جول كارتاسىنىڭ جوبالارى تالقىلاندى

وتىرىسقا دەپۋتاتتار، ساياسي كەڭەس بيۋ­رو­سىنىڭ جانە وڭىرلىك قوعامدىق كەڭەس مۇ­شەلەرى، وبلىستىق دەپارتامەنت، باسقارما باسشىلارى، قالا، اۋدان اكىمدەرى قاتىستى. بيۋرودا سايلاۋالدى باعدارلاماداعى ورىن­دال­ماۋ قاۋپى نەمەسە بەلگىلەنگەن مەرزىمنەن كە­­شىك­تىرىلىپ تاپسىرىلاتىن جوبالار تال­قىلاندى.

وبلىستىق ەكونوميكا جانە بيۋدجەتتىك جوس­پارلاۋ باسقارماسىنىڭ باسشىسى گۇلقا­سي­ما سۇيىنتاەۆانىڭ حابارلاۋىنشا، وڭىردە جىل باسىنان بەرى 488،1 مىڭ شارشى مەتر تۇرعىن ءۇي سالىنىپ، 26 427 جاڭا جۇمىس ورنى قۇرىلىپ، كوپتەگەن الەۋمەتتىك نىسان پاي­­دا­لانۋعا بەرىلدى. ونىڭ قاتارىندا 3 مەكتەپ، 4 بالاباقشا، 3 سپورت نىسانى، مە­دي­­تسينالىق پۋنكت پەن امبۋلاتوريا، اۋىل­دىق كلۋبتار بار. پاندەمياداعى قيىن­شى­لىق­تارعا قاراماستان قۇرىلىس ماتەريالدارىن ءوندىرۋ زاۋىتى، ءسۇت ءوندىرۋ جانە وڭدەۋ تسەحتارى، مال بورداقىلاۋ الاڭدارى مەن كوكونىس ساقتاۋ قويماسى مەن جىلىجاي ىسكە قوسىلدى. ماسەلەن، مۇعالجار اۋدانىندا گەمودياليز ورتالىعى، جيھاز تسەحى، سۇيىق سابىن ءوندىرۋ تسەحى، قۇرىلىس دۇكەندەرى، ءدارىحانالار سالىنىپ پايدالانۋعا بەرىلدى. شاعىن ءوندىرىس ورىندارىنىڭ اشىلۋى اۋداندا ورتا كاسىپكەرلەر قاتارىنىڭ كوبەيىپ، سالىق تۇسىمدەرىنىڭ جوعارىلاۋىنا جول اشتى.

جول كارتاسىنداعى كورسەتكىشتەردىڭ ورىن­دالۋىن Nur Otan پارتياسى وڭىرلىك في­ليالى جانىنداعى قوعامدىق كەڭەس مۇ­شە­لەرى دە تۇراقتى تۇردە باقىلاپ وتىر. بيىل وڭىرلىك كەڭەستەردىڭ 37 وتىرىسى جانە اۋماقتىق كەڭەستەردىڭ 288 وتىرىسى ءوتىپ، قابىلدانعان شەشىمدەر بويىنشا مەملەكەتتىك مەكەمەلەرگە 526 ۇسىنىس بەرىلدى. قو­عامدىق كەڭەس مۇشەلەرى، دەپۋتاتتار اۋدان­دارعا شىعىپ، «جول كارتاسى» اياسىندا جۇر­گىزىلىپ جاتقان نىساندار قۇرىلىسىنا موني­تورينگ جۇرگىزۋدە.

– حالىققا بەرگەن ۋادەمىزدى ساپالى ىسكە اسىرۋ قاتاڭ پارتيالىق باقىلاۋدا، – دەدى جيىندا Nur Otan پارتياسى وبلىستىق فيليا­لى توراعاسىنىڭ ءبىرىنشى ورىنباسارى ەربول داناعۇلوۆ.

 سايلاۋالدى باعدارلاماداعى اۋىلىشىلىك، اۋدانا­رالىق جول قۇرىلىسى، سۋارمالى شار­ۋا­­شىلىقتار قۇرۋعا بايلانىستى كەمشى­لىك­تەرگە جول بەرگەنى ءۇشىن وبلىستىق جولاۋ­شى­لار كولىگى جانە اۆتوموبيل جولدارى باسقارماسى باسشىسى ايبەك قايىرعا، وب­لىس­تىق ۆەتەريناريا باسقارماسىنىڭ باسشىسى قۇسايىن سارسەمبايعا، بايعانين اۋدانىنىڭ اكىمى قايرات وتاروۆقا پارتيالىق سوگىس جاريالاندى. وبلىس اكىمى وڭداسىن ورازالين ەندىگى جەردە وسىنداي قاتەلىكتەرگە جول بەرگەن مەملەكەتتىك قىزمەتشىلەرگە قاتاڭ تارتىپتىك جازا قولدانىلاتىنى ەسكەرتىلدى.

– پارتيانىڭ باس جوسپارى حالىققا قاجەتتى ناقتى جوبالاردان قۇرىلعان. سوندىقتان دا ءبىز ين­ديكاتورلاردى ۋاقىتىندا ساپالى ورىن­داۋ ارقىلى ەلدىڭ الەۋەتىن كوتەرۋگە، ءار­بىر تۇرعىننىڭ، ءاربىر وتباسىنىڭ تۇرمىس-تىر­شىلىگى مەن ءال-اۋقاتىنىڭ جاقسارۋىنا جۇ­مىستانۋىمىز قاجەت. نەگىزگى مىندەتىمىز – ساي­لاۋالدى ۋادەلەردى ورىنداۋ جانە سايلاۋ­شى­لاردىڭ سەنىمىن اقتاۋ، – دەپ جيىندى قورىتىندىلاعان وڭداسىن ورازالين بارلىق اۋدان، قالا اكىمدەرى مەن باسشىلارعا جول كار­تاسىنداعى جوبالارعا جاۋاپكەرشىلىكپەن قاراۋدى قاتاڭ تاپسىردى. اسىرەسە، الەۋمەتتىك ينفراقۇرىلىمدار قۇرىلىسىنا جاۋاپسىز قاراعان تۇلعالاردان قاتاڭ سۇراۋ بولادى.