قازىرگى ۋاقىتتا كونكۋرستىق ىرىكتەۋدىڭ ءاربىر كەزەڭىنىڭ ءادىل ءارى اشىق ءوتۋى قامتاماسىز ەتىلگەن. بۇل اشىقتىق ىرىكتەۋدىڭ ءبىرىنشى كەزەڭى – تەستىلەۋدەن باستالادى. تەستىلەۋدىڭ وبەكتيۆتىلىگىن قامتاماسىز ءوتۋ ءۇشىن ونى تاپسىرۋ زالىندا ۇزدىكسىز ۆيدەوباقىلاۋ جۇرگىزىلەدى. ءاربىر كومپيۋتەر تەستىلەۋ پروتسەسسىن جازاتىن ۆەب-كامەرامەن جابدىقتالعان. «ب» كورپۋسىنىڭ مەملەكەتتىك اكىمشىلىك لاۋازىمدارىنا ورنالاسۋعا ۇمىتكەرلەر بوس لاۋازىمنىڭ ساناتىنا سايكەس قازاقستان رەسپۋبليكاسىنىڭ مەملەكەتتىك ءتىلى مەن زاڭنامالارىن بىلۋگە ارنالعان تەستىلەۋدەن وتەدى. تەستىلەۋدەن وڭ ناتيجەمەن وتكەن ۇمىتكەرلەر كەلەسى كەزەڭ – جەكە قاسيەتتەرىن باعالاۋعا جىبەرىلەدى. بۇل باعالاۋ تەستىلەۋ نىسانىندا جۇرگىزىلەدى جانە ارنايى دايىندىقتى قاجەت ەتپەيدى.
ىرىكتەۋدىڭ شەشۋشى كەزەڭىندە ۇمىتكەرلەر كونكۋرستىق كوميسسيامەن ۇيىمداستىرىلعان اڭگىمەلەسۋگە قاتىسادى. اڭگىمەلەسۋ بارىسىندا ولار بوس لاۋازىمنىڭ وكىلەتتىلىكتەرىن ەسكەرە وتىرىپ ازىرلەنگەن سۇراقتارعا جاۋاپ بەرەدى. سونداي-اق كەيبىر ساناتتار ءۇشىن ەسسە جازۋ قاراستىرىلعان.
زاڭناماعا ەنگىزىلگەن وزگەرىستەرگە سايكەس اڭگىمەلەسۋ كانديداتتىڭ قالاۋى بويىنشا قاشىقتىق بەينەبايلانىس قۇرالدارى ارقىلى جۇرگىزىلۋى مۇمكىن. بۇل كارانتين جاعدايىندا جانە الىس وڭىرلەردە ورنالاسقان ۇمىتكەرلەر ءۇشىن وتە ىڭعايلى ءتاسىل بولىپ تابىلادى. كونكۋرستىق كوميسسياسى جۇمىسىنىڭ اشىقتىلىعى مەن وبەكتيۆتىلىگىن قامتاماسىز ەتۋ ءۇشىن ونىڭ وتىرىسىنا بايقاۋشىلار شاقىرىلادى. زاڭناماعا ەنگىزىلگەن جاڭاشىلدىقتارعا سايكەس بايقاۋشى رەتىندە قازاقستاننىڭ 18 جاسقا تولعان ازاماتتارى, ونىڭ ىشىندە مەملەكەتتىك قىزمەت ىستەرى جونىندەگى ۋاكىلەتتى ورگاننىڭ قىزمەتكەرلەرى قاتىسا الادى. ياعني ەلىمىزدىڭ كەز كەلگەن ازاماتى قالاۋى بويىنشا كونكۋرستاردىڭ وبەكتيۆتى ءوتۋىن قاداعالاي الادى. بۇل ورايدا بايقاۋشىلار ءتيىستى جادىنامامەن تانىسىپ, قول قويادى. سونىمەن قاتار ولار مەملەكەتتىك ورگاننىڭ باسشىلىعىنا, سونداي-اق ۋاكىلەتتى ورگانعا كونكۋرستىق كوميسسيانىڭ جۇمىسى تۋرالى وزدەرىنىڭ پىكىرلەرىن جازباشا تۇردە بەرە الادى. كونكۋرس وتكىزۋ بارىسىندا ساراپشىلاردى شاقىرۋعا جول بەرىلەدى. ساراپشى رەتىندە كونكۋرس جاريالاعان مەملەكەتتىك ورگاننىڭ قىزمەتكەرى بولىپ تابىلمايتىن, بوس لاۋازىمنىڭ فۋنكتسيونالدىق باعىتتارىنا سايكەس وبلىستاردا, سونىڭ ىشىندە عىلىم سالاسىندا جۇمىس تاجىريبەسى بار ادامدار, سونداي-اق پەرسونالدى ىرىكتەۋ جانە جوعارىلاتۋ بويىنشا ماماندار, باسقا مەملەكەتتىك ورگانداردىڭ مەملەكەتتىك قىزمەتشىلەرى, پارلامەنت جانە ءماسليحاتتاردىڭ دەپۋتاتتارى قاتىسا الادى.
قازىرگى ۋاقىتتا وبلىسىمىزداعى جەرگىلىكتى اتقارۋشى ورگانداردا مەملەكەتتىك قىزمەت لاۋازىمدارىنىڭ سانى 3 484 بىرلىكتى قۇرايدى. وسى جىلى 404 بوس لاۋازىمعا كونكۋرس جاريالانعان. وعان قاتىسقان 501 كانديداتتىڭ ىشىندە 266-سى كونكۋرستىق كوميسسيانىڭ وڭ ناتيجەسىن العان. بۇگىنگى كۇنى كونكۋرستىق كوميسسيانىڭ وتىرىستارى تۇگەل بايقاۋشىلار مەن ساراپشىلاردىڭ, دەپارتامەنت قىزمەتشىلەرىنىڭ قاتىسۋىمەن وتۋدە. سوڭعى ۋاقىتتا مەملەكەتتىك قىزمەتتى تاڭداعان ازاماتتار سانىنىڭ وسكەندىگى بايقالادى. مىسالى, 2021 جىلدىڭ ءبىرىنشى جارتىجىلدىعىندا مەملەكەتتىك اكىمشىلىك قىزمەتكە ورنالاسۋعا تەستىلەۋگە 602 ازامات قاتىسقان بولسا, سوڭعى 3 اي ىشىندە 515 ازامات قاتىسقان.
كادرلىق جوسپارلاۋدىڭ ماڭىزدى مىندەتتەرىنىڭ ءبىرى مەملەكەتتىك قىزمەتكە جاستاردى تارتۋ بولىپ تابىلادى. وسى ماقساتتا دەپارتامەنتتىڭ تاراپىنان حالىق اراسىندا مەملەكەتتىك قىزمەتكە ورنالاسۋ ونى وتكەرۋ بويىنشا اقپاراتتىق-ءتۇسىندىرۋ جۇمىسى تۇراقتى جۇرگىزىلۋدە. ولاردىڭ قاتارىندا بوس لاۋازىمدار جارمەڭكەلەرى, مەملەكەتتىك ورگاندارمەن وتكىزىلەتىن اشىق ەسىك كۇندەرى, كەزدەسۋلەر, ت.ب. بار.
رايحان براتاەۆا,
مەملەكەتتىك قىزمەت ىستەرى اگەنتتىگى اقمولا وبلىسى بويىنشا دەپارتامەنتى مەملەكەتتىك قىزمەت باسقارماسىنىڭ باسشىسى
