ۇلتتىق قۇراما 2021/2022 جىلعى ماۋسىمدى بەيجىڭدە الەم كۋبوگىنەن باستايدى. وسىعان وراي باس باپكەر مادىعالي قارسىبەكوۆ وليمپيادا قارساڭىندا جولداما ءۇشىن جانىن سالاتىن سپورتشىلار ەسىمىن اتاعان بولاتىن. جاڭا ماۋسىمدا 12 سپورتشى شورت-ترەكتەن الەم كۋبوگى كەزەڭدەرىنە قاتىسىپ, جولدامانى ساراپقا سالادى.
ەلوردادا ءوتىپ جاتقان وقۋ-جاتتىعۋ جيىندارىندا باپكەر باستى ماقسات - تورتجىلدىقتىڭ باستى دوداسىنا جولداما جەڭىپ الۋ كەرەك ەكەنىن دە جاسىرمادى.
«قازىرگى تاڭدا ەڭ ءبىرىنشى ماقساتىمىز, جوسپارىمىز - وليمپيادا ويىندارىنا ليتسەنزيا الۋ. ليتسەنزياعا يە بولعاننان كەيىن وليمپياداعا دايىندىققا كىرىسەمىز», دەدى مادىعالي قارسىبەكوۆ.
ايتا كەتەرلىگى, شورت-ترەكشىلەر 16 قازانعا دەيىن ەل استاناسىنداعى الاۋ مۇز ايدىنىندا دايىندىعىن جالعاستىرادى.
