Demo Day الاڭىندا ستارتاپتار تىڭ جوبالاردى تانىستىرىپ, ينۆەستورلارمەن كەزدەسۋ مۇمكىندىگىنە يە بولدى. تابىستى ۆەنچۋرلىك ينۆەستورلار, بيزنەس وكىلدەرى ستارتاپتار مەن IT كومپانيالارعا ينۆەستيتسيا تارتۋ تاجىريبەلەرىن ءبولىستى.
وسىنىڭ الدىنداعى ءتورت كەزەڭدە Astana Hub 100-دەن استام كاسىپكەردى, جاڭادان باستاعان ينۆەستورلار مەن كومپانيالار جەتەكشىلەرىن ينۆەستيتسيا سالۋ ىسىنە باۋلىدى. بيىل ءبىلىم كۋرسىنا الماتىدان 20 قاتىسۋشى ءۇشىن وفلاين جانە قالعان وڭىرلەر ءۇشىن ونلاين وقۋ قاراستىرىلعان. سونىمەن بىرگە VC School-عا قاتىسۋعا قازاقستان, وزبەكستان, قىرعىزستان, ازەربايجان, رەسەي, بەلارۋس, ۇلىبريتانيا, يندونەزيا جانە گونكونگ سياقتى ەلدەردەن 200-گە جۋىق ءوتىنىش كەلىپ تۇسكەن. الەمدە ۆەنچۋرلىق ينۆەستورلار, نەگىزىنەن ەر ادامدار بولسا, VC School تىڭداۋشىلارىنىڭ 25 پايىزىن نازىك جاندار قۇرادى. ولاردىڭ اراسىندا كاسىپكەرلەر, ءىرى ۇيىمداردىڭ مەنەدجەرلەرى, ينجەنەرلەر, تالداۋشىلار, زاڭگەرلەر, جەكە ستارتاپتاردىڭ فاۋندەرلەرى بار.
Astana Hub دامۋ جانە ەكسپورت جونىندەگى باسقارۋشى ديرەكتورى اركادي سەلەزنەۆ Astana Hub-تىڭ دامۋ ينس-
تيتۋتى ەكەندىگىن, ول ستارتاپتاردىڭ پايدا بولىپ, دامۋ مۇمكىندىگىنە يە بولۋلارى ءۇشىن رەسپۋبليكانىڭ ۆەنچۋرلىق جۇيەسىن قالىپتاستىرۋعا ىقپال ەتىپ جاتقانىن ايتتى.
بۇل ءىس-شارانىڭ ماقساتتى اۋديتورياسى – ستارتاپتار مەن ينۆەستورلار. ءبىرىنشىسى – Smart citi Almaty, وندا الماتىنىڭ تسيفرلاندىرۋ باسقارماسىنىڭ مۇددەسىنە ساي باعدارلاما جاسايتىن ستارتاپتارمەن, ەكىنشىسىندە جاڭادان باستاعان ۆەنچۋرلىق ينۆەستورلارمەن جۇمىس ىستەۋ كوزدەلگەن.
ستارتاپتار – جاڭا يننوۆاتسيالىق كومپانيالار ءھام بۇرىن جۇزەگە اسپاعان جوبالار. مۇنداي جوبالاردا, ارينە ينۆەستورلار تابىسقا كەنەلمەس بۇرىن تاۋەكەلگە دە بارادى. ۆەنچۋرلىق ينۆەستورلار ءدال وسىنداي تاۋەكەلشىل توپقا جاتادى. الايدا تاۋەكەلدەردى ازايتۋ ءۇشىن اقىل كەرەك. Astana Hub ينۆەستورلارعا ءتيىمدى جۇزەگە اسىرۋدىڭ وسىنداي مۇمكىندىكتەرىن ۇسىنىپ وتىر.
قازاقستان جانە تمد ەلدەرىنەن كەلگەن VC School ءبىلىم بەرۋ كۋرسىنىڭ تىڭداۋشىلارى جاقىن ارادا ءوز قارجىلارىن تەحنولوگيالىق جوبالارعا سالۋدىڭ تيىمدىلىگىن قاراستىردى. ءبارى دە – ءوز ءبىلىمىن, تاجىريبەسىن جانە قارجىسىن ستارتاپتارمەن بولىسۋگە دايىن كاسىپكەرلەر مەن ءوز ماشىعىن شىڭداعىسى كەلەتىن ينۆەستورلار. ولار يننوۆاتسيالىق ەكوجۇيەنىڭ ەرەكشەلىكتەرى, جوبالاردىڭ پايپلاينىن قالىپتاستىرۋ قاعيدالارى جانە ستارتاپتى ەگجەي-تەگجەيلى تالداۋدىڭ قىر-سىرىن مەڭگەرىپ, تمد-نىڭ ۇزدىك ينۆەستورلارىمەن تىكەلەي سويلەسۋ مۇمكىندىگىنە يە بولدى.
