پىكىر • 13 قازان، 2021

اقىلى اقىل ايتقىشتار

183 رەت كورسەتىلدى

تۇنەۋ كۇنى قىم-قۋىت تىرلىكتىڭ قۋىس-قۋىسىمەن، جاۋىن-جاۋىننىڭ اراسىندا جۇمىس ورنىمىزعا جاقىن جەردەگى كىتاپ دۇكەنىنە باس سۇقتىق. كەيدە قالتاڭدا ار­تىق اقشاڭ بولماسا دا سول ءبىر جىپ-جىلى دانا دا مومىن، كەمەل دە كەرەمەت مەكەنگە جالقى ءسات بولسىن جولاي كىرىپ-شىققىڭ كەلىپ تۇرادى عوي. ءبىز دە سول ساعىنىشپەن، سول اڭسارمەن اقىلدىڭ اسىل قازىناسى ۇيىلگەن اق زەر بولمەنىڭ ەسىگىنە ەندىك.

ادەتتەگىدەي الدىڭىزدان جان تىنىشتىعى قۇشاعىن ايقارا اشىپ، نەبىر عۇلاما عالىمدار مەن ۇلى شايىرلار، كلاسسيك ءسوز زەرگەرلەرى قارسى الادى. سۇلۋ ءسوز بەن تەرەڭ ويدىڭ تەلەگەيى بىردەن يىرىمىنە تارتادى. كوزدىڭ جاۋىن الارداي تانىس تا تۋىس، قامقور دا دوس جازۋلار دەرەۋ سىرلاسا باستايدى.

الايدا ءبىز ايتىپ وتىرعان وسىناۋ قىمبات تا  قاستەرلى مەكەننىڭ سورەلەرى وسى كۇندە بۇرىنعىداي سالماعىن جوعالتىپ العانداي كورىنەدى. ارينە، كلاسسيكا ەشقاشان قۇنىن جويمايتىنى بەلگىلى عوي، بىراق سول الىپتاردىڭ ورنىن بۇگىندە باسقاشا مازمۇنداعى مۇقاباسى عانا قىمبات، سىرتى جىلتىر، ءىشى سىلدىر مىڭ سان پسيحولوگيالىق كىتاپ ابدەن ىعىستىرىپ العان. كوپكە توپىراق شاشۋدان اۋلاقپىز، دەگەنمەن تابان استىندا تابىسقا قول جەتكىزەمىز دەپ تاقىر كەدەيدىڭ ونسىز دا تام-تۇم اقشاسىن قاعىپ ءتۇسۋدى عانا ماقسات ەتكەن تىم پىسىقاي «موتيۆاتورلاردىڭ» مول ونىمدەرى ءدال قازىر جاۋىننان كەيىنگى ساڭىراۋقۇلاقتاي جاھاندى جاپپاي جاۋلاپ العان.

البەتتە، تابان اقى، ماڭداي تەرىمەن بيىك جەتىستىككە جەتكەن بيزنەس وكىلدەرىنىڭ كىتاپ جازعانى دۇرىس. البەتتە، ءومىردىڭ كوپ بەلەسىن كۇرەسە ءجۇرىپ باعىندىرعان، باقىتقا جەتۋدە باسقان ءىزى جاس ۇرپاققا شىن ۇلگى تۇلعالار اقىل ايتسا ارتىق ەمەس. بىراق ءبىزدى ويلاندىراتىن باسقا جاعداي. جالپى، وسى كۇنى  جازۋ، سىزۋدىڭ اۋىلىنا ات ءىزىن سالماعانداردىڭ دۇرىس ءماتىن قۇراۋ تۋرالى ءدارىس وقۋى،  ەكى ءسوز­دىڭ باسىن قوسا الادى ەكەم دەپ ەرتەڭىنە شەشەن­دىك جايلى شەبەرلىك سىنىبىن اشۋى قانشا­لىقتى دۇرىس؟ «اڭقاۋ ەلگە ارامزا مولدا» دەمەك­شى، ۇيقىسىنان ءبىر-اق كۇندە «ادامزات!» دەپ اي­عاي­لاپ ويانعان سول اقىلمانداردىڭ الگىندەي ءابجىل قيمىلدارىنا قارايسىڭ دا تاڭعالاسىڭ...

جاڭاعى ءبىز ايتقان سورەلەردىڭ كوبىندە بۇگىن وسى تاقىلەتتەس وقۋلىقتار، باقىتقا جەتۋدىڭ توتە جولىنا تۋرا تۇسىرەتىن ترەنەر­لەردىڭ ەڭبەكتەرى سىرەسىپ تۇر. ءبىز جالپى مۇنداي اۆتورلاردى جەردەن الىپ، جەرگە سالۋدان اۋلاقپىز. ءبىزدى نەگىزىنەن «قازىرگى تاڭدا جۇرت نەگە موتيۆاتسياعا ءۇيىر» دەگەن سۇراق قانا الاڭداتادى. تۇتاس ۇلت نەگە ۇلى دەپرەسسياعا ءتۇسىپ وتىر؟ جالپى، سۇرانىس بولماعان جاعدايدا تاۋار دا وندىرىلمەس ەدى. دەمەك، الگىندەي موتيۆاتسيالىق كىتاپتارعا، اقىلى پسيحولوگيالىق كۋرستار مەن ءتۇرلى ۆەبينارعا مۇقتاج حالىق كوپ. مۇنىڭ سوڭى استە، جاقسىلىققا اپارمايدى.

