قازاقستاندىقتار باسقا ەلدىڭ ازاماتتىعىن الماس بۇرىن قازاقستان رەسپۋبليكاسى ازاماتتىعىنان شىعۋعا ءتيىس. ول ءۇشىن 30 كۇن بۇرىن ىشكى ىستەر ورگاندارىنا باسقا مەملەكەتتىڭ ازاماتتىعىن الۋ تۋرالى حابارلاپ, جەكە كۋالىگىن تاپسىرۋلارى قاجەت. وكىنىشكە قاراي, كەيبىر شىعىسقازاقستاندىقتار بۇل ەرەجەنى ەلەمەيدى. قوس ازاماتتىق فاكتىلەرىنىڭ كوبەيۋى دە وسى سەبەپتى.
ماسەلەن, 1 قازاندا ءتارتىپ ساقشىلارى قازاقستاندا تۇرىپ جاتقان قىرعىز رەسپۋبليكاسىنىڭ ازاماتى ەكى ەلدىڭ كۋالىگىن قاتار پايدالانىپ كەلگەندىگىن انىقتاعان. 28 جاستاعى جىگىتتىڭ سەمەي – وسكەمەن اۋە رەيسىنە مىنەر تۇستا قوس ازاماتتىعى بارلىعى بەلگىلى بولعان.
ەكى ەلدىڭ ازاماتتىعىن قاتار ارقالاپ ءجۇرۋ زاڭعا تومپاق كەلگەنىمەن, ونىڭ بىرقاتار ءتيىمدى تۇستارى بار كورىنەدى. ايتالىق, كارانتيندىك شەكتەۋلەر كەزىندە مەملەكەتتىك شەكارالاردى كەدەرگىسىز كەسىپ وتۋگە بولادى. سونداي-اق توتەنشە جاعدايلار ورىن الا قالسا, شۇعىل ەمميگراتسيا جاساۋعا مۇمكىندىك بەرەدى. وسىنى بىلەتىن كەي ازاماتتار زاڭدى بەلدەن باسادى.
ال رەسەيدە تۇرىپ جاتىپ, قازاقستاننىڭ قاراجاتىن قالتاعا باسۋ زاڭعا سىيمايدى. بۇل جاعدايدى گلۋبوكوە اۋدانىنداعى كوشى-قون قىزمەتىنىڭ قىزمەتكەرلەرى اشكەرەلەگەن. 4 قازاندا زەينەتاقى تولەۋ جونىندەگى مەملەكەتتىك ورتالىقپەن سالىستىرۋ كەزىندە 19 جىل بۇرىن رەسەي فەدەراتسياسىنىڭ ازاماتتىعىن العان اۋدان ورتالىعىنىڭ 66 جاستاعى تۇرعىنى انىقتالدى. ەر ادام 16 جىل بويى رەسەيلىك زەينەتاقى الىپ, 2018 جىلى زەينەتكەرلىك جاسقا تولعاننان كەيىن قازاقستاننىڭ زەينەتاقىسىن راسىمدەگەن. قازىرگى ۋاقىتتا زاڭسىز الىنعان اقشا قاراجاتىن قايتارۋ ماسەلەسى قاراستىرىلىپ جاتىر.
– قازاقستان ازاماتتارىنىڭ قۇجاتتارىن پايدالانعانى ءۇشىن شەتەلدىكتەر قولدانىستاعى زاڭناما بويىنشا 100 اەك كولەمىندەگى ايىپپۇل تۇرىندە اكىمشىلىك جاۋاپكەرشىلىككە تارتىلادى. قازاقستان رەسپۋبليكاسى ازاماتى رەتىندە جەكە باسىن كۋالاندىراتىن قۇجاتتارى الىنىپ, ازاماتتىعىنان ايىرىلادى, – دەدى شقو پد كوشى-قون قىزمەتى باسقارماسىنىڭ باستىعى ەربول بەكپاەۆ.
بيىلعى جىل باسىنان بەرى شقو اۋماعىندا ءتارتىپ ساقشىلارى 60-تان استام قوس ازاماتتىعى بارلاردى انىقتادى. كوشى-قون قىزمەتىنىڭ وكىلدەرى قازاقستان رەسپۋبليكاسىنىڭ كونستيتۋتسياسىنا سايكەس, ەلىمىزدە قوس ازاماتتىققا جول بەرىلمەيتىندىگىن, زاڭ تالابىن قاتاڭ ساقتاۋ كەرەكتىگىن جۇرتشىلىققا مۇمكىندىگىنشە ەسكەرتىپ, ايتىپ جۇرگەندەرىمەن, ونى قۇلاقتارىنا ىلمەيتىندەر از ەمەستىگى انىق.
