مازمۇندى ءىس-شارانىڭ اشىلۋىنا مادەنيەت جانە سپورت ءمينيسترى اقتوتى رايىمقۇلوۆا قاتىسىپ, 2004 جىلدان بەرى ءداستۇرلى تۇردە ءوتىپ كەلە جاتقان ونەر بايگەسى ەلىمىزدىڭ مادەني ومىرىندە ايتۋلى وقيعاعا اينالعانىن اتاپ ءوتتى.
− بۇل حالىقارالىق بايقاۋدىڭ ومىرگە كەلۋىنە ونەر قايراتكەرى, ەرەكشە دارىن يەسى بيبىگۇل احمەتقىزىنىڭ ەڭبەگى وراسان زور. جىل ساناپ كونكۋرستىڭ اياسى كەڭەيىپ كەلەدى. ماسەلەن, بيىل بايقاۋعا ەلىمىزبەن قاتار رەسەي, وزبەكستان, ارمەنيا, قىرعىزستان, تاجىكستان سىندى ەلدەردەن كەلگەن 70-كە جۋىق ۆوكالشى قاتىسادى. وسىعان دەيىن بايقاۋدا توپ جارعان جەڭىمپازدار الەمنىڭ ۇلكەن ساحنالارىندا ونەر كورسەتىپ, مۋزىكاسۇيەر قاۋىمنىڭ ىستىق ىقىلاسىنا بولەندى, − دەدى مينيستر.
جان-جاقتان جيىلعان تالانتتى ۆوكالشىلاردىڭ ونەرىن قازاقستاننىڭ ەڭبەك سىڭىرگەن قايراتكەرى, روزا باعلانوۆا اتىنداعى «قازاقكونتسەرت» ۇيىمى مەن «استانا وپەرا» حالىقارالىق وپەرا اكادەمياسىنىڭ كوركەمدىك جەتەكشىسى تيمۋر ۋرمانچەەۆ, مادەنيەت جانە ونەر سالاسىنداعى ليتۆا ۇلتتىق سىيلىعىنىڭ لاۋرەاتى, ليتۆا مۋزىكالىق-تەاتر اكادەمياسىنىڭ پروفەسسورى يرەنا ميلكياۆيچيۋتە, فورو بوناپارتتاعى مۋزىكالىق اكادەميانىڭ پروفەسسورى, گ.دونيتسەتتي اتىنداعى اكادەميانىڭ كامەرالىق ءان ايتۋ ءبولىمىنىڭ مەڭگەرۋشىسى الەكساندر گۋسەۆ, رەسەيدىڭ ەڭبەك سىڭىرگەن ءارتىسى, سانكت-پەتەربۋرگ كونسەرۆاتورياسىنىڭ پروفەسسورى تامارا نوۆيچەنكو, پراگا مەملەكەتتىك وپەراسىنىڭ ءسوليسى دامير باسىروۆ, وزبەكستان رەسپۋبليكاسىنىڭ حالىق ءارتىسى, حالىقارالىق كونكۋرستاردىڭ لاۋرەاتى راميز ۋسمانوۆ سەكىلدى تانىمال تۇلعالار باعالايدى.
