وعان قىلقالام شەبەرىنىڭ سەگىز جىلدان بەرى جيناعان 27 ۇزدىك جۇمىسى قويىلدى. جالپى, اۆتور شىعارماشىلىعىندا تۇركى مادەنيەتى مەن ۇلتتىق ءداستۇر جانە ايەل الەمى ايرىقشا ورىن الادى. سوندىقتان سۋرەتشى كورمە تاقىرىبىن ۇرپاق جالعاستىعىن جەبەيتىن پەرىشتەگە ارناپ, «ۇماي بەسىك جىرى» دەپ اتاپتى.
مادەني شارانىڭ اشىلۋىندا ەلباسى كىتاپحاناسىنىڭ ديرەكتورى باقىتجان تەمىربولات كورمە يەسىنىڭ شىعارماشىلىعى گرافيكا, كەسكىندەمە, يلليۋستراتسيا, ساندىق ونەر سەكىلدى ءتۇرلى جانردى قامتيتىندىعىن ايتا كەلىپ: «سۋرەتشى الەمىنىڭ قاينار كوزى – انا تاقىرىبى. سول سەبەپتى دە ونىڭ سۋرەتتەرىندە بالالار, ايەلدەر, تابيعات بەينەلەرى باسىم. وسى كورمەدەگى كارتينالاردان ۇماي جەبەۋشىسىنىڭ شۋاعىن سەزىنۋگە بولادى», دەسە, بەلگىلى سۋرەتشى, ديزاينەر, يلليۋستراتور, «قازاقستاننىڭ 100 جاڭا ەسىمى» جوباسىنىڭ جەڭىمپازى ايگەرىم كارىباەۆا: «دينارامەن 2005 جىلدان بەرى تانىسپىن. ول – الەمگە ەرەكشە كوزبەن قارايتىن سۋرەتشى. بۇل سۋرەتتەردى ول ۇيىندە سالدى, سول جەردەن كورمەگە اكەلدى. سوندىقتان ولاردى شاڭىراق شۋاعىنا شومىلعان دۇنيەلەر دەپ ايتۋعا بولادى. ونىڭ ەڭبەكتەرىنەن ادامي قۇندىلىقتاردى كورەسىز», دەپ ارىپتەسىنىڭ ونەرىن جوعارى باعالادى.
دينارا قادىروۆا −الماتى قالاسىندا ومىرگە كەلىپ, ت.جۇرگەنوۆ اتىنداعى قازاق ۇلتتىق ونەر اكادەمياسىندا ءبىلىم العان. ونىڭ بىرقاتار جۇمىسى يۋنەسكو-نىڭ جيناقتارىندا جاريالانعان. دارىندى ستۋدەنت رەتىندە قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆپەن جۇزدەسكەن. 2012 جىلى جاس سۋرەتشى ورىنداعان قالالىق كافەنىڭ ديزاين جوباسى Time out سىيلىعىنىڭ «جىل جاڭالىعى» اتالىمىن يەلەنگەن. سونىمەن بىرگە ونىڭ ۇلى جىبەك جولى قالالارىنا ارنالعان گرافيكالىق جۇمىستارىنىڭ ديپلومدىق سەرياسى تۇڭعىش پرەزيدەنت كۇنىنە ارنالعان «استانا-2013 ديزاين اپتالىعى» فەستيۆالىندە قويىلعان.
