ورازالى الەمىنەن سىر شەرتەتىن جيناق اقىن وقىعان ۋنيۆەرسيتەتتىڭ «ۇلاعات» باسپاسىنان باسىلىپ شىقتى. كىتاپتىڭ ءبىرىنشى, ەكىنشى تومىنا ورازدىڭ ايتىستارى مەن ولەڭدەرى, ءۇشىنشى تومعا اقىن تۋرالى ارناۋ ولەڭدەر, ەستەلىكتەر مەن عىلىمي-زەرتتەۋ ماقالالار ەنگەن. ۇلتتىق كىتاپحانادا تۋىندىنىڭ تانىستىرىلىمى ءوتىپ, تۇساۋى كەسىلدى. وقىرمانعا جول تارتقان كادەلى ەڭبەكتىڭ تۇساۋىن «ايتىس اقىندارى مەن جىرشى-تەرمەشىلەردىڭ حالىقارالىق وداعى» رقب باسقارما توراعاسى, اقىن ءجۇرسىن ەرمان, قازاق ۇلتتىق پەداگوگيكالىق ۋنيۆەرسيتەتىنىڭ پرورەكتورى ماقتاعالي بەكتەمەسوۆ, «بالدىرعان» جۋرنالىنىڭ باس رەداكتورى دۇيسەن ءمۇسىرالى, قازاقستان جازۋشىلار وداعى باسقارما توراعاسىنىڭ ورىنباسارى, اقىن باقىت بەدەلحان كەستى.
ءىس-شاراعا قاتىسقان شورابەك ايداروۆ, سەرىك قاليەۆ, احمەدجان وزبەكوۆ, باۋىرجان حاليوللا, رينات زايىتوۆ قاتارلى ايتىس اقىندارى ورازالى جايلى ەستەلىكتەر ايتىپ, اقىن شىعارمالارى كەيىنگى ۇرپاق ءۇشىن تاعىلىمدى مۇرا ەكەنىن تىلگە تيەك ەتتى. شارانى كۇمىس كومەي ءانشى نۇرجان جانپەيىسوۆ انمەن ارلەسە, اباي اتىنداعى قازۇپۋ ستۋدەنتى التىناي قاناپيا مەن بەكجان بازاربەك قىز بەن جىگىت ايتىسىنىڭ ادەمى ۇلگىسىن كورسەتتى. سونىمەن قاتار اتالعان كەشكە اباي اتىنداعى قازۇپۋ الەۋمەتتىك دامۋ جونىندەگى پرورەكتور شىڭعىس نۇرلان ۇلى, ورازدىڭ قىزى نۇرايشا, اقىننىڭ تۋىستارى مەن جاس ايتىسكەرلەر قاتىستى. كىتاپتىڭ تۇساۋكەسەرىن بەلگىلى ايتىسكەر, جۋرناليست باقىت جاعىپاروۆ جۇرگىزدى.
