جيىن بارىسىندا قۇرىلىمدىق بولىنىستەر مەن ۆەدومستۆولاردىڭ باسشىلارى قر پرەزيدەنتى قاسىم-جومارت توقاەۆتىڭ تاپسىرمالارىن ورىنداۋ بارىسى جانە ىشكى ىستەر ورگاندارىنىڭ 9 اي ىشىندە اتقارىلعان جەدەل-قىزمەتتىك جۇمىسىنىڭ قورىتىندىلارى تۋرالى باياندادى.
وتىرىستا جۇمىستىڭ «سەرۆيستىك مودەلىنە» كوشۋ, پوليتسيا قىزمەتتەرىنىڭ اشىقتىعىن, ايقىندىعىن جانە قولجەتىمدىلىگىن قامتاماسىز ەتۋ, سونداي-اق حالىقپەن «كەرى بايلانىس ورناتۋ» ماسەلەلەرى كەڭىنەن قارالدى.
ەرلان تۇرعىمباەۆ «جۇرتقا جاقىن پوليتسيا» قاعيداتىن ىسكە اسىرۋدىڭ, قوعامدىق ءتارتىپتى ساقتاۋ ءۇشىن مودۋلدىك بەكەتتەر مەن ۋچاسكەلىك پۋنكتتەر جەلىسىن دامىتۋدىڭ ماڭىزدىلىعىن اتاپ ءوتتى. قابىلدانعان شارالاردىڭ ناتيجەسىندە اۋىر قىلمىستار, دەنساۋلىققا اۋىر زيان كەلتىرۋ, قاراقشىلىق, توناۋ, زورلاۋ, ۇرلىق, مال ۇرلىعى, بۇزاقىلىق سانىنىڭ ازايۋىنا قول جەتكىزىلدى. وڭ ۇردىستەردىڭ ىشىندە كامەلەتكە تولماعاندار اراسىنداعى قۇقىق بۇزۋشىلىقتار 30 %-عا, ماس كۇيىندە قۇقىق بۇزۋشىلىق جاساۋ 21 %-عا, قوعامدىق ورىندار مەن كوشەلەردە ورىن العان قۇقىق بۇزۋشىلىقتاردىڭ ۇشتەن بىرگە ازايدى.
بىرقاتار وڭىرلەردە وتباسىلىق-تۇرمىستىق قىلمىس ايتارلىقتاي تومەندەدى. مينيستر ينتەرنەت-الاياقتىق سانىنىڭ وسۋىنە دە نازار اۋداردى. ازاماتتاردىڭ سەنىمدەرىن پايدالانا وتىرىپ, قىلمىسكەرلەر الداۋدىڭ ءارتۇرلى تاسىلدەرىن قولدانادى. كوبىنەسە ۇرلانعان قاراجات شەتەلگە ەلەكتروندىق تولەم جۇيەلەرى ارقىلى شىعارىلادى.
«وسىعان بايلانىستى قر ءىىم تمد-عا قاتىسۋشى مەملەكەتتەردىڭ ىشكى ىستەر مينيسترلەرى كەڭەسىنىڭ وتىرىسىندا ەلدەن تىس, شەكتەس مەملەكەتتەر اۋماعىندا جاسالاتىن وسىنداي قىلمىستارعا قارسى ءىس-قيمىل تەتىگىن بىرلەسىپ ازىرلەۋ تۋرالى باستاما جاسادى. الاياقتىق ءىس-ارەكەتتەر مەن ءتۇرلى قارجى پيراميدالارىنىڭ قىزمەتىنىڭ كەسىرىنەن ازاماتتارعا ايتارلىقتاي ماتەريالدىق زيان كەلتىرىلەدى, بۇل شۇعىل شارالاردى تالاپ ەتەدى», دەدى ۆەدومستۆو باسشىسى.
ەسىرتكى قىلمىسىنا قارسى كۇرەس جونىندەگى جۇمىس جەكە قارالدى. ەسىرتكى قۇرالدارىن عالامتور ارقىلى جارنامالاۋ جانە تاراتۋ ءۇشىن جاۋاپكەرشىلىك كۇشەيتىلدى. زاڭسىز اينالىمعا جەدەل دەن قويۋ جانە ونى بولدىرماۋ ءۇشىن ەسىرتكىنىڭ جاڭا تۇرلەرىنە تىيىم سالىنادى, ەسىرتكىنىڭ قىلمىستىق جاۋاپتىلىق تۋىندايتىن «كريمينالدىق سالماعى» تومەندەتىلەدى.
جول قاۋىپسىزدىگىن قامتاماسىز ەتۋ ماسەلەسى دە كۇن تارتىبىنە قويىلدى. جول اپاتتارىنىڭ نەگىزگى سەبەبى - جۇرگىزۋشىلەردىڭ جول قاۋىپسىزدىگىن ساقتاماۋى. سونداي-اق, جاياۋ جۇرگىنشىلەردىڭ ءتارتىبى مەن قاۋىپسىزدىگى ماسەلەسىنە ەرەكشە نازار اۋدارۋ قاجەت. سەبەبى جالپى جكو-نىڭ, ونىڭ ىشىندە ولىممەن اياقتالعان جانە كوپ ادام جاراقاتتانعان جكو سانىنىڭ ءوسۋى بايقالدى. وسىعان بايلانىستى ەرلان تۇرعىمباەۆ جولدارداعى قاۋىپسىزدىكتى باقىلاۋدى كۇشەيتۋدى, كوشە-جول جەلىسىنە تەكسەرۋ جۇرگىزۋدى, جول-پايدالانۋ قىزمەتتەرىنىڭ بۇزۋشىلىقتاردى جويۋدى ۇيىمداستىرۋدى, جول ينفراقۇرىلىمىنا جاۋاپتى مەملەكەتتىك ورگاندارمەن ءوزارا ءىس-قيمىلدى جانداندىرۋدى تاپسىردى.
سونىمەن قاتار, مينيستر بەينەباقىلاۋ جۇيەسىن كەڭەيتۋ, جول قوزعالىسى ەرەجەلەرىن بۇزۋدى اۆتوماتتى تۇردە تىركەۋ جۇيەسىن بەلسەندى قولدانۋ جانە اتالعان بۇزۋشىلىقتار ءۇشىن جازالاۋدىڭ بۇلتارتپاستىعى قاعيداتىن باسىم باعىت دەپ اتادى. ءبىرىنشى كەزەكتەگى مىندەتتەردىڭ ءبىرى - جەكە قۇرام اراسىندا زاڭدىلىق پەن ءتارتىپتى ساقتاۋ, كادر ساياساتىن جەتىلدىرۋ, قوعام مەن حالىقتىڭ سەنىمىنەن شىعاتىن پوليتسەيدىڭ «جاڭا فورماتىن» قۇرۋ.
