناۋعا تۋرا كەلەتىن.

جاڭادان قۇرىلعان E-Otinish ەلەكتروندى وتىنىشتەر جۇيەسى وسى ماسەلەلەردى شەشۋگە كومەكتەسەدى. بۇل – اكىمشىلىك را­سىمدىك-پروتسەستىك كودەكس (ارپك) شەڭ­­بەرىندە قارالاتىن ازاماتتاردىڭ بار­لىق وتىنىشتەرى ءۇشىن بىرىڭعاي اقپا­رات­تىق جۇيە. ە-Otinish ءوتىنىش بارىسىن قا­داعالاۋعا جانە باقىلاۋعا جانە قانا­عات­تانارلىقسىز جاۋاپ بولعان جاعدايدا، مەم­لەكەتتىك ورگاننىڭ جاۋابىنا شاعىمدانۋعا مۇمكىندىك بەرەدى.

جاڭاشىلدىقتىڭ تاعى ءبىرى – حقو جۇمىسىنىڭ جاڭا فورماتى. اتاپ ايت­قاندا، حقو-عا بارماي-اق، قىزمەتتەردى تەك بەينەقوڭىراۋ ارقىلى الۋ. بۇل حقو-دا­عى كەزەكتى جەڭىلدەتۋگە مۇمكىندىك بەرەدى.

بيىلعى قىركۇيەك ايىندا حقو موبيل­دىك قوسىمشاسى ارقىلى پيلوت­تىق رەجىمدە كورسەتىلەتىن مەملەكەتتىك قىزمەتتەردىڭ تىزبەسى جانە مەملەكەتتىك قىز­مەتتەردى كورسەتۋ كەزىندە قۇجاتتاردى قابىل­داۋدىڭ ءتيىستى الگوريتمى ايقىن­دالدى. قاناتقاقتى جوبا اياسىندا بەي­نە­قوڭىراۋلارعا اقمولا، قوستاناي، قىزىل­وردا جانە پاۆلودار وبلىستارىنداعى وپەراتورلار جاۋاپ بەردى. «بۇل شارالار بىزگە مەملەكەتتىك قىزمەتتەردى الۋ ءۇشىن تەك ەلەكتروندى ۇكىمەت پورتالىنا عانا تاۋەلدى بولماۋعا مۇمكىندىك بەرەدى، ۋاقىت تالاپتارىن ەسكەرگەندە بۇل قولايسىز. كوپ ۇزاماي قازاقستاندىقتار «حقو» موبيلدىك قوسىمشاسىن پايدالانا الادى. قىركۇيەك ايىندا پيلوتتىق رەجىمدە قوسىمشا ارقىلى قولجەتىمدى بولاتىن مەملەكەتتىك قىزمەتتەردىڭ ءتىزىمى بەكىتىلدى. ءبىرىنشى كەزەڭدە ءتورت وڭىردەگى 24 وپەراتور بەينە قوڭىراۋ ارقىلى ازاماتتارعا مەملەكەتتىك قىزمەتتەردى كورسەتەتىن بولادى. بۇل – حقو جۇمىسىنىڭ مۇلدەم جاڭا فورماتى»، دەپ اتاپ ءوتتى باعدات مۋسين.

قوسىمشادا كليەنت ءپروفيلى، كەزەكتى برونداۋ سەرۆيسى، QR كومەگىمەن تالون الۋ، بەينە قوڭىراۋ ارقىلى مەملەكەتتىك قىز­مەتتەردى الۋ سەرۆيسى مەن بولىمدەر ءتىزىمى (جۇمىس ءتارتىبى، بولىمدەردىڭ جۇك­تە­لىمى، مەكەنجايى)، گيد ء(جيى قويىلاتىن سۇ­راق­تارعا جاۋاپتار) جانە بايلانىس اقپا­را­تىنان تۇراتىن نەگىزگى فۋنكتسيونال ازىرلەندى. ۋاقىت وتە كەلە كورسەتىلەتىن قىز­مەت سانى ارتادى.