اتالعان ماسەلەگە الەۋمەتتانۋشى ماماندار باستاپ، مەملەكەت نازار اۋدارۋى كەرەك. الەۋمەتتىك زەرتتەۋلەر جۇرگىزىلىپ، حالىقتىڭ بۇل كوڭىل كۇيى بەيجاي قالماۋعا ءتيىس. سەبەبى ەشكىم مول تابىسقا ادال ەڭبەكسىز جەتكەن ەمەس. ەشكىم ءبىر كىتاپ وقىپ باقىتتى بولىپ كەتپەيدى. ول باقىت، ول وتباسى قۇندىلىعى – كەشەگى اتا-بابالارىمىزدان قالعان تەرەڭ تانىم، زەردەلى پايىم-پاراساتپەن، ادەبى مول  ادەت-عۇرىپپەن، سانامىزدا سالتانات قۇرۋى كەرەك سالت-داستۇرلەرىمىزبەن بىرگە بولعاندا عانا باسىمىزعا قونادى.  

بۇگىنگى بۇل ء«بىرتۇرلى» ءۇردىس – تازا باتىسقا ەلىكتەۋشىلىكتەن تۋىنداپ وتىر. امەريكاڭىز كوۋچينگتەر كوشىنىڭ ارباسىنان سوناۋ الپىسىنشى جىلدارى ءتۇسىپ قالعان. جالپى، كۇيەۋدى قۇرمەتتەۋگە ەشقانداي كوۋچتىڭ كەرەگى جوعىن، ەنەنى سىيلاۋعا ەشقانداي ەڭبەكتىڭ قاجەت ەمەستىگىن تۇسىنە الماۋىمىزعا سونشا نە كەدەرگى دەگەن ساۋال تۋادى؟ ارينە، جارنا­مانىڭ جاقسى جەرى دە بار شىعار، الايدا ءدال قازىرگى تاڭدا جارعا جىعار جاعى باسىم بولىپ تۇر. الەۋمەتتىك جەلىنىڭ بەتىن اۋليەلەر باسىپ العان وسىناۋ كۇردەلى كەزەڭدە ۇيدە جۇمىسسىز وتىرعان جاس وتباسىلار نەبىر  اقىلى نەگىزدە اقىل ايتقىشتارعا اربالىپ-اق قالىپ جاتىر.

كەيدە ويلايسىڭ، سوناۋ سوعىس جىلدارىندا، اشتىقتا، قۋعىن-سۇرگىندە ءجۇرىپ تە تۇسپەگەن مۇنداي تەرەڭ دەپرەسسياعا ايدىڭ-كۇننىڭ امانىندا قازاق بالاسى قاپىلىستا قالاي ءتۇستى؟ ءيا، بىرنەشە سەبەبى بولۋى مۇمكىن. ەڭ الدىمەن، تاۋەلسىزدىگىمىزدى العان وتىز جىل ىشىندە ادامگەرشىلىككە، پاراساتتىلىققا، ويعا، سوزگە جەتەلەيتىن رۋحانيات سالاسىن، ادەبيەت پەن مادەنيەت وكىلدەرىن قوعامنان الشاق ۇستادىق. بىرنەشە بۋىن ۇرپاق توقسانىنشى جىلداردىڭ توقىراۋىندا كىتاپحانانى ەمەس، بازاردى جاعالادى. ناتيجەسىندە، كىتاپ وقىمايتىن قوعام قالىپتاستى. جالپى، كىتاپتىڭ نە ەكەنىن، ناعىز كىتاپ دەگەننىڭ قانداي بولا­تى­نىن، ءتىپتى كىتاپ وقۋدىڭ مادەنيە­تىن دۇرىس بىلمەيتىن سول كوپشىلىك ءبىز الگىندە ايتقان الەم-جالەم، قىزىل-جاسىل، ءتۇرلى-ءتۇستى ونىمدەردى وزدەرىنە تالعاماي ازىق ەتۋدە. ارينە، جانىمىزعا جاناشىرلىقپەن ۇڭىلگەنىمىز دۇرىس، بىراق باي عىلىم، كەمەل كەمەڭگەرلەردىڭ كەڭەسىنە ابدەن سۋارىلعان تاعىلىمى تەرەڭ وي ەڭبەكتەرىن تۇتىنعانىمىز دۇرىس.

 

سوڭعى جاڭالىقتار

الماتى تۇرعىندارى سۋسىز قالدى

ايماقتار • بۇگىن، 15:57

كانەلونى اۋىر شايقاس كۇتىپ تۇر

كاسىپقوي بوكس • بۇگىن، 12:18

حاۆي باس باپكەر بولا ما؟

فۋتبول • بۇگىن، 11:25

دوللار باعاسى تاعى كوتەرىلدى

ەكونوميكا • بۇگىن، 11:23

ۇقساس جاڭالىقتار