كوروناۆيرۋس • 15 قازان، 2021

بقو-دا سانيتارلىق قاداعالاۋ شارالارى كۇشەيتىلدى

78 رەت كورسەتىلدى

باتىس قازاقستان وبلىسىندا كورشىلەس رەسەيدە كوروناۆيرۋس جۇقتىرعانداردىڭ كوبەيۋىنە بايلانىستى شەكارادا سانيتارلىق قاداعالاۋ شارالارى كۇشەيتىلدى، دەپ حابارلايدى Egemen.kz.

بقو سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى مۇحامعالي ارىسپاەۆتىڭ وڭىرلىك كوممۋنيكاتسيالار قىزمەتى الاڭىندا وتكەن بريفينگىدە ءمالىم ەتكەنىندەي، قازىرگى كەزدە مەملەكەتتىك شەكارادا سانيتارلىق ەپيدەميولوگ ماماندار كۇشەيتىلگەن رەجيمدە جۇمىس ىستەۋدى جالعاستىرىپ وتىر.

ونىڭ ايتۋىنشا، 1 قازاننان بەرى مەملەكەتتىك شەكارادان 455 جولاۋشى انىقتاماسىز وتكەن. پتر ادىسىمەن الىنعان تەست بۇل ادامداردا كوروناۆيرۋس جوقتىعىن كورسەتتى. ال حالىقارالىق جۇك تاسىمالىمەن اينالىساتىن، انىقتاماسى بولماعان 1089 جۇرگىزۋشىنىڭ بىرەۋىنەن كوروناۆيرۋس تابىلدى.

ەپيدەميولوگيالىق جاعدايدى باعالاۋ ماتريتساسى بويىنشا سارى ايماقتا تۇرعان وبلىستا قازان ايىندا 758 ادامنىڭ ىندەت جۇقتىرعانى انىقتالدى. سونىڭ ىشىندە 436-سى (58%) جرۆي بەلگىلەرىمەن تەكسەرىلسە، 206-سى (27%) بۇرىن اۋىرعاندارمەن بايلانىستا بولعان. 108-ءى (14%) پروفيلاكتيكالىق ماقساتتا، 8-ءى (1%) ەپيدەميولوگيالىق قاداعالاۋ كەزىندە قارالعان. بۇلاردىڭ باسىم كوپشىلىگى – ۆاكتسينا الماعاندار.

جاس ەرەكشەلىكتەرى بويىنشا كوروناۆيرۋس جۇقتىرۋشىلار 41-60 جاس ارالىعىندا (208) كوپ بولىپ وتىر. سوڭعى اپتادا الدىڭعىمەن سالىستىرعاندا، اۋرۋ جۇقتىرۋ كورسەتكىشى 6،1 پايىزعا (391-دەن 367-گە) تومەندەدى.

«1 قازاننان بەرى 135 وقۋشى جانە 31 پەداگوگتان كوروناۆيرۋس تابىلدى. سونداي-اق كوللەدجدەردە 8، جوو-دا 8 ستۋدەنت تىركەلدى. كۇنى بۇگىن 8 مەكتەپتە 11 سىنىپتىڭ وقۋشىلارى مەن مۇعالىمدەرىن ءۇي كارانتينىنە كوشىرۋ تۋرالى 10 قاۋلى شىعارىلدى»، دەپ ءتۇسىندىردى م.ارىسپاەۆ.

سوڭعى جاڭالىقتار

ۇقساس جاڭالىقتار