بعم اقپاراتى بويىنشا, بۇۇ-نىڭ بالا قۇقىقتارى تۋرالى كونۆەنتسياسىنىڭ حالىقارالىق مىندەتتەمەلەرى مەن ەرەجەلەرىن ۇستانا وتىرىپ, قازاقستان بالالاردىڭ تەگىن مىندەتتى ورتا ءبىلىم الۋ قۇقىعىن, تەگىن ارناۋلى ورتا جانە جوعارى ءبىلىم الۋ مۇمكىندىگىن تولىق كولەمدە ىسكە اسىرادى.
«ايتا كەتسەك, قاقتىعىس ايماعىندا بولعان بالالارمەن جۇمىس كەزىندە ولاردىڭ بالالىق شاققا ءتان ەمەس ورتادا بولعاندىعىن ەسكەرۋ قاجەت. وسىعان بايلانىستى بعم ءار بالانى جەكە سۇيەمەلدەۋدى قامتاماسىز ەتۋ, ولاردى قايتا پسيحولوگيالىق جاراقاتتانۋدان قورعاۋ ءۇشىن شارالار قابىلدادى», دەپ حابارلادى كوميتەتتەن.
ۆەدومستۆونىڭ مالىمەتىنشە, قاقتىعىس ايماقتارىنان «جۋسان» وپەراتسياسى اياسىندا 516 قازاقستاندىق بالا قايتارىلدى. ولاردىڭ تورتەۋى تۋىستارىنا, قىرعىزستان ازاماتتارىنا قامقورلىققا بەرىلدى.
سونىمەن قاتار باستاپقى كەزەڭدە پسيحولوگيالىق-مەديتسينالىق-پەداگوگيكالىق كوميسسيالاردىڭ كومەگىمەن بالالاردىڭ ءبىلىم دەڭگەيىن, ىسكەرلىگى مەن داعدىلارىن انىقتاۋ ءۇشىن جەكە ءبىلىم بەرۋ وقىتۋ باعدارلاماسى جانە ولاردىڭ ارقايسىسى ءۇشىن پسيحولوگيالىق-پەداگوگيكالىق قولداۋ كارتاسى ازىرلەندى.
سونداي-اق بەيىمدەلۋ كەزەڭىندە مينيسترلىك مۇعالىمدەردى, رەپەتيتورلاردى, تاربيەشىلەردى تارتا وتىرىپ, جازعى مەكتەپ ۇيىمداستىردى.
ۆەدومستۆودا وتكىزىلگەن شارالار كەشەنى بالالارعا ەلىمىزدىڭ ءبىلىم بەرۋ ۇيىمدارىندا وقۋىن اۋىرتپالىقسىز جالعاستىرۋعا, ال ولاردىڭ كەيبىرەۋلەرى ءتيىستى سىنىپتا وقۋىن جالعاستىرۋ ءۇشىن ءبىر جىلدا ەكى سىنىپ باعدارلاماسىن يگەرۋگە مۇمكىندىك بەرگەنىن اتاپ ءوتتى.
جاسى بويىنشا وقىتىلماعان بالالار دا بار. بىراق بۇل تۇرعىدا بعم بالالار ءتيىستى سىنىپتىڭ باعدارلاماسىن اۋىرتپالىقسىز يگەرۋى ءۇشىن مۇعالىمدەر مەن تاربيەشىلەردىڭ كومەگىن قاراستىردى. بۇل ءىس-شارالار جىلىنا 10 بالاعا ەكى سىنىپ باعدارلاماسىن يگەرۋگە جانە قۇرداستارىمەن بىرگە وقۋدى جالعاستىرۋعا مۇمكىندىك بەردى.
«جالپى, بالالاردىڭ بەلگىلى ءبىر وقۋ جەتىستىكتەرى بار ەكەنىن اتاپ وتكىم كەلەدى, اتاپ ايتقاندا بالالاردىڭ 51%-ى (116) وقۋ وزاتتارى مەن جاقسى وقيتىندار. بالالاردىڭ 30% (67) ءتۇرلى وليمپيادالاردىڭ (7), شىعارماشىلىق كونكۋرستار مەن جارىستاردىڭ (60) قاتىسۋشىلارى مەن جۇلدەگەرلەرى اتاندى», دەپ اتاپ ءوتتى اقدم ءدىن ىستەرى كوميتەتىندە.
