قوعام • 13 قازان، 2021

توي – وفلاين، جۋرناليستەر – ونلاين

83 رەت كورسەتىلدى

ەلدە ەپيدەميالىق جاعداي تۇ­راق­تال­دى. كارانتين شارالارى دا جۇم­سار­دى. بۇ­رىنعىداي قاتاڭ لوكداۋن جوق. ءتىپتى قا­زاقتىڭ تويىنا دا رۇقسات بەرىلدى. بىراق شە­نەۋنىكتەر مەن جۋرناليستەر ارا­سىن­دا­عى بايلانىس قانا ءالى ونلاين كۇ­يىندە تۇر.

كوروناۆيرۋس ەكپىنى ەلگە جەتپەي تۇرعان جايماشۋاق كەزدە كەيبىر شەندىلەردىڭ سۇراققا جاۋاپ بەرە الماي كىبىرتىكتەگەن، قازاق تىلىندە سويلەي الماي تۇتىققان، ودان قالا بەردى ماڭىزدى جيىنداردا ماۋ­جىراپ ۇيىقتاپ وتىرعان ساتتەرى اقپارات قۇرالدارى ارقىلى تالاي جالپاق جۇرتقا جاريا بولعانى ءمالىم. بۇل ەل الدىندا جۇرگەن شەندىلەردىڭ وزدەرىنە دە ساباق بولعانى انىق. ال كوروناۆيرۋستىڭ تارالۋىنا بايلانىستى كۇندەلىكتى ومىرىمىزگە كۇرت وزگەرىس ەندى. تىرشىلىكتى قامتاماسىز ەتەتىن توتەنشە قىزمەت وكىلدەرىنەن باسقاسى تۇگەل ونلاينعا كوشتى. جۋرناليستەر دە بۇرىنعىداي مينيستر، دەپۋتات، مەملەكەتتىك قىزمەتشىمەن بەتپە-بەت جۇزدەسىپ، سۇراعىن تىكە قويا الماي، ارماندا قالدى. باق وكىلدەرى مەن شەنەۋنىكتەر اراسىنداعى تىكەلەي بايلانىستىڭ ءۇزىلۋى، اسىرەسە كوروناۆيرۋستىڭ العاشقى جىلىندا ايرىقشا بايقالدى. ەلگە ەندى كەلگەن بەيمالىم اۋرۋدان ەسى شىققان ەل قالاي ەمدەلەرىن، ءدارى-دارمەكتى قايدان الاتىنىن بىلمەي ساسقالاقتادى. سانانى سانسىراتقان ساۋال كوپ، بىراق جاۋاپ جوق. سول كەزدە جۋرناليستەر مەن مەكەمەلەردىڭ ءباسپاسوز حاتشىلارى وتىراتىن الەۋمەتتىك جەلى چاتتارى تىپتەن دۇرلىگىپ كەتتى. «مەنىڭ سۇراعىما نەگە جاۋاپ جوق، ساۋالداردى نەگە ىرىكتەيسىزدەر؟ قالاعان سۇراقتارعا عانا جاۋاپ بەرىپ، قالعانىنا جاۋاپ جوق پا نە؟» دەگەن ارىپتەستەرىمىزدىڭ شاعىمى تولاستاماي جاتتى. مىنە، سول جىلدان باستاپ، جۋرناليستەر شەنەۋنىكتەردىڭ بەت-ءجۇزىن بەتپە-بەت كورۋ «باقىتىنان» قاعىلدى. ءالى كۇنگە مەملەكەتتىك ورگان وكىلدەرىمەن وتەتىن بريفينگ، ءباسپاسوز كونفەرەنتسيالارى، باسقا دا جيىندار تۇگەل قاشىقتان وتەدى. جۋرناليست شەنەۋنىككە قويار ساۋالىن تەك جازباشا جولدايدى. تىكەلەي ەفير كەزىندە مينيسترلىك وكىلدەرى كەلگەن سۇراقتىڭ بارىنە بىردەي جاۋاپ بەرە بەرمەيدى. شۋ دا وسىدان شىعادى. ۋاقىتتىڭ ازدىعىن سىلتاۋراتىپ، شەنەۋنىكتەر بەلگىلى ءبىر سۇراقتارعا عانا جاۋاپ بەرەدى. قالعانىنا «جازباشا جاۋاپ بەرەمىز» دەۋمەن شەكتەلەدى. قۇددى شەندىلەر وزدەرىنىڭ قولايىنا جاعاتىن ساۋالدارعا عانا جاۋاپ بەرىپ، «شىمبايىنا باتاتىن قيىن» سۇراقتاردى ادەيى ەلەمەي تاستايتىنداي سەزىلەدى. بۇل بۇل ما، ارىپتەستەرىمىز جاڭادان سايلانعان دەپۋتاتتاردى جىعا تاني قويمايدى. ويتكەنى ولار سايلانعالى – كارانتيندە. تەلەفونمەن عانا تىلدەسەتىنىمىز بار. كەزىگە الساق، ءبارىنىڭ اۋزىندا – ماسكا. «جاڭادان سايلانعان دەپۋتاتتار جۋرناليستەردىڭ سۇزگىسىنەن وتكەن جوق» دەپ ارىپتەستەرىمىزدىڭ ازىلدەيتىنى دە سوندىقتان.

