قازىر فابريكانىڭ ءبىر قۇرىلتايشىسى بار. بۇل – «اتىراۋ» اكك» اق. توقىما فابريكاسىنىڭ اتالعان قۇرىلتايشىعا قارىزى 1,6 ملرد تەڭگەنى قۇراپتى. سول سەبەپتەن, فابريكانىڭ ەسەپشوتى بۇعاتتالىپ, جۇمىس توقتادى. زىرىلداپ جۇمىس ىستەپ تۇرعان قوندىرعىلاردى شاڭ باستى. ال بارلىق قىزمەتكەرى اقىسىز دەمالىستا ءجۇر.
– توقىما فابريكاسىنىڭ ءوندىرىسىن قالپىنا كەلتىرۋ ماسەلەسى ءبىرىنشى جىل كوتەرىلىپ وتىرعان جوق. قازىر ءوسىمپۇل مەن ايىپپۇل سانكتسيالارىن ەسەپتەۋدى توقتاتۋعا قول جەتكىزدىك. بىراق نەگىزگى قارىز وتەلۋى كەرەك. ويتكەنى بۇل – قايتارىلۋى ءتيىس قارجى, – دەيدى «اتىراۋ» اكك» اق-نىڭ دەپارتامەنت ديرەكتورى نۇرلان قاپپازوۆ.
ونىڭ ايتۋىنشا, بىلتىر بۇل فابريكاعا يتاليالىق ينۆەستورلار قىزىعۋشىلىق تانىتقان ەكەن. الايدا كوروناۆيرۋس ينفەكتسياسىنىڭ سالدارىنان ينۆەستوردان حابار-وشار بولماعان. ەندى توقىما فابريكاسىن جانداندىرۋعا Export Center Silk Way جشس ىنتا ءبىلدىردى. الداعى ۋاقىتتا سەرىكتەستەرمەن بىرگە Caspiy Lana Atyrau جشس-ءنىڭ قىزمەتىن قايتا قۇرىلىمداۋ ءۇشىن بىرقاتار ءىس-شارانى قولعا الۋ جوسپارى بار.
توقىراعان توقىما فابريكاسىن قايتا ء«تىرىلتۋدى» كوزدەگەن ەxport Center Silk Way جشس-ءنىڭ ديرەكتورى قۇرالاي قاناحينانىڭ ايتۋىنشا, بۇل – قازاقستاندىق ەكسپورتتاۋشىلاردى قولدايتىن, قىتايدا زاڭدى تۇلعالار مەن جەكە كاسىپكەرلەردىڭ مۇددەسىن بىلدىرۋگە باعىتتالعان بىرەگەي مامانداندىرىلعان كومپانيا. ال ەكسپورتتىق ورتالىق سەرىكتەستەرىنىڭ قاتارىندا Caspiy Lana Atyrau جشس بار. قىتايداعى B2C ينتەرنەت-دۇكەنىنىڭ ەكىنشى بازاسىندا قازاقستاندىق تاۋارلاردىڭ مۋلتيبرەندتى ونلاين-دۇكەنى ارقىلى ءونىم وتكىزۋ تۋرالى كەلىسىمشارتقا قول قويىلعان. JD.com. ونلاين-الاڭنىڭ نەگىزگى تالابى – ەكسپورتتالاتىن ءونىمدى بەلگىلەنگەن مەرزىمدە ءارى تولىق كولەمدە ۇزدىكسىز جەتكىزۋ.
– قازىر قازاقستان مەن قىتايداعى سەرىكتەستەردىڭ كومەگىمەن كاسىپورىندى ساۋىقتىرۋ ءۇشىن قارجى سالۋ, جوبالىق قۋاتىن قالپىنا كەلتىرۋ, ستراتەگيالىق تۇرعىدان دامىتۋ جونىندە ناقتى ءىس-شارالار ازىرلەندى. ءبىزدىڭ ەسەپتەۋىمىزگە سايكەس ءبىرىنشى ايدا جوندەۋ جۇمىستارىنا, شيكىزات ساتىپ الۋ مەن ءوندىرىستى ىسكە قوسۋعا شامامەن 42 ملن تەڭگە قاجەت. كاسىپورىننىڭ جابدىقتارى قالىپتى جاعدايدا, قىزمەتكەرلەرى جۇمىس ىستەۋگە دايىن, شيكىزاتتى ساتىپ الاتىن ورىندار بار. فابريكانىڭ ونىمدەرىنە قىتايدان, امىرلىكتەن, تۇركيادان الدىن الا تاپسىرىس ءتۇستى. ويتكەنى «اتامەكەن» ۇكپ كومەگىمەن Caspiy Lana Atyrau جشس قىتاي يمپورتتاۋشىلارىنىڭ تىزىلىمىنە كىردى. ەندىگى باستى ماسەلە – Caspiy Lana Atyrau جشس-ءنىڭ ەسەشوتىن اشۋ, – دەيدى قۇرالاي قاناحينا.
وسىعان بايلانىستى «اتىراۋ» اكك» اق-نىڭ وكىلى كاسىپورىندى قايتا قۇرىلىمداپ, قارجىلىق ساۋىقتىرۋ جۇمىسىن جۇرگىزۋ ءۇشىن ارنايى جوسپار ۇسىنۋى ءتيىس ەكەن. بۇدان سوڭ جوسپار جۇمىس توبىنىڭ قاراۋىنا جىبەرىلەدى. سول سەبەپتەن, «اتامەكەن» ۇكپ-نىڭ وڭىرلىك فيليالى بۇل ىسكە بىلەك سىبانا كىرىسۋدى كوزدەپ وتىر. ماقسات – توقىراعان توقىما فابريكاسىن قايتا ء«تىرىلتۋ».
اتىراۋ وبلىسى