YellowRockets Group كومپانياسىنىڭ نەگىزىن قالاۋشى سەرگەي بوگدانوۆ, YellowRockets.vc ۆەنچۋرلىق قورىنىڭ باسقارۋشى سەرىكتەسى دميتري سۋتورمين جانە فري پورتفەلىنىڭ باسقارۋشىسى يليا كورولەۆ ۆەنچۋرلىق ينۆەستيتسيالار الەمىنىڭ ەرەكشەلىكتەرىن قامتي وتىرىپ, قاتىسۋشىلار ءۇشىن كەڭەيتىلگەن باعدارلاما ۇسىندى.
Astana Hub-پەن ىنتىماقتاستىق بارىسى جايىندا ايتىپ وتكەن سەرگەي بوگدانوۆ اكسەلەراتسيا باعدارلاماسىنا 3 جيىنتىق جاسالعانىن اتاپ ءوتىپ, ستارتاپتارمەن جۇمىس بارىسىنا توقتالدى.
دميتري سۋتورمين ءوز كەزەگىندە: «قازاقستاندا ۆەنچۋرلىك ينۆەستورلاردىڭ ەكوجۇيەسىن دامىتۋ مۇمكىندىگى جوعارى. بۇگىندە حالىقارالىق نارىققا شىعاتىن دامىعان ينفراقۇرىلىم, مىقتى ءبىلىم بەرۋ بازاسى ۆەنچۋرلىق ينۆەستورلاردىڭ جاڭا وتاندىق پۋلىن قۇرۋعا قولايلى», دەپ اتاپ ءوتتى.
VC School قاتىسۋشىسى, مەكتەپتەرگە ارنالعان OKOO جوباسىنىڭ نەگىزىن قالاۋشى دىنمۇحامەد ءجۇنىسوۆ ءوز باعدارلاماسىنىڭ ينفورماتيكا مۇعالىمدەرىنىڭ ءۇي جۇمىسىن تەكسەرۋىن اۆتوماتتاندىرىپ جەڭىلدەتۋگە ارنالعانىن ايتتى. سونىمەن بىرگە ول ساباقتىڭ ينتەراكتيۆتى, قىزىقتى بولۋىن قامتاماسىز ەتەدى. جوباسى ەكى جىلدان بەرى قولدانىستا. نۇر-سۇلتان, ورال, اقتاۋدا پايدالانۋشىلارى بار. بۇل جوباعا الداعى ۋاقىتتا الماتىداعى مەكتەپتەر دە قوسىلۋى مۇمكىن.
وقىتۋشى بولىپ جۇمىس ىستەگەن دىنمۇحامەد ءجۇنىسوۆ مۇعالىمدەردىڭ جۇمىسىن جەڭىلدەتەتىن باعدارلامالار قاجەت ەكەنىن نارىق ءوزى تالاپ ەتىپ وتىرعاندىعىن ايتتى. ەرىكتى رەتىندە فاكۋلتاتيۆتىك ساباقتار جۇرگىزگەن ول مەكتەپتەردە وزەكتى ماسەلەلەردىڭ بار ەكەندىگىنە كوز جەتكىزگەن. ال ولاردى شەشۋدى تەحنولوگيالاردىڭ كومەگىمەن عانا جىلدامداتۋعا بولادى. الايدا ءونىمدى دامىتۋ ءۇشىن ينۆەستيتسيا كەرەك. قازىرگى كەزدە جوبا جەتىلدىرىلىپ, ون ادام جۇمىس ىستەۋدە. ولاردىڭ كوپشىلىگى شەتەلدىڭ كومپانيالارىندا تاجىريبەدەن وتكەن.
دىنمۇحامەد ءجۇنىسوۆ Monolife كومپانياسىندا باعدارلاماشى بولىپ ىستەگەن. سونىمەن بىرگە جوبانى ازىرلەۋشىلەردىڭ Facebook, Apple كومپانيالارىندا جۇمىس تاجىريبەسى بار. باستاپقىدا قاتەلىكتەردىڭ بولعانىن ايتىپ وتكەن مامان جاستارمەن ءوز تاجىريبەسىن بولىسۋگە دايىن. ايتۋىنشا, ەلىمىزدە Iت سالاسىن دامىتۋ ءۇشىن مەكتەپ جاسىنان باستاپ بالالاردىڭ ءتيىستى ءبىلىمىن ارتتىرۋ كەرەك.
VC School مەكتەبى اياسىندا قۇقىقتىق ماسەلەلەر مەن مامىلەلەردى قۇرىلىمداۋدىڭ تانىمال فورماتتارى ءسوز بولدى. قاتىسۋشىلار «پورتفەلدى باسقارۋ» سياقتى ۇعىمدى زەرتتەۋمەن بىرگە, ۆەنچۋرلىق نارىققا قاتىسۋشىلاردىڭ ستراتەگيالارىمەن تانىستى.
