قازاقستان • 13 قازان، 2021

سۋ تۇتىنۋدى باقىلاۋ جۇيەسى قاراستىرىلۋى كەرەك - نىعماتۋلين

52 رەت كورسەتىلدى

ءماجىلىس توراعاسى نۇرلان نىعماتۋلين سۋ تۇتىنۋ كولەمىن ءتيىمدى پايدالانۋعا باعىتتالعان قولدانىستاعى باقىلاۋ جۇيەسىن ساقتاۋعا مۇمكىندىك بەرەتىن زاڭنامالىق نورمانى قولدادى، دەپ حابارلايدى Egemen.kzء ماجىلىستىڭ ءباسپاسوز قىزمەتىنە سىلتەمە جاساپ. 

ءماجىلىستىڭ جالپى وتىرىسىندا ەنەرگيا ۇنەمدەۋ جانە ەنەرگيا تيىمدىلىگى ماسەلەلەرى بويىنشا زاڭنامالىق تۇزەتۋلەردى ءبىرىنشى وقىلىمدا تالقىلاۋ بارىسىندا دەپۋتاتتار يندۋستريا جانە ينفراقۇرىلىمدىق دامۋ مينيسترلىگىنىڭ زاڭ جوباسىنان مەملەكەتتىك ەنەرگەتيكالىق ءتىزىلىم سۋبەكتىلەرىنىڭ ۋاكىلەتتى مەملەكەتتىك ورگانعا سۋدى تۇتىنۋ مەن ىسىراپ ەتۋ دەرەكتەرىن ۇسىنۋ مىندەتىن كوزدەيتىن نورمانى الىپ تاستاۋ ماسەلەسىن كوتەردى.

ازىرلەۋشى ءتىزىلىم سۋبەكتىلەرىنىڭ سۋ تۇتىنۋ كولەمىن جىل سايىن ازايتۋدى قامتاماسىز ەتۋ مىندەتىن الىپ تاستاۋدى ۇسىنادى.

دەپۋتاتتاردىڭ پىكىرىنشە، بۇل نورمالاردى قولدانىستاعى زاڭناماعا قايتارۋ قاجەت.

ءماجىلىس سپيكەرى سۋ تاپشىلىعىنا الىپ كەلەتىن كليماتتىق وزگەرىستەر جاعدايىندا بۇل ماسەلەنىڭ وزەكتىلىگىن اتاپ ءوتتى.

«ەگەر مينيسترلىكتىڭ ۇسىنىسى قابىلدانسا، وندا ىشكى سۋ تۇتىنۋ جۇيەسىنەن، باسقاشا ايتقاندا، قالالىق سۋ ارناسى جۇيەسىنەن سۋدى تۇتىناتىن مىڭداعان ونەركاسىپتىك كاسىپورىندار، كوممەرتسيالىق جانە بيۋدجەتتىك ۇيىمدار باقىلاۋدان تىس قالادى. بۇل دەگەنىمىز قالاي، سۋدى ۇتىمدى پايدالانۋ كەرەك پە، جوق پا دەگەن سۇراق اشىق قالادى. بۇعان جول بەرۋگە بولمايدى. سوندىقتان زاڭ جوباسىندا سۋ تۇتىنۋدى باقىلاۋ جۇيەسى قاراستىرىلۋى ءتيىس»، دەپ اتاپ ءوتتى نۇرلان نىعماتۋلين.

دەپۋتاتتاردىڭ سۋ تۇتىنۋدى باقىلاۋدىڭ قولدانىستاعى جۇيەسىن ساقتاۋ تۋرالى ۇسىنىسىن قولداي وتىرىپ، ءماجىلىس توراعاسى جۇمىس توبىنا ەكىنشى وقىلىمعا دەيىن بۇل ماسەلەنى زاڭ جوباسىن ازىرلەۋشىلەرمەن پىسىقتاۋدى تاپسىردى.

تۇتاستاي العاندا، زاڭ جوباسى جالپى ىشكى ءونىمنىڭ ەنەرگيا سىيىمدىلىعىن تومەندەتۋ بويىنشا ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ سالاسىندا جۇرگىزىلىپ جاتقان ساياساتتىڭ تۇپكىلىكتى ناتيجەسىنە قول جەتكىزۋگە باعىتتالعان.

سوڭعى جاڭالىقتار

تەڭىز تۇيسىگى

ونەر • كەشە

اڭشىلىق – اسىل ونەر

رۋحانيات • كەشە

ۇقساس جاڭالىقتار