سونداي-اق ب.مۋسين بىرىڭعاي بايلانىس ورتالىعىنىڭ جۇمىسىنا توقتالدى. ونىڭ ايتۋىنشا، ورتالىق مەملەكەتتىك قىزمەتتەر مەن سەرۆيستەر بويىنشا كەڭەس بەرىپ، ۆاكتسينالاۋ، Ashyq قوسىمشاسى، حقو قىزمەتى، اكىمشىلىك راسىمدىك-پروتسەس­سۋالدىق كودەكس، ە-Otinish سەرۆي­سىنىڭ جۇ­مىسى بويىنشا اقپارات ۇسىنادى. بۇدان بولەك، حقو قىزمەتىنە قاتىستى شاعىمدار، مۇمكىندىگى شەكتەۋلى ادامدارعا قىزمەت كورسەتۋگە وتىنىمدەر قابىلدايدى.

جەدەل ارەكەت ەتۋ جانە ازاماتتاردىڭ مەملەكەتتىك قىزمەتتەرگە قاتىستى كۇردەلى سۇراقتارى تۋىنداعان جاعدايدا، جاۋاپ بەرۋ ءۇشىن 25 ورتالىق مەملەكەتتىك ورگان بويىنشا جاۋاپتى تۇلعالاردىڭ بايلانىس دەرەكتەرى نەگىزىندە بازا قۇرىلدى. ادىس­تەمەلىك ماتەريالدار، ديالوگ قۇرىلىمى، جۇمىس كەزىندە وپەراتورلارعا قويىلاتىن تالاپتار، وپەراتورلار ءۇشىن ستسەناريلەر ازىرلەندى، ساپانى باقىلاۋدى جۇزەگە اسىرۋ كەزىندە باعالاۋ شارتتارى ايقىندالدى.

ۆەدومستۆو باسشىسىنىڭ سوزىنە سەنسەك، قازىردىڭ وزىندە جوعارى ناتيجەگە قول جەت­كىزىلدى. مىسالى، قوڭىراۋ شالۋشىلاردىڭ جاۋاپ كۇتۋ ۋاقىتى تومەندەدى (304-تەن 16 سەكۋندقا دەيىن)، قوڭىراۋ شالۋ پايىزى ارتتى (69 پايىزدان 99،1 پايىزعا دەيىن). سونىمەن قاتار ىنتالاندىرۋ ماقساتىندا وپەراتورلاردىڭ جالاقىسى ارتقان. سون­داي-اق مينيسترلىك تسيفرلاندىرۋدىڭ مۋل­تي­پلاتفورمالىق مودەلىنە كوشۋدى جوسپارلاپ وتىر. بۇل مودەل ءار ءتۇرلى مەملەكەتتىك ورگانداردىڭ 400 اقپاراتتىق جۇيەسىنىڭ شاشىراڭقىلىعى مەن ينتەگراتسياسى پروبلەماسىن شەشۋگە مۇمكىندىك بەرەدى، بۇل مەملەكەتتىك قىزمەت سالاسىنداعى ازاماتتاردىڭ قاجەتتىلىكتەرىنە قاراي باعدارلى جۇمىس ىستەۋگە اسەر ەتەدى.

ب.مۋسين حالىقتىڭ ينتەرنەتكە جاپپاي قول جەتكىزۋىن قامتاماسىز ەتۋ ماڭىزدى مىندەت بولىپ قالا بەرەتىنىن اتاپ ءوتتى. 2020 جىلى مينيسترلىك ەكى اۋقىمدى جوبانى ىسكە اسىردى: اۋىلدارعا كەڭ جولاقتى ءموبيلدى ينتەرنەت جەتكىزۋگە قاجەتتى ينفراقۇرىلىم قۇرۋعا ارنالعان «اۋىلعا توبج» جانە «250+» جوبالارى. «اۋىلعا توبج» جوباسى ارقىلى ەلى­مىزدىڭ 1257 اۋىلىندا 3718 مەملەكەتتىك ورگان مەن بيۋدجەتتىك ۇيىمدار ينتەرنەتپەن قامتاماسىز ەتىلىپ، 20 000 كم «وپتيكا» وتكىزىلدى. كەڭجولاقتى ينتەرنەت قىزمەتتەرىمەن حالىق سانى 250-دەن اساتىن 4 137 اۋىلدى ەلدىمەكەننىڭ بارىنە جاھاندىق جەلى جەتكەن. قازاقستانداعى
6 459 ەلدى مەكەنىنىڭ 5 214 اۋىلى، 88 قالاسى جانە قالا ۇلگىسىندەگى 30 ەلدى مەكەنى كەڭجولاقتى ينتەرنەت بايلانىسىمەن قامتاماسىز ەتىلگەن.

