جيىن بارىسىندا نۇرعيسا داۋەشوۆ ەكى مەملەكەت اراسىنداعى مادەني قارىم-قاتىناستىڭ تامىرى تەرەڭدە ەكەنىن, كەيىنگى جىلدارى پاندەمياعا قاراماستان, ىنتىماقتاستىق جوعارى دەڭگەيدە دامىپ كەلە جاتقانىن اتاپ ءوتتى. سونداي-اق 2004 جىلى ماسكەۋدە اباي قۇنانباي ۇلىنىڭ, ال ەلوردادا الەكساندر پۋشكيننىڭ ەسكەرتكىشى اشىلعانىن ايتتى.
ولگا ياريلوۆا مادەنيەت كۇندەرى اياسىنداعى ءىس-شارالار قازاقستان مەن رەسەي اراسىنداعى دوستىق پەن ىنتىماقتاستىقتى نىعايتۋعا جانە دامىتۋعا باستايتىن جول ەكەنىن جەتكىزىپ, ەكى تاراپتى كونە مادەني مۇرالار مەن ۇلتتىق قۇندىلىقتاردى ساقتاۋعا ۇلەس قوسۋعا شاقىردى.
ايتا كەتەيىك, «ۆولوگدا شىلتەرى» كورمەسىنىڭ ماقساتى – ورىس حالقىنىڭ ساندىك-قولدانبالى ونەرىن, تابيعاتى مەن ءداستۇرىن, تاريحىن ايقىنداپ كورسەتۋ. كورمەگە قاتىسۋشىلار ورىس حالقىنىڭ مادەنيەتىمەن تانىسىپ, كورمەگە قويىلعان ءتۇرلى تۋىندىلاردى كورە الادى. سونىمەن قاتار ن.ۆەسەلوۆا, م.پالنيكوۆا, ا.راكچەەۆ سىندى قولونەر شەبەرلەرىنىڭ قولىنان شىققان ورىس حالقىنىڭ ۇلتتىق كيىمدەرى ۇسىنىلعان. كورمە 17 قازانعا دەيىن جالعاسادى.
بۇدان بولەك اپتالىق اياسىندا قازاق مەملەكەتتىك سيمفونيالىق وركەسترىمەن بىرگە رەسەيلىك جەتەكشى ورىنداۋشىلاردىڭ قاتىسۋىمەن گالا-كونتسەرت ءوتتى.
اتالعان ءىس-شاراعا مادەنيەت جانە سپورت ءمينيسترى اقتوتى رايىمقۇلوۆا, رەسەي فەدەراتسياسى مادەنيەت ءمينيسترىنىڭ ورىنباسارى ولگا ياريلوۆا, قازاقستان رەسپۋبليكاسىنداعى رەسەي فەدەراتسياسىنىڭ توتەنشە جانە وكىلەتتى ەلشىسى الەكسەي بوروداۆكين قاتىستى.
«قازاقستانداعى رەسەي مادەنيەتى كۇندەرى اياسىندا قازاق مەملەكەتتىك سيمفونيالىق وركەسترىنىڭ قاتىسۋىمەن جەتەكشى رەسەيلىك ورىنداۋشىلاردىڭ ونەر كورسەتۋى بيىل ەلىمىزدەگى جارقىن وقيعالاردىڭ ءبىرى بولارى انىق. بۇگىندە مادەنيەت پەن رۋحانيات ەكى ەل اراسىنداعى دوستىقتىڭ ارتۋىنىڭ تۇعىرى ىسپەتتەس بولىپ وتىر. مادەني بايلانىستار ءبىزدىڭ دوستاستىعىمىزدىڭ باستى ىنتالاندىرۋشى كۇشى. مادەني بايلانىستاردىڭ دامۋىنىڭ تاريحي پروتسەسىندە, ولاردىڭ پايدا بولۋىنان باستاپ دامىعان زاماناۋي فورمالارعا دەيىن, ءسوزسىز ۇلكەن ءوزارا اسەر ەتەدى», دەدى مينيستر.
ءوز كەزەگىندە ولگا ياريلوۆا وسى اپتادا وتەتىن ءىس-شارالار ەكى ەل اراسىنداعى قارىم-قاتىناستى, اسىرەسە مادەنيەت سالاسىنداعى ىنتىماقتاستىقتى نىعايتۋعا سەپتىگىن تيگىزەتىنىن ايتتى. سونىمەن قاتار ەكى مەملەكەت اراسىنداعى مادەني بايلانىستى دامىتۋ مەن نىعايتۋ جولىندا بىرلەسىپ ءىس-شارالار وتكىزۋگە دايىن ەكەندىگىن جەتكىزدى.
گالا-كونتسەرتتىڭ ديريجەرى – سولتۇستىك وسەتيا رەسپۋبليكاسىنىڭ ەڭبەك سىڭىرگەن ءارتىسى زاۋربەك گۋگكاەۆ بولدى. ءىس-شارادا اننا اگلاتوۆا (سوپرانو), ۆلاديسلاۆ كۋپريانوۆ (باريتون), ۆلاديمير ماگومادوۆ (كونتراتەنور), كونستانتين ەمەليانوۆ (فورتەپيانو), الەكساندر رامم (ۆيولونچەل), گايك كازازيان (سكريپكا), اناستاسيا تيۋرينا (بالالايكا), ال ەلىمىزدەن «استانا وپەرا» مەملەكەتتىك وپەرا جانە بالەت تەاترىنىڭ جەتەكشى سوليستەرى – قازاقستاننىڭ ەڭبەك سىڭىرگەن قايراتكەرى مەدەت چوتاباەۆ (تەنور) پەن حالىقارالىق بايقاۋلاردىڭ لاۋرەاتى تاتيانا ۆيتسينسكايا (مەتستسو-سوپرانو) ونەر كورسەتتى. كورەرمەن نازارىنا ورىس كومپوزيتورلارىنىڭ وپەرالارىنان بەلگىلى اريالار, رومانستار مەن زاماناۋي اۆتورلاردىڭ شىعارمالارى ۇسىنىلدى.
ايتا كەتەيىك, قازاقستانداعى رەسەيدىڭ مادەنيەت كۇندەرى ەكى مەملەكەت اراسىنداعى مادەني-گۋمانيتارلىق بايلانىستاردى ارتتىرىپ, ءداستۇرلى ىنتىماقتاستىقتى نىعايتۋعا ارنالعان.
