بيىلعى قۋاڭشىلىققا قاراماستان ماقتالى اۋدانداردىڭ شارۋالارى اعىن سۋدى ارتىعىمەن الدى. بىلتىردان بەرى العاش رەت وڭتۇستىك ءوڭىرىنىڭ شارۋالارى ەگىستىككە كەدەرگىسىز اعىن سۋ الا باستادى. ناتيجەسىندە, ماقتا تەرىمى رەكوردتىق كورسەتكىشكە جەتتى. بۇل جەتىستىكتەردى ديقاندار ەكى ەل اراسىنداعى ءوزارا ىنتىماقتاستىق بايلانىستاردىڭ نىعايا ءتۇسۋىنىڭ ناتيجەسى رەتىندە باعالاۋدا. تۇركىستان وبلىسىنا ارنايى كەلگەن وزبەكستان رەسپۋبليكاسىنىڭ توتەنشە جاعدايلار ءمينيسترى, پرەزيدەنت كەڭەسشىسى تۇرسىنحان قۇدايبەرگەنوۆ پەن سۋ شارۋاشىلىعى ءمينيسترى شاۆكات حامراەۆ باستاعان دەلەگاتسيا اۋىل شارۋاشىلىعى سالاسىنا سەرپىلىس اكەلگەن وزگەرىستەرگە كۋا بولىپ, ماقتالى اۋدانداردىڭ شارۋالارىمەن كەزدەستى. مارتەبەلى قوناقتار ەلىمىزدىڭ ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشوۆ جانە تۇركىستان وبلىسىنىڭ اكىمى ومىرزاق شوكەەۆپەن بىرگە ماقتاارالدىقتاردىڭ تىنىس-تىرشىلىگىمەن تانىستى. ارنايى دەلەگاتسيا «المات» شارۋا قوجالىعىنىڭ ماقتا تەرىم القابىندا بولدى. اعىن سۋدى بيىل ارتىعىمەن پايدالانعان شارۋالار مول ءونىم الۋعا نيەتتى. سونداي-اق وڭىردە ماقتا باعاسى وتكەن جىلمەن سالىستىرعاندا ەكى ەسە ءوستى. وبلىستا 18 ماقتا وڭدەۋ زاۋىتىنىڭ 200-دەن استام قابىلداۋ بەكەتى ارقىلى 1 توننا ءشيتتى ماقتا 300 مىڭ تەڭگەدەن قابىلدانۋدا. بۇگىندە جوسپارلانعان ەگىس كولەمىنىڭ 33 مىڭ گەكتارى تەرىلىپ, 70 مىڭ توننادان استام ءونىم جينالدى.
«بىلتىر وزبەكستاندىق تەحنيكانىڭ كومەگىمەن سەل باسقان ەگىستىك القابىنا ماقتاارالدىقتار ماقتا ءدانىن قايتا سەۋىپ الدى. كورشى اعايىندار تەحنيكادان بولەك, جانار-جاعارمايىن, سۇرىپتى ءشيتىن دە تەگىن بەرىپ وتىردى. سول كەزدە شىعىنعا ۇشىراعان شارۋالار ءۇشىن بۇل وتە ۇلكەن كومەك بولدى. كۇندىز-ءتۇنى تىنباي ەڭبەك ەتكەننىڭ ناتيجەسىندە بيىل ماقتا بىتىك شىقتى. باعا دا كوتەرىلدى. قازىر كيلوسىن 300-320 تەڭگەدەن ساتىپ جاتىرمىز. كورشى وزبەكستان ەلىمەن كەلىسىمگە كەلىپ, اعىن سۋدى ارتىعىمەن الدىق. وسىنىڭ بارلىعى كورشى ەلمەن ورناعان دوستىق قاتىناس ارقىلى جۇزەگە اسىرىلىپ جاتقانىن بىلەمىز. مەملەكەت قولداۋىمەن تىڭايتقىش پەن جانار-جاعارماي جەتكىلىكتى. ەل ريزا. ديقاندار تابىسىن ارتتىراتىن بولدى», دەيدى «باعدات» شارۋا قوجالىعىنىڭ باسشىسى داۋلەتباي جورىمبەتوۆ.
بيىل 110 مىڭ گەكتاردان 280 مىڭ توننا ءشيتتى ماقتا تەرۋ جوسپارلانعان. ماقتا تالشىعى ەۋروپاعا ەكسپورتتالادى. سونىمەن قاتار جيىن-تەرىن جۇمىستارىنا 43 مىڭ توننا جانار-جاعارماي بولىنگەن. ونىڭ باعاسى ليترىنە 172 تەڭگەدەن بوساتىلۋدا.
