كومىر قورى بويىنشا قازاقستان كوشباسشى ەلدەردىڭ وندىعىنا كىرەدى. قور كولەمى 33,9 ملرد توننانى قۇرايدى. بارلانعان كومىر قورىنىڭ 90%-دان استامى قازاقستاننىڭ سولتۇستىك-شىعىسىندا جانە ورتالىق بولىگىندە شوعىرلانعان. تاۋەلسىزدىك جىلدارى ءوندىرۋشى كاسىپورىندار 2,7 ملرد توننادان استام كومىر ءوندىردى. شامامەن 0,8 ملرد توننا جاقىن جانە الىس شەتەلگە ەكسپورتتالدى.
قر يندۋستريا جانە ينفراقۇرىلىمدىق دامۋ ۆيتسە-ءمينيسترى رۋسلان بايميشەۆ ءوز سوزىندە ۆەدومستۆو ءۇشىن ىشكى نارىقتى, ونىڭ ىشىندە حالىق پەن كوممۋنالدىق-تۇرمىستىق سەكتوردى كومىرمەن قامتاماسىز ەتۋ ماڭىزدى ەكەنىن اتاپ ءوتتى.
«2021 جىلدىڭ 9 ايىنىڭ قورىتىندىسى بويىنشا ەلىمىزدىڭ كومىر ءوندىرۋشى كومپانيالارى 79,1 ملن توننا كومىر ءوندىردى. بۇل وتكەن جىلدىڭ سايكەس كەزەڭىمەن سالىستىرعاندا 1,4%-عا كوپ. بۇگىنگى تاڭدا كوممۋنالدىق-تۇرمىستىق سەكتور بويىنشا كومىر قورىمەن قامتاماسىز ەتۋ 96%, تۇرعىنداردى قامتۋ 84,4%-دى قۇرايدى. ياعني جاعداي تۇراقتاندى. بارلىق وتكىزۋ پۋنكتتەرىندە جەتكىلىكتى مولشەردە كومىر بار», دەپ اتاپ ءوتتى ۆيتسە-مينيستر.
سونىمەن قاتار, ۆيتسە-مينيستر كومىر سالاسىندا ىسكە اسىرىلىپ جاتقان جوبالار تۋرالى ايتىپ بەردى. ءىرى جوبالاردىڭ ءبىرى – «بوگاتىر» كەسىگىندە كومىر ءوندىرۋدىڭ تسيكلدىق-اعىندىق تەحنولوگياسى». ول كاسىپورىننىڭ وندىرىستىك قۋاتىن جىلىنا 42 ملن توننادان 48 ملن تونناعا دەيىن ۇلعايتۋعا مۇمكىندىك بەرەدى. ءوندىرىستى ودان ءارى ءارتاراپتاندىرۋ ماقساتىندا «شۇباركول كومىر» اق-دا ارنايى كوكس, كومىر شايىرى مەن ماي وندىرەتىن جاڭا زاۋىت سالۋ جوباسى ىسكە اسىرىلۋدا. سونداي-اق «ارسەلورميتتال تەمىرتاۋ» اق كومىر قاباتتارىنان مەتاننان ەلەكتر-جىلۋ ەنەرگياسىن ءوندىرۋ جوباسىن ىسكە اسىرۋدى جوسپارلاپ وتىر.
