قازاقستان • 24 قازان، 2021

بۇگىن - بايقوڭىردا قازا تاپقان زىمىرانشىلاردى ەسكە الۋ كۇنى

49 رەت كورسەتىلدى

«بايقوڭىر» عارىش كەشەنىندە 1960 جىلعى 24 قازاندا جانە 1963 جىلعى 24 قازاندا زىمىران-عارىش تەحنيكاسىن سىناۋ كەزىندە قازا تاپقان زىمىرانشىلاردى ەسكە الۋ كۇنى اتاپ وتىلەدى، دەپ حابارلايدى Egemen.kz.

كەڭەس كوسموناۆتيكاسىنىڭ تاريحىندا 1960 جىلدىڭ 24 قازانى مەن 1963 جىلدىڭ 24 قازانى قارالى كۇن بولىپ سانالادى.

بايقوڭىر ايلاعىنداعى ەڭ ۇلكەن اپات 1960 جىلى 24 قازاندا ر-16 قۇرلىقارالىق بالليستيكالىق زىمىرانىن سىناۋ ماقساتىندا ۇشىرۋعا دايىندىق كەزىندە بولدى. جوسپارلانعان ۇشۋعا 30 مينۋت قالعاندا №41 ۇشىرۋ الاڭىندا ەكىنشى ساتىلى قوزعالتقىش جوسپاردان تىس ىسكە قوسىلىپ كەتكەن. كەنەتتەن شىققان گاز ءبىرىنشى ساتىلى باكتى ورتەپ، جالىن 100 مەتر اۋماقتى قامتىعان.

ءورت كەزىندە شامامەن 100 ادام، ونىڭ ىشىندە كسرو ستراتەگيالىق ماقساتتاعى زىمىران جاساعىنىڭ باس قولباسشىسى، ارتيللەريانىڭ باس مارشالى ميتروفان نەدەلين قازا تاپتى. ال 1963 جىلى 70-الاڭدا بولعان ءورت كەزىندە 8 ادام مەرت بولدى. سول ۋاقىتتان بەرى 24 قازان كۇنى عارىش ايلاعىنىڭ ۇشۋ الاڭىندا بارلىق جۇمىس توقتاپ، ەشقانداي ۇشۋ جوسپارلانبايدى. بۇل ءداستۇر ءالى كۇنگە دەيىن ساقتالىپ كەلەدى.

اپات تۋرالى مالىمەتتەر مەملەكەتتىك قۇپيا بولىپ سانالدى جانە ول تۋرالى اقپاراتتار العاش رەت 1989 جىلى عانا كەڭەستىك باق بەتتەرىندە جارىق كوردى.

بۇگىن بايقوڭىر قالاسىنىڭ تۇرعىندارى ادەتتەگىدەي قازا تاپقان زىمىران سىناقشىلارىنا ارنالعان ەسكەرتكىشتىڭ الدىنا جينالىپ، عارىشقا تۇڭعىش ساپار شەگۋ جولىندا مەرت بولعانداردى ەسكە الادى.

ا

سونىمەن قاتار بۇگىن بايقوڭىرلىقتار «ساتۋرن» كينوكونتسەرت زالىندا «زىمىران ۇشىرىلمايتىن كۇن» دەپ اتالاتىن دەرەكتى ءفيلمدى تاماشالايدى. بۇل ءفيلمدى «يۋجنىي» عارىش ورتالىعىنىڭ تەلەۆيزيالىق ءبولىمىنىڭ قىزمەتكەرلەرى عارىش ايلاعىنداعى زۇلمات اپاتتىڭ 50 جىلدىعىنا وراي دايىنداعان بولاتىن.

«بۇل قۇرباندىق بوسقا كەتپەدى. ازىرلەنگەن زىمىران قارۋى وتانىمىزدىڭ قاۋىپسىزدىگىن قامتاماسىز ەتىپ، يادرولىق سوعىس قاۋىپىن سەيىلتتى. قازىرگى ۋاقىتتا بايقوڭىر عارىش ايلاعىندا جۇمىس ىستەيتىن سىناقشىلار ارداگەر-زىمىرانشىلاردىڭ ءداستۇرىن لايىقتى دەڭگەيدە جالعاستىرىپ، جاڭا جاعدايدا عارىش سالاسىنداعى ەلىمىزدىڭ العىشەپتەگى پوزيتسياسىن قامتاماسىز ەتىپ كەلەدى. جاڭا زىمىران-عارىش تەحنيكاسىن سىناقتان وتكىزۋ بارىسىندا قازا تاپقان بايقوڭىر عارىش كەشەنى سىناقشىلارى ءبىزدىڭ جۇرەگىمىزدە ماڭگى ساقتالاتىن بولادى»، دەدى بايقوڭىر قالاسى اكىمشىلىگىنىڭ باسشىسى كونستانتين بۋسىگين قالا تۇرعىندارىنا جولداعان ۇندەۋىندە.

سوڭعى جاڭالىقتار

ۇقساس جاڭالىقتار