بىرقاتار ەلدى مەكەندە ينتەرنەت ساپاسىنا قاتىستى پروبلەمالار انىقتالعان. وسىعان بايلانىستى جىلدامدىق پەن ساپانى ارتتىرۋ بويىنشا جۇمىستار جۇرگىزۋدە. FWA تەحنولوگياسىن 3G/4G اۋىستىرۋ جانە ينتەرنەت ساپاسىن جاقسارتۋ (2G – 3G/4G اۋىستىرۋ) بويىنشا بەلسەندى جۇمىس اتقارىلىپ جاتىر. مينيستر كەلتىرگەن دەرەكتەرگە ساي، بۇگىنگى تاڭدا 2021 جىلعا جوسپارلانعان 621 ەلدى مەكەننىڭ 502-سىندە ساپا جاقسارعان.

سونىمەن قاتار مينيستر دەپۋتاتتاردىڭ قولداۋىنىڭ ارقاسىندا اكىمشىلىك قۇقىق بۇزۋشىلىقتار كودەكسىنە بايلانىس وپەراتورلارىنا ساپاسىز قىزمەت كورسەتكەنى ءۇشىن ايىپپۇلداردى (100 اەك-تەن 1000 اەك-كە دەيىن) ارتتىرۋ بولىگىندە تۇزەتۋلەر ەنگىزىلگەنىن اتاپ ءوتتى.

بايلانىس ساپاسىن باقىلاۋ اياسىندا ۇيالى بايلانىس وپەراتورلارى ساپا­سىز قىزمەت كورسەتكەن جاعدايدا اكىم­شىلىك جاۋاپكەرشىلىككە تارتىلادى. 2021 جىلدىڭ باسىنان بەرى 408 تەكسەرۋ جۇر­گى­زىلىپ، 92،1 ملن تەڭگە سوماسىندا ايىپ­پۇل سالىندى. بۇگىنگى تاڭدا 1178 اۋىل­عا ءموبيلدى كەڭجولاقتى بايلانىس بارماعان. بۇل ەلدى مەكەندەردە 127 مىڭ ادام ءومىر سۇرەدى. ۆەدومستۆو باسشىسى 561 اۋىلدى 2024 جىلعا دەيىنگى كەزەڭدە بايلانىس وپەراتورلارى سالىق جەڭىلدىكتەرى ەسەبىنەن كەڭجولاقتى بايلانىس­پەن قامتاماسىز ەتەتىنىن جەتكىزدى. سونى­مەن قاتار ەل اۋماعىندا بايلانىس وپەرا­تور­لارىنىڭ جۇمىس ىستەپ تۇرعان جەلىلەرىن فۋنك­تسيونالدىق تولىقتىرۋ رەتىندە گەوستا­تسيو­نارلىق ەمەس سپۋتنيكتىك جۇيەلەردى ورىستەتۋ جوسپارلانىپ وتىر. بۇل قادامعا قامتۋ ايماعىن كەڭەيتۋگە جانە حالىق ءۇشىن ينتەرنەتكە كەڭجولاقتى قولجەتىمدىلىك قىزمەتتەرىن قامتاماسىز ەتۋگە مۇمكىندىك بەرەدى.

