«ۇلتتىق ەكونوميكا ءمينيسترى اسەت ەرعاليەۆ ەل ەكونوميكاسىنىڭ دامۋ كورسەتكىشتەرىن بايانداپ, قازاقستان ەكونوميكاسىندا سەنىمدى ءوسۋ بار ەكەنىن ايتتى. رەسپۋبليكادا بيىلعى جىلعى توعىز ايدا ينۆەستيتسيا ءوسىمى 15,1 پايىزعا ارتقان. شىمكەنت قالاسى ينۆەستيتسيالار تارتۋ بويىنشا وڭىرلەر اراسىندا العاشقى ورىندا كەلەدى. قالامىزدا وتكەن جىلدىڭ ءتيىستى كەزەڭىمەن سالىستىرعاندا ينۆەستيتسيا تارتۋ كورسەتكىشى 38,8 پايىزعا وسكەن. «بارلىق كورسەتكىشتەر بويىنشا وڭ ءوسۋ اقمولا, الماتى, جامبىل, قوستاناي وبلىستارىندا جانە شىمكەنت قالالارىندا بايقالۋدا», دەدى ءا.ەرعاليەۆ.
تۇرعىن ءۇيدى پايدالانۋعا بەرۋ بويىنشا بارلىق وڭىردە وڭ ءوسىم بايقالعان. ەسەپتى كەزەڭدە ەلىمىزدە 10,4 ملن شارشى مەتر تۇرعىن ءۇي پايدالانۋعا بەرىلگەن. شىمكەنت قالاسىندا بۇل كورسەتكىش وتكەن جىلمەن سالىستىرعاندا 11,4 پايىزعا وسكەن.
قالامىزدا تۇراقتى جانە ساپالى ەكونوميكالىق ءوسىمدى قامتاماسىز ەتۋدە ينۆەستيتسيالار تارتۋ بويىنشا بەلسەندى جانە ماقساتتى جۇمىستار جالعاسىن تاباتىن بولادى. وڭدەۋ ونەركاسىبى مەن قۇرىلىس سالاسىندا جوسپارلانعان ءوسۋ قارقىنى قامتاماسىز ەتىلىپ, ينفلياتسياعا قارسى شارالار كەشەنى ءتيىمدى جۇزەگە اسىرىلادى. حالىقتى ۆاكتسيناتسيالاۋ جانە كاسىپكەرلىكتى قولداۋ شارالارى ءتيىمدى ىسكە اسىرىلىپ, شيكىزاتتىق ەمەس ەكسپورتقا كەشەندى تۇردە قولداۋ كورسەتىلەدى.
