سوزاق اۋداندىق پب-نىڭ تابيعاتتى قورعاۋ ينسپەكتورى جومارت اتاباەۆ «براكونەر» جەدەل-پروفيلاكتيكالىق ءىس-شاراسىن وتكىزۋ بارىسىندا سوزاق اۋدانى قۇمكەنت اۋىلىنا قاراستى اقجار كولىنىڭ ماڭايىندا كۇدىك تۋدىرعان «نيۆا» ماركالى اۆتوكولىكتى بايقاعان. سودان سوڭ جانىنا جاقىنداپ, براكونەرلەردى تەكسەرۋ كەزىندە اۆتوكولىكتىڭ جۇك سالعىشىنان زاڭسىز اۋلانعان بالىقتاردى تاپتى.
اتالعان دەرەك قك 335-بابى (بالىق رەسۋرستارىن, باسقا دا سۋ جانۋارلارىن نەمەسە وسىمدىكتەردى زاڭسىز اۋلاۋ) بويىنشا تىركەلدى. انىقتالعان ءۇش كۇدىكتى ازامات سايرام اۋدانىنىڭ تۇرعىندارى بولىپ شىقتى. ولاردان 42 كەلى سازان بالىعى مەن 200 مەتر بالىق اۋلاۋعا ارنالعان تور تاركىلەنىپ الىندى. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە. پوليتسەيلەر وقيعانىڭ ءمان-جايىن انىقتاپ جاتىر.
ءوز كەزەگىندە تۇركىستان وبلىسىنىڭ پوليتسەيلەرى تابيعاتتى قورعاۋ زاڭناماسىن بۇزعانى جانە رەسۋرستاردى زاڭسىز وندىرگەنى ءۇشىن قىلمىستىق جاۋاپكەرشىلىك قاراستىرىلعانىن ەسكەرتەدى. ءتارتىپ ساقشىلارى وبلىس تۇرعىندارى مەن قوناقتارىن تابيعاتتى قورعاۋعا جانە زاڭداردى ساقتاۋعا شاقىرادى.
