قوعام • 18 قازان، 2021

حالىق سانى تۋرالى جاڭا دەرەكتەر جاريالاندى

444 رەت كورسەتىلدى

ۇلتتىق ستاتيستيكا بيۋروسى 2021 جىلدىڭ قاڭتار-تامىزىنداعى قازاقستانداعى دەموگرافيالىق احۋال تۋرالى جاڭا دەرەكتەردى جاريالادى، دەپ حابارلايدى Egemen.kz.

«2021 جىلى 1 قىركۇيەكتەگى جاعداي بويىنشا قازاقستان حالقىنىڭ سانى 19 ميلليون 42،1 مىڭ ادام، ونىڭ ىشىندە قالا حالقى - 11 ميلليون 287،4 مىڭ (59،3 پايىز)، اۋىل حالقى - 7 ميلليون 754،7 مىڭ ادام (40،7 پايىز). 2020 جىلدىڭ 1 قىركۇيەگىمەن سالىستىرعاندا حالىق سانى 257،1 مىڭ ادامعا نەمەسە 1،4 پايىزعا ءوستى»، دەپ حابارلادى.

2021 جىلعى قاڭتار-تامىزدا حالىقتىڭ تابيعي ءوسىمى 2020 جىلعى قاڭتار-تامىزبەن (162،5 مىڭ ادام) سالىستىرعاندا 10،1 پايىزعا ءوستى جانە 178،9 مىڭ ادام بولدى. تابيعي ءوسىمنىڭ جالپى كوەففيتسيەنتى 1000 تۇرعىنعا شاققاندا 14،14 پايىز بولادى.

تۋعاندار مەن قايتىس بولعاندار سانى

2021 جىلعى قاڭتار-تامىزدا دۇنيەگە كەلگەندەر سانى 296،5 مىڭ ادام بولسا، بۇل 2020 جىلعا قاراعاندا 8،4 پايىزعا ارتىق (273،4 مىڭ ادام). تۋدىڭ جالپى كوەففيتسيەنتى 1000 ادامعا 23،44-كە ساي كەلەدى.

وسى كەزەڭدە قايتىس بولعانداردىڭ سانى 117،6 مىڭ ادام، بۇل 2020 جىلعى قاڭتار-تامىزعا قاراعاندا 6 پايىزعا ارتىق (111 مىڭ ادام). ءولىمنىڭ جالپى كوەففيتسيەنتى 1000 ادامعا شاققاندا 9،3-كە ساي كەلەدى.

2021 جىلدىڭ قاڭتار-تامىز ايلارىندا ءبىر جاسقا دەيىنگى 2345 نارەستە قايتىس بولدى. 2020 جىلدىڭ وسى كەزەڭىندە 2129 نارەستە قايتىس بولدى. ءولىم-ءجىتىم 10،1 پايىزعا ارتتى. نارەستەلەر ءولىمىنىڭ كوەففيتسيەنتى 1000 دۇنيەگە كەلگەن ادامعا 7،91 بولادى.

كوشىپ كەلگەندەردىڭ سانى

كوشى-قون قىزمەتى ورگاندارىنىڭ دەرەكتەرى بويىنشا، 2021 جىلعى قاڭتار-تامىزدا ەلگە كەلگەندەر سانى - 6339 ادام، ەلدەن كەتكەندەر سانى - 22685 ادام، كوشى-قون تەپە-تەڭدىگى 16346 ادام بولادى.

تمد ەلدەرىنەن كەلگەندەردىڭ ۇلەسى 84،1 پايىزدى، كوشىپ كەتكەندەردىڭ ۇلەسى ميگرانتتاردىڭ جالپى سانىنىڭ 86،1 پايىزىن قۇرادى.

رەسپۋبليكا شەگىندە كوشىپ كەلگەندەر سانى 7،3 پايىزعا ۇلعايدى.

قازاقستان ىشىندە ازاماتتار الماتى، نۇر-سۇلتان، شىمكەنت جانە ماڭعىستاۋ وبلىستارى اراسىندا اۋىسادى.

سوڭعى جاڭالىقتار

ۇقساس جاڭالىقتار