ء«بىز بۇگىندە مەشىتتەرىمىزگە ءبىلىمدى, تاجىريبەلى جاس عالىمداردى يمامدىق قىزمەتكە تاعايىنداپ جاتىرمىز. حامزات قاجىمۇرات ۇلى شام ولكەسىندە ءبىلىم الىپ, وسى وبلىستاعى مەشىتتە, قازاقستان مۇسىلماندارى ءدىني باسقارماسىنىڭ ورتالىق اپپاراتىندا, ەلوردامىزداعى «سادۋاقاس قاجى عىلماني» مەشىتىندە جۇمىس ىستەدى. وسى وڭىردە دە وزىنە جۇكتەلگەن قىزمەتتى ابىرويمەن اتقارادى دەپ سەنەمىن» دەدى ناۋرىزباي قاجى تاعان ۇلى.
باس ءمۇفتي وسىعان دەيىن وبلىستا باس يمام بولعان كەنجەتاي دۇيسەنبايعا العىس ايتىپ, ريزاشىلىق نيەتىن جەتكىزىپ: ء«سىزدىڭ ءدىني سالاداعى مول تاجىريبەڭىزدى ەسكەرىپ, ءدىني باسقارماعا قىزمەتكە قابىلدادىق» دەدى.
يگى ءىس-شارادا مەشىت اقساقالدارى يمامدارعا باتاسىن بەرىپ, دۇعا جاسادى.
