عىلىم • 15 قازان، 2021

تۇرسىن جۇرتباي تاريحتا جاسىرىن بولعان قاسىرەت پاراقتارىن اقتاردى – كوشەرباەۆ

بۇل تۋرالى مەملەكەتتىك حاتشى قىرىمبەك كوشەرباەۆ پروفەسسور تۇرسىن جۇرتبايدىڭ 70 جىلدىق مەرەيتويىنا ارنالعان «ەلدىك ۇستانىم جانە تاۋەلسىزدىك نىساناسى» عىلىمي-تاجىريبەلىك كونفەرەنتسياسىندا ايتتى، دەپ جازادى Egemen.kz.

دانا مىرزاقادىر

«تاريحتى تۇگەندەۋ، ۇلتتىق رۋحانيات ءۇشىن مەحناتتى ءىس. كوز مايىن تاۋىسىپ، جىلدار بويى ارحيۆتەردە وتىرىپ ەڭبەك ەتۋگە ەكىنىڭ ءبىرىنىڭ، ەگىزدىڭ سىڭارىنىڭ قاجىرى جەتە بەرمەيدى. ول ءۇشىن اسا تاباندىلىق كەرەك، شىدامنىڭ شەگىن كورسەتەر، ءتوزىمدى تۇگەل تاۋىسار، اۋىر جۇمىستىڭ جاۋاپكەرشىلىگىن سەزەتىن ادام عانا اتقارا السا كەرەك»، دەدى كوشەرباەۆ.

مەملەكەتتىك حاتشى جۇرت جۇمىسىنا جانىن سالىپ ىستەيتىن ازاماتتاردىڭ ءبىرى جەتپىستىڭ جوتاسىنا كوتەرىلىپ وتىرعان تۇرسىن جۇرتباي ەكەنىن ايتتى.

«تۇرسىن جۇرتباي العاشقىدا «قوڭىر قاز» (1978)، «جۇرەگiمدە جۇمىر جەر» (1980) جىر كىتاپتارىمەن اقىن رەتىندە تانىلدى. «زامانداسىم، سىرلاسىم» وچەركتەر جيناعىن شىعاردى. ادەبي ورتاعا دەندەپ ساليقالى سىني ماقالالارىمەن ءسىڭىستى. قاليبەك قۋانىشباەۆ تۋرالى «دارا تۇلعا» ماقالاسى دا وقىرماننىڭ وڭ باعاسىن الدى. كەيىنىرەك عىلىمي-تانىمدىق دەرەكتى شىعارمالار جولىنا ءتۇسىپ، زەرتتەۋشىلىك قىزمەت اتقاردى. ارحيۆتەردى اقتاردى، سارعايعان گازەت-جۋرنالداردان تاريحي تىڭ دەرەكتەردى اشتى»، دەدى كوشەرباەۆ.

كوشەرباەۆ تۇرسىن جۇرتباي بۇعان دەيىن جاسىرىن بولعان قاسىرەت پاراقتارىن اقتارعانىن ايتتى.

«15 جىلدان استام ۋاقىت بويى عىلىمي ىزدەنىس جۇرگىزىپ، تىڭ دەرەكتەردى عىلىمي اينالىمعا ەنگىزدى. مەملەكەت باسشىسىنىڭ جارلىعىمەن ساياسي قۋعىن-سۇرگىن قۇرباندارىن اقتاۋ بويىنشا كوميسسيا قۇرىلدى. قازىر كوميسسيا شەتەلدىك ارحيۆتەردە دە جۇمىس ىستەپ جاتىر»، دەدى ول.

كونفەرەنتسياعا زيالى قاۋىم وكىلدەرى مەن قالا باسشىلىعى، پرەزيدەنت اكىمشىلىگىنىڭ وكىلدەرى، اقىن، جازۋشىلار قاتىستى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز