قر قورعانىس مينيسترلىگى ءباسپاسوز قىزمەتىنىڭ حابارلاۋىنشا, قولدانىستاعى بۇل ۇلگى ولارعا اعىمداعى تۇرعىن ءۇي تولەمدەرىن جيناقتاۋعا, يپوتەكالىق نەسيەگە تۇرعىن ءۇي ساتىپ الۋعا, جالعا العان تۇرعىن ءۇيدى تولەۋگە, تۇرعىن ءۇي قۇرىلىسىنا ۇلەستىك قاتىسۋ كەزىندە جارنالار ەنگىزۋگە, ءوز ءۇيىن سالۋعا مۇمكىندىك بەرەدى.
زاڭ جۇزىندە كۇنتىزبەلىك ەسەپپەن 20 جانە ودان دا كوپ جىل قىزمەت ەتكەن اسكەري قىزمەتشىلەر تۇرعىن ءۇيدى اقىسىز جەكەشەلەندىرە الادى نەمەسە اقشالاي وتەماقى الا الادى.
بۇل تۇزەتۋلەر قابىلدانعانعا دەيىن تۇرعىن ءۇي ماسەلەسىن شەشۋ 10 جىلدان استام, بىراق 20 جىلعا دەيىن ەڭبەك سىڭىرگەن اسكەري قىزمەتشىلەر ساناتى ءۇشىن پروبلەمالى بولعان ەدى. سول سەبەپتى اسكەري قىزمەتتەن بوساتىلعاننان كەيىن ولار ۇزاق ۋاقىت بويى جابىق اسكەري قالاشىقتاردا تۇرعىن ءۇيدى جەكەشەلەندىرۋ قۇقىعىنسىز ءومىر ءسۇردى. زاڭناماداعى وزگەرىستەر اسكەري زەينەتكەرلەرگە ايىرباستاۋ قۇقىعىن پايدالانۋ ارقىلى تۇرعىن ءۇيدى جەكەشەلەندىرۋگە مۇمكىندىك بەردى.
قورعانىس ءمينيسترىنىڭ ورىنباسارى گەنەرال-مايور مۇحامەدجان تالاسوۆتىڭ ايتۋىنشا, قىزمەتتىك تۇرعىن ءۇيدى مەملەكەتتىك تۇرعىن ءۇي قورىنان بولىنگەن پاتەرگە اۋىستىرعاننان كەيىن اسكەري زەينەتكەرلەر ونى قالدىق قۇنى بويىنشا جەكەشەلەندىرە الادى.
"سەمەي پوليگونىنداعى يادرولىق سىناقتاردان جانە ارال وڭىرىندەگى ەكولوگيالىق اپات سالدارىنان زارداپ شەككەن ادام مارتەبەسى بەرىلگەندەر تەگىن جەكەشەلەندىرۋ قۇقىعىنا يە. 30% باستاپقى جارنا تولەگەن جاعدايدا قالعان سومانى 10 جىلعا پايىزسىز تولەۋ دە قاراستىرىلعان", دەدى م. تالاسوۆ.
ەستەرىڭىزگە سالا كەتسەك, 2018 جىلى اسكەري قىزمەتتەن زاپاسقا شىعارىلعان 742 تۇلعا جابىق اسكەري قالاشىقتاردا تۇرعان. وسى ۋاقىت ارالىعىندا ولاردىڭ جارتىسى (371) قىزمەتتىك ءۇي-جايدى ەلىمىزدىڭ كەز كەلگەن قالاسىنداعى تۇرعىن ۇيگە اۋىستىردى.
ايتا كەتسەك, ەڭ كوپ سۇرانىسقا يە پاتەرلەر نۇر-سۇلتان, الماتى, سەمەي تالدىقورعان جانە تاراز قالالارىندا ورنالاسقان.
بوس تۇرعىن ءۇي قورى تۋرالى بارلىق اقپارات قورعانىس مينيسترلىگىنىڭ رەسمي سايتىندا ورنالاستىرىلعان. «تۇرعىن ۇيمەن قامتاماسىز ەتۋ» بولىمىندە قالالار بويىنشا بولمەلەر سانى, اۋدانى جانە تۇرعىن ءۇي قۇنى كورسەتىلگەن. بۇگىنگى تاڭدا الماستىرۋ ءۇشىن ۇسىنىلعان 134 قىزمەتتىك پاتەر بار.
اسكەري قىزمەتتەن زاپاسقا شىعارىلعان ادامداردى تۇرعىن ۇيمەن قامتاماسىز ەتۋ جۇمىستارى جالعاسۋدا.