جيىن بارىسىندا دەپۋتاتتار مينيستر­گە كوپتەگەن ساۋال قويدى. ماسەلەن، ەرلان سايروۆ تسيفرلى پلاتفورمانى قۇ­رۋعا بايلانىستى رەسەيدىڭ «سبەربانكى» ارا­سىنداعى قويىلعان مەموراندۋم حالىقتىڭ نارازىلىعىن تۋعىزعانىن اتاپ ءوتتى. «جوبانى ىسكە اسىرۋعا قاتىستى سۇراقتار ءالى بىتكەن جوق. ونى ىسكە اسىرۋ ادىلەتتىلىك پرينتسيپتەرىنە سايكەس كەلۋى كەرەك دەپ ەسەپتەيمىز. ياعني تسيفرلى پلاتفورما بويىنشا ناقتى كورسەتكىشتەرى بار، ءتيىستى تەحنيكالىق تاپسىرما ازىرلەنىپ، جوبا­دا قازاقستاندىق ۇلەستى قامتۋ جوعارى دەڭگەيدە بولۋى كەرەك. قازاقستاننىڭ تسيفر­لى پلاتفورماسىن ازىرلەۋگە حالىق­ارالىق اشىق تەندەر جاريالانعانى ابزال. وندا ەلدىڭ تسيفرلى تاۋەلسىزدىگىنە، ازا­مات­تاردىڭ دەرەكتەرىن قورعاۋعا قاتىستى بارلىق تالاپتار بەلگىلەنۋى قاجەت. جوبا­نى وتاندىق تسيفرلى يندۋستريانى دامىتۋ مەن ارتاراپتاندىرۋعا قۋاتتى سەرپىن بەرە­تىندەي ەتىپ ىسكە اسىرۋعا ءتيىسپىز. وسىن­داي سەرپىن بولۋى ءۇشىن نورمالار مەن پرو­تسەدۋرالار انىق، ادىلەتتى، تۇسىنىكتى، حالىق­ارالىق ستاندارتتارعا سايكەس بولۋى شارت. وسى ورايدا ناقتى تەحنيكالىق تاپسىر­ما بار ما؟ جوبانى جۇزەگە اسىرۋعا اشىق كونكۋرس قاشان جاريالانادى؟» دەدى دەپۋتات.

ساۋالعا جاۋاپ بەرگەن ب.مۋسين بۇل با­عىتتا ءتيىستى ءتۇسىندىرۋ جۇمىستارى ءجۇرىپ جاتقانىن ايتتى. مينيستر قازىرگى تاڭدا مە­مو­راندۋمعا عانا قول قويىلعانىن، ونىڭ ەشقانداي كەلىسىمشارت ەمەسىن جەت­كىزدى. «تەحنيكالىق نەگىزدەمە مەن تەحني­كا­لىق قۇجاتتاما دايارلاۋ ءۇشىن زەرت­تەۋ جۇ­مىستارىن جۇرگىزىپ جاتىرمىز. 15 جەل­توقسانعا دەيىن زەرتتەۋ اياق­تال­عان­نان كەيىن، تەحنيكالىق قۇجاتتاماعا كوشە­مىز. الداعى جىلعى 15 اقپانعا دەيىن تەح­ني­كالىق قۇجاتتامانى دايىندايمىز. سول تەح­نيكالىق قۇجاتتاما نەگىزىندە تەح­ني­كالىق ءارى ەكونوميكالىق نەگىزدەمە ازىر­لەنەدى. وسى راسىمدەر جاسالماي، ەشقانداي كەلىسىمشارت جاسالمايدى»، دەدى مينيستر.

قازىبەك يسا تسيفرلاندىرۋ بويىنشا بۇۇ رەيتينگىسىندە قازاقستاننىڭ دەڭ­گەيى جاقسى ەكەنىن ايتتى. وسى ورايدا دەپۋتات نەلىكتەن تىزىمدە بىزدەن كەيىنگى ورىندا تۇرعان رەسەيدىڭ كومپانياسىنا جۇ­گىنىپ وتىرعانىمىزعا الاڭداۋشىلىق ءبىلدىردى. «تىزىم­دە ءتىپتى رەسەيدىڭ دە الدىندامىز. ەندە­شە، وزىمىزدەن كەيىن تۇرعان رەسەيگە 19 ملن قازاقستاندىقتىڭ مالىمەتى بار ەلەكتروندى ۇكىمەتتى تۇتاستاي بەرە سالۋ تاۋەلسىزدىگىمىزگە نۇقسان ەمەس پە؟ وسىعان دەيىن مەموراندۋمعا قول قويىلدى، بىزدە بارلىعى مەموراندۋمنان باستالادى. حالىقتىڭ قاۋىپتەنىپ، نارازىلىق تانىتقانى دا وسىعان بايلانىستى. ەكىنشىدەن، نەلىكتەن بۇل قادامدار وزىمىزدەن كەيىن تۇرعان رەسەيمەن جاسالىپ وتىر؟ الدىڭعى قاتارلى ەلدەرمەن نەگە جۇرگىزىلمەيدى؟»، دەدى ق.يسا.

 

 

سوڭعى جاڭالىقتار

ۇقساس جاڭالىقتار