كۇزدىڭ وڭمەنىڭنەن وتەر قارا سۋىعى قالتىراتقانىمەن, جۇرەكتى قۋانىش وتى جىلىتىپ تۇر. ول قۋانىش – اتا-باباسىنىڭ كىندىك قانى تامعان توپىراقتى اڭساپ الىستان جەتكەن قانداستاردى قارسى الۋ ءساتى. جۇردەك پويىزدان الدىمەن تومپاڭداپ بالا ءتۇستى. جاقسى ىرىمعا بالادىق: بالاقايدىڭ بولاشاعى اتاجۇرتىندا ءبۇر جارماق. اتباسار اۋدانى اكىمىنىڭ ورىنباسارى قۋانىش ومىرزاق ۇستىندەگى جىلى كۇرتەسىن شەشىپ الىپ كۇزگى ىزعاردان ءسال توڭازىعان بالانىڭ يىعىنا جاپتى. كۇرتە ەمەس, الىستان جەتكەن اعايىنعا دەگەن جالپاق جۇرتتىڭ ىستىق ىقىلاسى وسىلاي مەڭزەلىپ كورسەتىلگەندەي بولدى.
وبلىسقا تابان تىرەگەن وتباسىلاردىڭ قۇرامىندا 35 ادام بار. ولاردىڭ 21-ءى ەر-ازامات بولسا, 14-ءى ايەلدەر. ارالارىندا كىشكەنتاي نارەستە دە بار.
– «ەڭبەك» مەملەكەتتىك باعدارلاماسى اياسىندا قانداستارىمىزعا بارلىق جاعداي جاسالادى, – دەدى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى دينا احمەتجانوۆا. – تۇرعىن ءۇي ماسەلەسى دەمەۋشىلەردىڭ كومەگىمەن شەشىلمەك. جاڭا ورتاعا بەيىمدەلىپ كەتكەنشە تەولوگتەر مەن پسيحيلوگتەر كومەك كورسەتەدى.
لەيلا وزباكيدىڭ وتباسى كوكشەتاۋ قالاسىنداعى «نوۆوپەك» كومپانياسىنىڭ جاتاقحاناسىنا ورنالاستىرىپ, ەڭبەككە جارامدى ادامدار جۇمىسپەن قامتىلىپ, بالالارى «قارلىعاش» بالاباقشاسى مەن №18 ورتا مەكتەپكە باراتىن بولدى. اتباسارعا قۇرامىندا 12 ادامى بار احمادي موحامماد ءحانيفتىڭ وتباسى قونىستانباق. ولار مارينوۆكا اۋىلىنداعى 120 شارشى مەترلىك بەس بولمەلى ۇيدە تۇراتىن بولادى. بۋرابايعا بەت العان قانداستار كىندىكقاراعاي اۋىلىندا ىرگە تەۋىپ, شارۋا قوجالىقتارىندا جۇمىس ىستەمەك. قايماعى بۇزىلماعان قازاق اۋىلىنىڭ كەرەگەسى قانداستارمەن كەڭەيەتىن بولدى. دەرمان ماليحانىڭ وتباسى ساندىقتاۋ اۋدانىنىڭ ۆەسەلوە اۋىلىنا بەت الدى. ەرەسەكتەر «بايدالى» جاۋاپكەرشىلىگى شەكتەۋلى سەرىكتەستىگىنە ورنالاستىرىلادى. بالالارى قازاق تىلىندە ءتالىم-تاربيە بەرەتىن مەكتەپكە بەرىلەدى.
جۇمىسقا جارامدى اعايىنداردىڭ بارلىعى جۇمىسپەن قامتىلسا, مەكتەپ جاسىنداعى بالالارعا جالپى ءبىلىم بەرۋ قورى ارقىلى قاجەتتى كيىم-كەشەك, وقۋ قۇرالدارى بولىنەتىن بولدى. قيلى زاماندا شەكارا اسىپ, شەرمەندە بولعان قانداستارىمىزدىڭ بۇگىنگى ۇرپاعىنىڭ اتاجۇرتتا تامىر جايۋىنا بارلىق جاعداي جاسالماق.