وزبەكستاننان كەلگەن دەلەگاتسيا, سونداي-اق مىرزاكەنت جاڭا شاعىن اۋدانىندا سالىنعان 1 200 ورىندىق مەكتەپ قۇرىلىسىمەن تانىستى. وندا ورناتىلعان زاماناۋي قوندىرعىلار مەن مەكتەپتە ەنگىزىلگەن جاڭا جوبانىڭ مۇمكىندىكتەرىن جوعارى باعالادى.
«ەل-جۇرتتىڭ اماندىعىن كورىپ, وسىنداعى جاقسى وزگەرىستەرگە قۋانىپ تۇرمىز. قيىندىقتى ەڭسەرىپ, بىرلىك پەن ەڭبەكتىڭ ناتيجەسىندە مىرزاكەنت زاماناۋي ورتالىققا اينالىپتى», دەدى وزبەكستان رەسپۋبليكاسىنىڭ توتەنشە جاعدايلار ءمينيسترى ت.حۋدايبەرگەنوۆ.
ءوز كەزەگىندە وبلىس اكىمى ءو.شوكەەۆ بىلتىر بولعان توتەنشە جاعداي باۋىرلاس ەكى ەل ءۇشىن دە وڭايعا سوقپاعانىن ايتىپ ءوتتى. «وزدەرىڭىزگە بەلگىلى, جاعدايدى ەستىپ, ماقتاارالدىقتاردىڭ تاعدىرىنا الاڭداعان ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ قولداۋىمەن, مەملەكەت باسشىسى قاسىم-جومارت توقاەۆتىڭ تىكەلەي باقىلاۋىمەن ماقتاارالعا مەملەكەتتىك دەڭگەيدە قولداۋ كورسەتىلدى. بىردە-ءبىر ادام قامقورلىقسىز قالمادى. بۇكىل ەل بولىپ كومەك قولىن سوزدى. تاسقىن سۋدىڭ زاردابىن جويۋعا كورشى وزبەكستان ەلىنەن كومەك كەلىپ, قويان-قولتىق جۇمىس ىستەدىك. باۋىرلاس وزبەك حالقىمەن جارقىن كەزەڭدەر مەن سىناق ساتتەردە دە بىرگەمىز. «بىرلىگى بەكەم ەل ءبارىن جەڭەدى» دەمەكشى, بۇل سىناق حالقىمىزدىڭ ءبىرتۇتاس ەلدىگىنىڭ ايقىن دالەلى بولدى. قيىن ساتتەر ارتتا قالىپ, ءار وتباسىنا تەك باقىتتى كۇندەر بۇيىرسىن», دەدى وبلىس اكىمى.
جاڭا مەكتەپكە جينالعان مىرزاشولدىكتەر تۇرعىنداردىڭ قيىن كەزدە جايلى تۇرمىس ىزدەپ, باسقا جاققا ۇدەرە كوشپەگەنىن قۋانا ايتتى. «قيىندىقتار ۇمىتىلىپ, تۋعان ولكەمىز بۇرىنعىدان دا گۇلدەنىپ كەلەدى. قانشاما جاڭا عيماراتتار, ەمدەۋ مەكەمەلەرى سالىندى. اينالا كوككە ورانىپ, اۋدانىمىز اجارلانا ءتۇستى. وزبەكستان حالقىمەن عاسىرلار بويى بىرگە ءوسىپ كەلەمىز. ول جاقتا اعايىن-تۋىس تۇرادى. ءبىر وزەننەن سۋ ءىشىپ, ءبىر اۋامەن تىنىستاعان تۋىس حالىقپىز. قيىندىقتا كومەك بەرىپ, قۋانىشىمىزدى دا ءبولىسىپ وتىر», دەيدى مىرزاكەنت اۋىلىنىڭ تۇرعىنى شاحزادا قۇربانباەۆا.
سونداي-اق وزبەكستاننان كەلگەن ارنايى دەلەگاتسيا جەتىساي قالاسىنداعى «قىدىر اتا» جەكەمەنشىك ەمحاناسىنىڭ جۇمىسىمەن تانىستى. زاماناۋي جابدىقتالعان مەديتسينالىق مەكەمەدە 120 ەمدەلۋشى ەم قابىلداي الادى. كلينيكا دارىگەرلەرى 100 شاقىرىم جەردە ورنالاسقان تاشكەنتتىك ارىپتەستەرىمەن تاجىريبە الماسىپ وتىرادى.
تۇركىستان وبلىسى
