بيىل كورمەگە كەلگەن ەكسپونەنتتەردىڭ 60%-ى شەتەلدىكتەر. ساراپشىلار بۇل حالىقارالىق بيزنەس قاۋىمداستىقتىڭ ءبىزدىڭ ەلىمىز اشاتىن مۇمكىندىكتەرگە دەگەن جوعارى قىزىعۋشىلىعى مەن سەنىمىن كورسەتەدى دەپ ەسەپتەيدى. اۋقىمدى جوبانىڭ اشىلۋ سالتاناتىندا يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك كاماليەۆ ۇكىمەت باسشىسى اسقار ءماميننىڭ قۇتتىقتاۋ حاتىن وقىپ بەردى.
«قازاقستان ەۋرازيا قۇرلىعىنىڭ ماڭىزدى كولىك جەلىلەرىنىڭ ورتاسىندا ورنالاسا وتىرىپ, ازيا مەن ەۋروپا اراسىنداعى ترانزيتتىك كوپىر مەن سەنىمدى سەرىكتەس ەكەنىن كورسەتتى. مۇنى كورمە مەن كونفەرەنتسياعا قاتىسۋشىلاردىڭ حالىقارالىق قۇرامى دالەلدەيدى. «Translogistica Kazakhstan-2021» حالىقارالىق كورمەسى ترانزيتتىك-كولىك الەۋەتىن دامىتۋعا, ۇزاقمەرزىمدى جانە ءوزارا ءتيىمدى سەرىكتەستىك قاتىناستاردى ودان ءارى نىعايتۋعا ۇلەس قوساتىنىنا سەنىمدىمىن», دەلىنگەن قۇتتىقتاۋدا.
«TransLogistica Kazakhstan- 2021» كورمەسى ورتالىق ازيا وڭىرىندە بيزنەس ارىپتەستىكتىڭ اۋقىمىن كەڭەيتۋ ارقىلى جاڭا ونىمدەر مەن قىزمەتتەردى ىسكە قوسۋ الەۋەتىن ارتتىرىپ وتىر. ءىس-شاراعا قاتىسۋشى تاراپتار ءوزارا تاجىريبە الماسىپ, ترانزيتتىك باعىتتى ودان ءارى جانداندىرۋ ماسەلەلەرىن بىرلەسە تالقىلادى. پاندەميا كەزەڭى كولىك دالىزدەرىنىڭ الەۋمەتتىك قاجەتتىلىگى مەن ەكونوميكالىق تيىمدىلىگىنىڭ ماڭىزىن كورسەتىپ بەردى. بۇل ەلىمىزدەگى ينۆەستيتسيالىق تارتىمدىلىقتى كۇشەيتۋگە دە ىقپال ەتكەنى ءمالىم.
«قازاقستان كولىك سالاسىن جانە كولىك دالىزدەرىنىڭ ترانزيتتىك الەۋەتىن دامىتۋ ءۇشىن زور كۇش-جىگەر جۇمساۋدا. ۇكىمەت پەن يندۋستريا جانە ينفراقۇرىلىمدىق دامۋ مينيسترلىگى بىرقاتار سالالىق باعدارلامانى ىسكە اسىردى, سالانىڭ قۇقىقتىق نەگىزى قالىپتاستى, كولىك قىزمەتتەرىن كورسەتۋ ءۇشىن قولايلى باسەكەلەستىك ورتا قۇرىلدى. سوڭعى 15 جىلدا ەلىمىزدىڭ كولىك سالاسىنا شامامەن 35 ملرد دوللار سالىندى», دەپ اتاپ ءوتتى ۆيتسە-مينيستر ب.كاماليەۆ.
جۇك تاسىمالدارىنىڭ كەدەرگىسىز ءوتۋى ءۇشىن ترانزيتتىك دالىزدەردى جاڭعىرتۋعا ەرەكشە كوڭىل بولىنەدى. بۇگىندە قازاقستان ارقىلى 11 حالىقارالىق ترانزيتتىك ءدالىز وتەتىن بولسا, ونىڭ 5-ەۋى تەمىر جول جانە 6-ۋى اۆتوموبيل جولدارىنا تيەسىلى. رەسپۋبليكالىق, وبلىستىق جانە اۋداندىق ماڭىزى بار اۆتوموبيل جولدارىنىڭ جالپى ۇزىندىعى شامامەن 100 مىڭ شاقىرىم, ال تەمىر جولدىڭ ۇزىندىعى 21 مىڭ شاقىرىمدى قۇرايدى.
قازاقستانداعى 20 اۋەجايدىڭ 18-ءى يكاو تالاپتارىنا سايكەس دەپ تانىلعان. بيىل 2-11 تامىز ارالىعىندا وتكىزىلگەن ICVM شەڭبەرىندە يكاو ۇشۋ قاۋىپسىزدىگىنىڭ حالىقارالىق ستاندارتتارىنا سايكەستىك دەڭگەيى (84%-عا دەيىن) ارتىپ وتىر. يكاو-نىڭ وبەكتيۆتى باعالاۋى سالاداعى رەفورمالاردىڭ وڭ اسەرىن كورسەتەدى دەيدى ماماندار.
