قارت ايەلگە كوپتەن كۇتكەن قۇجاتتارىن الۋعا اقتوبە وبلىسىنىڭ پوليتسەيلەرى كومەكتەستى. ونى مۇعالجار اۋدانىنىڭ پوليتسيا بولىمىنە شاقىرىپ, سالتاناتتى تۇردە جەكە كۋالىگى مەن گۇل شوقتارىن تابىستادى.
ودان وزگە زەينەتكەرگە ارنايى دايىندالعان ازىق-ت ۇلىك سەبەتى ۇسىنىلدى. لاريسا چەرنىشەۆانىڭ ايتۋىنشا, بۇعان دەيىن ول حقكو-عا جانە انىقتاما بولىمىنە جۇگىنگەن, وندا ايەلدى قۇقىقتىق مارتەبەسىن انىقتاۋ ءۇشىن اۋماقتىق كوشى-قون قىزمەتى بولىمشەسىنە جىبەرگەن.
– مەندە تۋ تۋرالى كۋالىك تە, ەل اۋماعىندا تۇراتىندىعىمدى راستايتىن قۇجات تا بولعان جوق. كوشى-قون قىزمەتىنىڭ قىزمەتكەرلەرى ءتيىستى ورگاندارعا وزدەرى سۇراۋ جىبەرىپ, قاجەتتى اقپارات الدى, قازاقستان رەسپۋبليكاسىنىڭ ازاماتتىعىنا جاتاتىندىعىمدى انىقتاي الدى. مەنىڭ ماسەلەمدى قىسقا مەرزىمدە شەشىپ بەرگەندەرىڭىز ءۇشىن راقمەت. مەن اقتوبە وبلىسى پوليتسيا دەپارتامەنتىنىڭ باسشىلىعىنا جانە ءىىم مينيسترىنە ريزاشىلىعىمدى بىلدىرەمىن, – دەپ اتاپ ءوتتى زەينەتكەر.
ەندى قارت ايەل بارلىق مەملەكەتتىك قىزمەتتەردى باسقا قازاقستاندىقتارمەن بىردەي پايدالانا الادى. جەكە باسىن كۋالاندىراتىن قۇجاتتارى جوق ازاماتتاردىڭ دەنساۋلىق ساقتاۋ, ءبىلىم بەرۋ سالاسىنداعى قىزمەتتەردى الۋدا, قاجەتتى جاردەماقىلار مەن زەينەتاقىلاردى رەسىمدەۋدە مۇمكىندىكتەرى شەكتەلىپ, رەسمي تۇردە جۇمىسقا ورنالاسا المايتىندىعىن اتاپ وتكەن ءجون.
وسىعان بايلانىستى پوليتسيا قۇجاتتارى جوق ازاماتتارعا قازاقستان رەسپۋبليكاسى ازاماتىنىڭ نەمەسە ازاماتتىعى جوق ادامنىڭ جەكە كۋالىگىن رەسىمدەۋ ءۇشىن تۇرعىلىقتى جەرى بويىنشا كوشى-قون قىزمەتىنە جۇگىنۋدى ۇسىنادى.
