سولاردىڭ ىشىندە كەيبىر زاڭنامالىق اكتىلەرگە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى كوبىرەك تالقىلانىپ, بايانداما جاساعان مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى قايرات قوجامجاروۆقا دەپۋتاتتار بىرنەشە سۇراق قويدى.
زاڭ جوباسىنىڭ ءوزى ەلباسىنىڭ ۇستىمىزدەگى جىلعى 14 ماۋسىمدا جانە ۇلتتىق كوميسسيانىڭ 15 ساۋىردە بەرگەن تاپسىرمالارىنىڭ نەگىزىندە دايىندالعان. ول ازاماتتاردىڭ مەملەكەتتىك قىزمەتكە ءتۇسۋ ءتارتىبىن جەتىلدىرىپ, قۇقىق قورعاۋ جانە مەملەكەتتىك قىزمەت ستاندارتتارىن جاقىنداتادى. ق.قوجامجاروۆتىڭ ايتۋىنا قاراعاندا, زاڭ جوباسى قوعامدا كەڭىنەن تالقىلانعان.
سونىمەن تۇزەتۋلەر قانداي دەگەن سۇراققا جاۋاپ بەرەتىن بولساق, وندا بىرىنشىدەن, مەملەكەتتىك قىزمەتتىڭ بوس ورىندارىن تولىقتىرۋ قايتا قارالادى. قازىرگى كەزدە ول ءۇش كەزەڭنەن تۇراتىن كونكۋرس ارقىلى جۇزەگە اسىرىلادى. وعان 16-دان 52 كۇنگە دەيىن ۋاقىت كەتىپ, مەملەكەتتىك قىزمەت ورنى كوپ مەرزىمگە بوس تۇرادى. وسىنىڭ ءوزى كادر تاپشىلىعىنا اكەلۋدە, دەدى شەشەن. اسىرەسە, اۋىلدىق جانە اۋداندىق دەڭگەيلەردە كادر جەتىسپەۋشىلىگى ايقىن بايقالۋدا ەكەن. زاڭ جوباسى وسىنداي ولقىلىقتاردى بولدىرماس ءۇشىن ىشكى جانە جالپى كونكۋرستاردى بىرىكتىرۋدى كوزدەپ وتىر. ءسويتىپ, بوس ورىنداردى تەزىرەك تولىقتىرۋعا قول جەتكىزىلەدى, سونىمەن قاتار مەريتوكراتيا قاعيداتتارى ساقتالاتىن بولادى, دەدى ق.قوجامجاروۆ.
سونداي-اق, «ا» كورپۋسى قىزمەتكەرلەرىن «ۆ» كورپۋسى لاۋازىمدارىنا تاعايىنداۋ ءتارتىبى جەڭىلدەتىلەدى. قازىر «ا» كورپۋسىنىڭ قىزمەتكەرلەرىن تومەنگى ورىندارعا تاعايىنداۋ تەك كادر ساياساتى جونىندەگى ۇلتتىق كوميسسيانىڭ شەشىمىمەن عانا جۇزەگە اسىرىلسا, ەندى زاڭ جوباسى وسى قۇقىقتى اگەنتتىككە بەرۋدى ۇسىنعان.
