سوڭعى جىلدارى تابيعاتتىڭ مىنەزى كۇرت وزگەرىپ كەلەدى. قىس ىشىندە قار ەرىپ, جاڭبىر جاۋىپ, اۋىرتپالىق اڭ-قۇستىڭ دا القىمىنان الىپ تۇرعان جايى بار. وتكەن جىلى اۋزىنا ىلىگەر ازىق تاپپاي ابدەن ارىقتاعان, كوتەرەم كۇيگە تۇسكەن ەلىكتەردىڭ ەل شەتىنە ىلىگىپ, جول بويىن كەزىپ كەتكەنى الەۋمەتتىك جەلىلەردە تالاي مارتە كورسەتىلگەن. بۇل وقيعالار ۇلتتىق پاركتىڭ اۋماعىندا بولماسا دا, جالپى اڭ-قۇستىڭ باسىنا تونگەن ناۋبەتكە پارا-پار قيىنشىلىق.
پاركتە ورمان قۇندىزى, بۇركىت, تىرنا, مارال, بۇعى, ەلىك, قابان ءتارىزدى اڭ-قۇس كوپ-اق. اراسىندا سانى ازايىپ, جوعالۋدىڭ از-اق الدىندا تۇرعاندارى دا بار. بيىل كوكشەتاۋ توڭىرەگىندە عانا ەمەس, ەلىمىزدىڭ بار اۋماعىندا دەرلىك قۋاڭشىلىق بولدى. ايتسە دە, قىستا قار مول جاۋعاندىقتان پارك اۋماعىنداعى الاڭقايلارعا ءشوپ ءبىرشاما بىتىك شىقتى. دەمەك, تۇياقتى اڭنىڭ تەبىندەۋىنە مۇمكىندىك بار. تابيعي ازىقپەن قوسا, ۇجىم دايىنداعان ءشوپ, جەم, جاپىراق بۋمالارى قىستاپ شىعۋعا تولىق جەتەرلىك. ءسال تاراتىپ ايتساق, 302,1 توننا ساپالى ءشوپ جينالىپ الىنىپ, شومەلەگە سالىندى. 239,9 مىڭ دانا اڭ ازىعىنا ابدەن جارايتىن بالاۋسا جاپىراقتار بۋىلىپ, ارنايى جابدىقتالعان ورىنعا قويىلدى. الداعى ۋاقىتتا 50 تونناعا جۋىق استىق قالدىعىن جانە 1,4 توننا تۇز ساتىپ الۋ جوسپارلانۋدا.
ءسوز اراسىندا ۇلتتىق پارك اۋماعىن قۇستىڭ 219, سۇتقورەكتى اڭ-قۇستىڭ 51 ءتۇرى مەكەندەيتىنىن ايتار بولساق, جانۋارلار الەمىنىڭ قانشالىقتى مول ەكەنىن اڭعارار ەدىك. قىستىڭ قاتال سىنشى ەكەنىن تاعى ءبىر قايتالاپ ايتا وتىرىپ, سوڭعى ءجۇز جىلدا سۇتقورەكتىنىڭ 2, قۇستىڭ 5 ءتۇرى مۇلدە جوعالىپ كەتكەنىن ەسكە سالا كەتەيىك. ارينە, ۇلتتىق پارك اۋماعى قازىر كوزدىڭ قاراشىعىنداي كۇزەتىلەدى. سۋىق قارۋ ۇستاعان سۇعاناقتار زاڭنىڭ قاتالدىعىنان تايسالادى. ال قىس – ءسوزسىز قاتەر.
– جاز بويى پارك اۋماعىنداعى اڭ-قۇستى قىستان امان الىپ شىعۋ ءۇشىن جۇمىس ىستەدىك, – دەيدى ۇلتتىق پاركتىڭ باسشىسى ەربول ساعديەۆ. – 203 اڭ ازىقتاناتىن وتتىق, 34 الاڭقاي جابدىقتالدى. جەمشوپ قورىن ساقتايتىن 28 ارناۋلى ورىن جوندەۋدەن وتكىزىلدى. قۇستارعا ارنالعان 8 ازىق الاڭقايى بار. بۇرىنعىلارىن جوندەپ, وعان قوسا جاڭالارىن دا سالۋ ۇستىندەمىز.
ۇلتتىق پارك تامىلجىعان تابيعاتىمەن عانا ەمەس, سول تابيعاتتىڭ قويناۋىن مەكەن ەتەتىن ءارالۋان اڭ-قۇستارىمەن دە كورىكتى. دەمەك, سول بايلىقتىڭ مۇرتى بۇزىلماۋىن مۇقيات قاداعالاعان ءلازىم.