جۋرناليستەر كوتەرىپ جۇرگەن وسى ماسەلە ۇكىمەتتىڭ، پارلامەنتتىڭ ءباسپاسوز حاتشىلارى وتىراتىن جۋرناليستەر چاتتارىندا ءالى كوتەرىلىپ كەلەدى. ءتىپتى ارىپتەستەرىمىز بيىلعى ءساۋىر ايىندا باق وكىلدەرىن مەملەكەتتىك ورگاندارعا كىرگىزۋ جونىندە پرەزيدەنت قاسىم-جومارت توقاەۆقا اشىق حات تا جولدادى. جاقىندا پرەمەر-ءمينيستردىڭ ورىنباسارى ەرالى توعجانوۆ قاتىسقان بريفينگتە ارىپتەستەرىمىز وسى ماسەلەنى تاعى كوتەردى. ونىڭ ايتۋىنشا، جۋرناليستەرگە قويىلعان كارانتيندىك شەكتەۋلەر تسەنزۋرا ەمەس جانە اقپاراتقا قول جەتكىزۋگە كەدەرگى بولىپ سانالمايدى. ۇكىمەتتە، پارلامەنتتە ءوتىپ جات­­قان بۇكىل وتىرىس ونلاين ترانسلياتسيالا­نا­دى. «اقپاراتقا قولجەتىمدىلىك بەتپە-بەت كەزدەسۋمەن شەكتەلمەيدى، وزگە دە تولىپ جاتقان مۇمكىندىكتەر بار. بۇل جازباشا ساۋال جولداۋ، جۋرناليستەردىڭ تىكەلەي حابارلاسۋى، سونداي-اق ونلاين كەزدەسۋلەر مەن بريفينگتەر، ەلەكتروندى ۇكىمەت پەن الەۋمەتتىك رەسۋرس­تار ارقىلى كەرى بايلانىس»، دەدى ول.

دەگەنمەن دە جۋرناليستەردىڭ ۆيتسە-پرەمەرگە قويعان سۇراعى قامشى بولدى ما، سودان كەيىن ورتالىق كوممۋنيكاتسيالار قىزمەتى بريفينگتى وفلاين رەجىمىندە وتكىزدى. بۇل – كوروناۆيرۋسقا بايلانىستى كارانتين شەكتەۋىنەن كەيىنگى وسى الاڭدا وتكەن العاشقى بەتپە-بەت جيىن بولدى.

البەتتە، جۋرناليستەر شەنەۋنىكتەردىڭ ءجۇزىن كورۋگە ەمەس، ولاردىڭ ءوز اۋزىنان سۇ­راقتارىنا جاۋاپ الۋعا، ساۋالىن تىكە قويۋعا اسىعىپ وتىر. سوندىقتان تەك جۋرناليستەرگە ەسىگى تارس جابىلعان پار­لا­مەنت پەن ۇكىمەت ءۇيى ء«جىبىپ»، ەسىگىن قايتا ايقارا اشادى دەگەن ۇمىتتەمىز. ايتپاقشى، نەبىر تۇلعالارمەن كەزدەسىپ، ءتۇرلى رەسمي جيىندارعا قاتىسىپ، اقپارات تاراتاتىن جۋرناليستەردىڭ بارلىعى دەرلىك كوروناۆيرۋسقا قارسى ۆاكتسينا العان. Ashyq قوسىمشاسىنداعى مارتەبەسى – جاسىل. دە­مەك، سانيتارلىق-ەپيدەميالىق جاعىنان دا بارلىق تالاپقا ساي كەلەدى.

سوڭعى جاڭالىقتار

تەڭىز تۇيسىگى

ونەر • كەشە

اڭشىلىق – اسىل ونەر

رۋحانيات • كەشە

ۇقساس جاڭالىقتار