ءۇشىنشى باستى وزگەرىس قۇقىق قورعاۋ قىزمەتىنە ۇمىتكەر تۇلعالارعا ارنالىپتى. زاڭ جوباسى ولاردىڭ زاڭداردى ءبىلۋ جانە جەكە باسىنىڭ قاسيەتتەرىن باعالاۋعا ارنالعان تەستىلەۋدەن ءوتۋ مەرزىمىن اۋىستىرۋدى كوزدەگەن. قولدانىستاعى زاڭعا سايكەس مۇنداي تالاپ كەلەسى جىلدىڭ ءبىرىنشى قاڭتارىنان باستاپ ەنگىزىلەتىندىگى بەلگىلەنگەن. الايدا, مەملەكەت باسشىسى بۇل جۇيەنى بيىلدان باستاپ ەنگىزۋ جونىندە تاپسىرما بەرىپتى. مىنە, وسى جانە باسقا دا وزگەرىستەر تۋرالى بايانداعان ق.قوجامجاروۆقا ءبىرىنشى سۇراقتى دەپۋتات امانگەلدى داۋرەنباەۆ قويدى. ول قۇقىق قورعاۋ ورگاندارىنىڭ بوس لاۋازىمدارىنا ۇمىتكەر بولاتىن تۇلعالاردى تەستىلەۋ ءۇشىن اگەنتتىكتە ءتيىستى بازا بار ما جانە بۇل ءىس بيۋدجەتتەن قوسىمشا قاراجات تالاپ ەتپەي مە دەپ سۇرادى. ونىڭ سۇراعىنا جاۋاپ بەرە كەلىپ ق.قوجامجاروۆ قۇقىق قورعاۋ ورگاندارىنداعى بوس ورىندارعا جىلىنا 37 مىڭداي ۇمىتكەر كەلىپ, تەستىلەۋدەن وتەتىنىن جانە اگەنتتىكتىڭ بازاسى وسى ءىستى اتقارۋعا جەتكىلىكتى ەكەنىن جەتكىزدى.
دەپۋتات پاۆەل كازانتسەۆ مەريتوكراتيا قاعيداتىنىڭ ساقتالۋىنا ەنگىزىلەتىن وزگەرىستەر كەدەرگى كەلتىرمەي مە دەپ سۇرادى. وعان ق.قوجامجاروۆ كونكۋرستىق پروتسەدۋرالاردى وڭتايلاندىرۋ مەريتوكراتيا قاعيداتتارىنىڭ ساقتالۋىنا كەدەرگى كەلتىرمەيتىندىگىن كولدەنەڭ تارتتى.
دەپۋتات سەرىك سەيدۋمانوۆ باسشىلىق لاۋازىمدارعا تاعايىندالعان تۇلعالاردىڭ كومانداسىمەن كەلۋ ماسەلەسى حالىق اراسىندا نارازىلىق تۋدىراتىنىن ەسكە سالا كەلىپ, كارەرالىق مودەلگە اۋىسقاننان بەرى مەملەكەتتىك باسشى قىزمەتكەرلەردىڭ كومانداسىمەن ورىن اۋىستىرۋى ازايدى ما دەپ سۇرادى. وعان ق.قوجامجاروۆ كونكۋرسسىز تاعايىنداۋلاردىڭ 25 ەسە ازايعانىن ايتا كەلىپ, وسىنىڭ ارقاسىندا ءبىرىنشى باسشىلار اراسىندا كومانداسىمەن اۋىسىپ ءجۇرۋ ءىسى ازايىپ كەلە جاتقانى بايقالاتىنىن جەتكىزدى.
زاڭ جوباسى جونىندە قوسىمشا باياندامانى حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەسى ەرسۇلتان بەكتۇرعانوۆ جاسادى. شاعىن تالقىلاۋدان كەيىن زاڭ جوباسى تولىقتاي ماقۇلداندى.
وسى كۇنى تمد-عا قاتىسۋشى مەملەكەتتەردىڭ توتەنشە وقيعالاردىڭ الدىن الۋ جانە جويۋ سالاسىنداعى ىنتىماقتاستىعى تۋرالى كەلىسىمدى راتيفيكاتسيالايتىن زاڭ جوباسى دا ماقۇلداندى. زاڭ جوباسى تۋرالى باياندامانى ىشكى ىستەر ءمينيسترى ق.قاسىموۆ جاسادى.
ال كەيبىر زاڭنامالىق اكتىلەرگە ەكولوگيالىق ماسەلەلەر بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى بويىنشا قورىتىندى ازىرلەۋگە ۋاقىت بەلگىلەندى.
جاقسىباي سامرات, «ەگەمەن قازاقستان»
