سۇحباتتاسۋشىلار قازاقستاننىڭ بۇۇ-مەن ىنتىماقتاستىعىن ودان ءارى نىعايتۋ ماسەلەلەرىن تالقىلادى.
كەزدەسۋدە 2030 جىلعا دەيىنگى ورنىقتى دامۋ سالاسىنداعى كۇن ءتارتىبى كەڭىرەك قوزعالدى.
«قازاقستاندا ۇلتتىق باعدارلامالاردىڭ نەگىزگى پارامەترلەرى بۇۇ-نىڭ ورنىقتى دامۋ ماقساتتارىمەن (ودم) سايكەستەندىرىلدى. قازىرگى تاڭدا ولاردىڭ 80 پايىزى ەلدىڭ ستراتەگيالىق قۇجاتتارىنا ينتەگراتسيالاندى. قازاقستان 2022 جىلى ورنىقتى دامۋ جونىندەگى جوعارى دەڭگەيدەگى ساياسي فورۋمدا وسى سالاداعى جەتىستىكتەرگە ارنالعان ءوزىنىڭ ەكىنشى ەرىكتى ۇلتتىق شولۋىن ۇسىنادى. ورنىقتى دامۋ ماقساتتارىن ۇلتتىق دەڭگەيدە ىسكە اسىرۋدا قازاقستان پارلامەنتى نەگىزگى ءرول اتقارادى», دەدى اسقار شاكىروۆ.
سونداي-اق قازاقستان پرەزيدەنتى قاسىم-جومارت توقاەۆتىڭ بۇۇ قامقورلىعىمەن قازاقستاندا ورتالىق ازيا ەلدەرى مەن اۋعانستان ءۇشىن ودم-نىڭ وڭىرلىك ورتالىعىن قۇرۋ تۋرالى باستاماسىن ىسكە اسىرۋدىڭ ماڭىزى اتاپ ءوتىلدى.
اۋعانستانداعى احۋالدى تالقىلاۋ كەزىندە بۇۇ باس حاتشىسىنىڭ كومەكشىسى قازاقستان پرەزيدەنتىنىڭ الماتىعا بۇۇ-نىڭ اۋعانستانعا جاردەمدەسۋ بويىنشا ميسسياسىنىڭ قاشىقتان جۇمىس ىستەيتىن كەڭسەسىن ۋاقىتشا ورنالاستىرۋ تۋرالى شەشىمىن جوعارى باعالادى.
«الماتىعا بۇۇ-نىڭ اۋعانستانعا جاردەمدەسۋ بويىنشا ميسسياسىن ۋاقىتشا ورنالاستىرۋ تۋرالى شەشىم قازاقستاننىڭ وڭىرلىك جانە جاھاندىق قاۋىپسىزدىكتى قامتاماسىز ەتۋدەگى ءرولىن ايقىن كورسەتتى. ءبىزدىڭ ەلىمىز اۋعانستانعا گۋمانيتارلىق كومەك كورسەتۋگە ارنالعان حالىقارالىق ىستەرگە ءوز ۇلەسىن قوسۋعا دايىن», دەدى ۆيتسە-سپيكەر.
سونىمەن قاتار اسقار شاكىروۆ بۇۇ-نىڭ مامانداندىرىلعان مەكەمەلەرىن دامۋشى ەلدەردە بىرلەسكەن جوبالاردى ىسكە اسىرۋ ارقىلى دامۋ ءۇشىن رەسمي كومەك (درك) سالاسىنداعى ۋاكىلەتتى ورگان KazAID اگەنتتىگىمەن ىنتىماقتاسۋعا شاقىردى. قازاقستان سوڭعى 20 جىلدا شەت مەملەكەتتەرگە دامۋ ءۇشىن رەسمي كومەككە بالاما ماقساتتار ءۇشىن 540 ميلليون دوللاردان استام قاراجات بولگەن.
ءوز كەزەگىندە بۇۇ وكىلى قازاقستاننىڭ قول جەتكىزگەن جەتىستىكتەرىنە توقتالىپ ءوتتى. سونداي-اق, قازاقستاننىڭ تاۋەلسىزدىك العالى رەتسەپتيەنت ەلدەن دونور ەلگە اينالعانىنا جانە ادام دامۋىنداعى جەتىستىكتەرىنە ەرەكشە نازار اۋداردى. سونداي-اق, ميريانا سپولياريچ ەگگەر قازاقستاندا جۇرگىزىلىپ جاتقان وزگەرىستەردىڭ تيىمدىلىگىن اتاپ ءوتىپ, ادام قۇقىقتارى بۇۇدب ساياساتى مەن دامۋ باعدارلامالارىنىڭ ماڭىزدى اسپەكتىسىنە اينالاتىنىن تىلگە تيەك ەتتى.
بۇدان باسقا, تاراپتار ودم-عا قاتىستى بۇۇ قۇرىلىمدارى مەن ەقىۇ پارلامەنتتىك اسسامبلەياسى اراسىنداعى ىنتىماقتاستىقتى دامىتۋ كەلەشەگىن تالقىلادى. ايتا كتەيىك, قازاقستاندىق سەناتور ەقىۇ پارلامەنتتىك اسسامبلەياسىنىڭ ۆيتسە-پرەزيدەنتى جانە ودم بويىنشا اسسامبلەيانىڭ ارنايى وكىلى رەتىندە وكىلدىك ەتەدى.
