«وڭىردەگى رەسەي وبلىستارىمەن شەكارالاس بەكەتتەردە كۇنى-ءتۇنى تۇراقتى باقىلاۋ جۇرگىزىلەدى. مەملەكەتتىك شەكارانىڭ 4 اۆتوموبيل وتكىزۋ بەكەتى باقىلانادى. رەسەي, بەلارۋس ەلدەرىنىڭ ازاماتتارىنا وبلىس شەكاراسىنان وتۋگە تىيىم سالىنعان. ەگەر بارلىق كارانتيندىك شارا ساقتالسا, وندا ءبىزدىڭ وڭىرگە لوكداۋن ەنگىزۋدىڭ قاجەتى بولمايدى. بۇل ىندەت جۇقتىرعان ناۋقاستاردىڭ سانىنا بايلانىستى», دەدى ا.سەيىتقازينوۆ.
ال وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ مالىمەتىنشە, تەكسەرۋ انىقتامالارى بار 491 جاياۋ ادام جانە 253-ءى جۇك كولىگىنىڭ جۇرگىزۋشىسى شەكارادان بەرى قاراي وتكەن. كارانتيندىك ستاتسيونارعا 10 ادام ورنالاستىرىلسا, 4 شەتەلدىك شەكارادان كەرى قايتارىلعان.
وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ مالىمەتىنشە, قازان ايىنىڭ سوڭعى كۇندەرى وڭىردە ىندەت جۇقتىرعان 49 331 ناۋقاس تىركەلسە, 27 035 ناۋقاس – وبلىس ورتالىعىنىڭ تۇرعىندارى. ەپيدەميولوگتەردىڭ باعالاۋى بويىنشا, ىندەت ينفەكتسياسىمەن اۋىرعان سىرقاتتانۋشىلىق بويىنشا وڭىردە جاعداي ءالى تۇراقسىز.
«سىرقاتتانعانداردىڭ اراسىندا 296 ناۋقاس باسقا وڭىرلەردەن جۇقتىرعانى انىقتالدى. جالپى, ناۋقاستار كورسەتكىشى 100 مىڭ تۇرعىنعا شاققاندا 6 558,4-ءتى قۇرايدى. پاۆلودار, ەكىباستۇز, اقسۋ قالالارى, اقتوعاي, ۋسپەن, پاۆلودار, ماي, اققۋلى, ەرتىس اۋداندارى – «قىزىل ايماقتا», شارباقتى, جەلەزين, تەرەڭكول اۋداندارى – «سارى ايماقتا», ال باياناۋىل اۋدانى «جاسىل ايماققا» ءوتتى», دەلىنگەن دەپارتامەنت مالىمەتىندە.
مىسالى, 11 830 ناۋقاس ىندەت جۇقتىرعان ادامدار اراسىندا بايلانىستا بولسا, 33 416 ناۋقاس – پنەۆمونيامەن اۋىرعاندار جانە ءوزىن ءوزى ۇيدە ەمدەگەندەر. سونداي-اق 3 789 ناۋقاس پروفيلاكتيكالىق ماقساتتا ەمحاناعا تەكسەرىلگەن كەزدە انىقتالعان. ۆيرۋستى انىقتاۋ ماقساتىندا زەرتحانالاردا تاۋلىگىنە 2 030 زەرتتەۋ جاسالادى.
ءوڭىر شىلدە ايىنان باستاپ قوڭىر كۇزگە دەيىن «قىزىل ايماقتا» تۇر. كارانتين شارالارىن قاتاڭ ساقتاۋ بارىسى باقىلاۋدا. بىراق وبلىس ورتالىعىنداعى قوعامدىق كولىكتەر تولى, اۆتوبۋستار ءجيى جۇرمەيدى. ويىن-ساۋىق, توي-تومالاقتار جالعاسۋدا. ناۋقاستار سانى كۇرت كوبەيىپ كەتسە, كارانتين شارالارى قايتا كۇشەيتىلۋى دە ابدەن مۇمكىن. سوندىقتان وبلىستىق دەنساۋلىق ساقتاۋ باسقارماسى ىندەتتىڭ «ىزعارى ازايدى» دەپ ەركىندىككە بوي الدىرماي, ساقتىق شارالارىنا ءمان بەرۋىنە, ىندەتكە قارسى ەكپە سالدىرۋعا شاقىرادى. ويتكەنى ەلىمىزدە كۇزگە دەيىن ۇجىمدىق يممۋنيتەتتى قالىپتاستىرۋ جايى ايتىلدى. ىندەتتىڭ ءتۇرلى شتامىنا قارسى تۇرۋ ءۇشىن ەكپە الىپ, تۇرعىندار ءوز دەنساۋلىعىن ساقتاۋى قاجەت. ۇجىمداعى قىزمەتكەرلەردىڭ, ءوندىرىس ورىندارىنداعى جۇمىسشىلاردىڭ, جالپى, حالىقتىڭ سانيتارلىق-ەپيدەميولوگيالىق سالاماتتىلىعىن قامتاماسىز ەتۋ ءۇشىن ينفەكتسيالىق اۋرۋلاردىڭ يممۋنوپروفيلاكتيكالىق ءىس-شارالارى جالعاسۋدا.
قازىر وڭىردەگى اۋرۋحانا, ەمحانالاردا 153, ساۋدا ۇيلەرىندە, كاسىپورىنداردا جانە باسقا دا نىسانداردا 14 ەگۋ بولىمشەسى ورنالاسقان. وبلىس ورتالىعىندا ەڭبەك ۇجىمدارىنا ارنالعان 67 ءموبيلدى توپ جۇمىس ىستەۋدە.
ال وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ 21 قازانداعى ەپيدەميالىق جاعداي تۋرالى دەرەكتەرىنە كوز سالساق, وڭىردە تاعى 202 ادامنان ىندەت جۇقتىرۋ جاعدايى انىقتالعان, 98 ناۋقاس ساۋىعىپ شىققان ەكەن.
پاۆلودار وبلىسى
