ANTIKOR • 20 قازان، 2021

سقو-دا مەملەكەتتىڭ 420 ملن تەڭگەسىن جىمقىرعان 8 شەنەۋنىك سوتتالدى

42 رەت كورسەتىلدى

سولتۇستىك قازاقستان وبلىسىندا بيىل سىبايلاس جەمقورلىققا قارسى قىزمەت 74 قىلمىستى تىركەسە، سونىڭ 66-سى - سىبايلاس جەمقورلىق فاكتىلەرى، دەپ حابارلايدى Egemen.kz.

سقو سىبايلاس جەمقورلىققا قارسى قىزمەتى 9 ايدىڭ قورىتىندىسى بويىنشا بريفينگ وتكىزدى. قر سىبايلاس جەمقورلىققا قارسى ءىس-قيمىل اگەنتتىگىنىڭ سقو بويىنشا دەپارتامەنت باسشىسىنىڭ ءبىرىنشى ورىنباسارى نۇرلان ءجاحيننىڭ ايتۋىنشا، بيىل مەملەكەتتىك ورگانداردىڭ 8 باسشىسىنىڭ ارام ءىسى اشكەرە بولدى.

ونىڭ ەكەۋى - وبلىستىق، قالعانى - قالالىق-اۋداندىق دەڭگەيدەگى لاۋازىمدى تۇلعالار. ەكس-شەنەۋنىكتەر مەملەكەتكە 420 ملن تەڭگە شاماسىندا شىعىن كەلتىرگەن، سونىڭ 415،7 ملن تەڭگەسىن وتەلدى.

«بيىل سىبايلاس جەمقورلىققا بارعانى ءۇشىن 18 ادام سوتتالدى. ونىڭ بەسەۋى باس بوستاندىعىنان ايىرىلدى، بىرەۋىنىڭ باس بوستاندىعى شەكتەلدى، قالعاندارى ايىپپۇل تولەدى. سوتتالعانداردىڭ ءبىرى – سقو اكىمى اپپاراتىنىڭ شارۋاشىلىق باسقارماسىنىڭ باسشىسى جۇماباەۆ. ول 7 جىلعا باس بوستاندىعىنان ايىرىلدى، ال ونىڭ ورىنباسارى 3 جىل 6 ايعا سوتتالدى. جۇماباەۆ پەن ساعدەەۆ جىلۋ جۇيەسىن جوندەۋ بويىنشا مەملەكەتتىك ساتىپ الۋدىڭ جالعان شارتتارىن جاساۋ جولىمەن 5 ملن. تەڭگە سوماسىندا بيۋدجەت قاراجاتىن جىمقىردى دەپ كۇدىكتەلدى. سونداي-اق جۇماباەۆ 3 كاسىپكەرلىك سۋبەكتىسىنەن مەملەكەتتىك ساتىپ الۋ شارتتارىن كەدەرگىسىز جاساعانى ءۇشىن 1 ملن تەڭگە پارا العان»، دەيدى نۇرلان جاحين.

قول استىنداعى قىزمەتكەرلەرى سىبايلاس جەمقورلىققا جول بەرگەنى ءۇشىن 33 لاۋازىمدى تۇلعا تارتىپتىك جاۋاپكەرشىلىككە تارتىلدى. سونىڭ ىشىندە 4-ءۋى – ەسكەرتۋ، 7-ءۋى – سوگىس، 10-ى – قاتاڭ سوگىس، 4-ءۋى - قىزمەتكە تولىق سايكەس ەمەستىگى تۋرالى ەسكەرتۋ الدى، 2-ءۋىنىڭ لاۋازىمى تومەندەتىلسە، 4-ءۋى جۇمىستان بوساتىلدى.

«سىبايلاس جەمقورلىققا قارسى كۇرەستە جۇمىستىڭ پارمەندى تەتىكتەرىنىڭ ءبىرى - سىبايلاس جەمقورلىق جايىندا حابارلاعانداردى كوتەرمەلەۋ. قازاقستاندا ازاماتتاردى كوتەرمەلەۋدىڭ جاڭا سارالانعان جۇيەسى ەنگىزىلدى. بۇرىن بۇل قىلمىس ساناتىنا بايلانىستى جۇزەگە اسىرىلعان. قازىرگى ۋاقىتتا سىبايلاس جەمقورلىق تۋرالى حابارلاعان ادام پارا نەمەسە زالال سوماسىنا قاراي وسى سومانىڭ 10 %-نا يە بولادى. بۇل رەتتە ەڭ جوعارى سىياقى 4 000 اەك مولشەرىندە، ياعني 11،6 ملن تەڭگەنى قۇراۋى مۇمكىن. وسىلايشا، دەپارتامەنت سىبايلاس جەمقورلىق فاكتىلەرى تۋرالى حابارلاعانى ءۇشىن 5 ادامعا جالپى سوماسى 1 020 950 تەڭگە سىياقى تولەدى»، دەيدى نۇرلان جاحين.

سوڭعى جاڭالىقتار

ۇقساس جاڭالىقتار