بيىلعى بايقاۋ تۇركىستان وبلىسىنا قاراستى سايرام اۋدانى اقبۇلاق اۋىلىنىڭ ماڭىندا ورنالاسقان وقۋ-كۋرستىق كومبيناتىنىڭ جاڭا پوليگونى الاڭىندا ءوتتى. ەپيدەميالىق تالاپتاردى ساقتاي وتىرىپ, اشىق اسپان استىندا وتكەن بىلىكتىلەر باسەكەسىنىڭ سوڭعى سىنىندا بۇعان دەيىنگى ءوزارا ىرىكتەۋلەردەن سۇرىنبەي وتكەن قىزمەتكەرلەر باق سىنادى. اتاپ ايتقاندا, فينالدىق بايقاۋدا 15 كونكۋرستىق ماماندىق بويىنشا 92 ۇمىتكەر سىنعا ءتۇستى.
سايىسقا قاتىسۋشىلار تارتىستى باسەكەدە تاباندىلىق تانىتىپ, ءوز تاجىريبەلەرىن كورسەتتى. بايقاۋدى باعالاۋشىلار القاسى مامانداردىڭ كاسىبي ماشىققا بەيىمدىلىگىن, كوماندالىق جۇمىس ىستەۋ تاكتيكاسىن, تەوريا مەن تاجىريبەنى قاتار مەڭگەرۋىن, جىلدامدىق پەن توزىمدىلىگىن – جارىستىڭ نەگىزگى تالابى رەتىندە باعالادى.
بايقاۋ كوميسسياسىنا توراعالىق ەتكەن «ينتەرگاز ورتالىق ازيا» اق باس ديرەكتورىنىڭ ءبىرىنشى ورىنباسارى باحتيار ءىزباساروۆ جۇمىسشىلاردى ىنتالاندىرۋعا ارنالعان «ۇزدىك مامان» بايقاۋى جىل سايىن اۋقىمىن كەڭەيتىپ, جاس ماماندارعا تاجىريبەلىك تۇرعىدان تولىسۋعا سەپ بولعانىن اتاپ ءوتتى.
– ءداستۇرلى بايقاۋ پاندەمياعا بايلانىستى بىلتىر وتكەن جوق. جوبانى بيىل قايتا جانداندىرعان جايىمىز بار. بۇل ەل ايماقتارىنداعى مامانداردى ءبىر الاڭعا جيناپ بىلىگىن شىڭداۋعا جەتەلەيتىن, ءوز كاسىبىن سۇيۋگە ىنتالاندىراتىن ەرەكشە باستاما. گازشىلار قاۋىپتى نىساندارعا قىزمەت كورسەتەتىندىكتەن ءار قىزمەتكەردىڭ بىلىكتىلىگى ءبىز ءۇشىن وتە ماڭىزدى. بايقاۋ ارقىلى مامانداردىڭ شەبەرلىك دەڭگەيى ارتا تۇسەدى. ال ولاردىڭ جۇمىس ساپاسى تۇتىنۋشىلارعا گازدى ۇزدىكسىز تاسىمالداۋدى قامتاماسىز ەتۋگە مۇمكىندىك بەرەدى. كونكۋرس بىزگە ەڭ مىقتى ماماندارىمىزدى جانە سوعان قاراي ءالسىز تۇستارىمىزدى دا سارالاپ بەردى. ماسەلەن, قاراعاندى وقۋ-كومبيناتىنىڭ ماماندارىنىڭ تەحنيكالىق قاۋىپسىزدىك بويىنشا كوبىرەك ۇيرەنۋى قاجەتتىگىن بىلدىك. ەندى وندا كاسىپوداق كوميتەتى تاراپىنان جاتتىعۋ قۇرالدارى الىنىپ بەرىلەدى. مۇندا جۇمىسشىلار ءجيى جاتتىعىپ, كەلەسى بايقاۋدا ۇزدىك ناتيجە كورسەتەدى دەپ سەنەمىز. بايقاۋ بارىسىندا قاتىسۋشىلاردىڭ ىنتاسى مەن بەلسەندىلىگىن بايقادىم. ولار تاجىريبەدە وزدەرىنىڭ جاقسى دايىندىقتارىن كورسەتتى, – دەيدى بايقاۋ توراعاسى.
«ەلەكتر گازبەن دانەكەرلەۋشى» «تەحنولوگيالىق كومپرەسسورلار ءماشينيسى», «جەلىلىك قۇبىر جۇرگىزۋشىسى», «گاز تاراتۋ ستانساسىنىڭ وپەراتورى» سىندى جالپى سانى 15 اتالىم بويىنشا وربىگەن بايقاۋدا ۇزدىك دەپ تانىلعاندار قوماقتى سىيلىقتارعا يە بولىپ, ءار اتالىمدا ءۇش جۇلدەگەر انىقتالىپ وتىردى.
جەڭىمپازداردى ماراپاتتاۋ راسىمىندە «ەلەكتر گازبەن دانەكەرلەۋشى» اتالىمىندا كوش باسىنان كورىنگەن تارازدىق سەرىك ەشقالوۆتى اڭگىمەگە تارتتىق. بۇل جارىسقا العاش رەت قاتىسقانىن ايتقان سەرىك العان اسەرىمەن ءبولىستى. «حالىققا تىكەلەي قىزمەت ەتەتىن بولعاندىقتان ءبىزدىڭ قىزمەتىمىز ءاردايىم ءمىنسىز بولۋعا ءتيىس. كەز كەلگەن توسىن جايعا دايىن بولۋ, ءوز ءىسىمىزدى بۇگە-شۇگەسىنە دەيىن ءبىلۋ باستى تالاپ. كومپانيا باسشىلىعى وسىنى ۇنەمى نازارىمىزعا سالىپ وتىرادى. وسى مەكەمەدە جۇمىس ىستەپ جاتقانىما ءۇش جىلدان استى. بۇگىنگى بايقاۋدا جيعان تاجىريبەمدى ساراپقا سالىپ, ەلىمىزدىڭ تۇكپىر-تۇكپىرىنەن كەلگەن ارىپتەستەرىممەن تانىستىم. مۇنداي جوبالار ءبىزدى قاناتتاندىرادى», دەيدى ۇزدىك مامان.
ءسوز ورايى كەلگەندە, «ۇزدىك مامان» بايقاۋى وتكەن وقۋ كۋرستىق كومبيناتىنىڭ جاڭا بازاسى تۋرالى ايرىقشا اتاي كەتكەن ءجون. ات شاپتىرىم اۋماقتى الىپ جاتقان نىسان ۋاقىت تالابىنا ساي جابدىقتالعان. پوليگون اۋماعىندا اۆتوماتتى گاز تاراتۋ ستانساسى, شكافتىق گاز رەتتەۋ تورابى, گاز قۇدىعى بار وڭىرلىك گاز شارۋاشىلىعىنىڭ الاڭى, ءتىپتى, دانەكەرلەۋ بەكەتتەرى دە بار. ءبىر سوزبەن ايتقاندا, مۇندا ناعىز كاسىبي مامانداردى دايارلاۋعا بارلىق قولايلى جاعداي جاسالعان. كەڭ تىنىستى وقۋ بولمەلەرى, تاجىريبەگە قاجەتتى ماكەتتەر, ترەناجەرلار مەن قيماداعى جابدىقتىڭ تابيعي ۇلگىلەرى نىساننىڭ اجارىن اشىپ تۇر. جىل سايىن 48 لاۋازىم جانە ءتۇرلى ماماندىق بويىنشا 10 مىڭ قىزمەتكەر وقىتىلادى دەپ جوسپارلانعان.
