شاراعا 70-تەن استام ادام, 30-عا جۋىق قازاقستان وكىلى, سونىڭ ىشىندە ۇەۇ كوشباسشىلارى قاتىستى. شاقىرىلعانداردىڭ ىشىندە ەو ادام قۇقىقتارى جونىندەگى ارنايى وكىلى ەيمون گيلمور, ەو-نىڭ ورتالىق ازيا بويىنشا ارنايى وكىلى تەرحي حاكالا, قر پرەزيدەنتىنىڭ حالىقارالىق ىنتىماقتاستىق جونىندەگى ارناۋلى وكىلى ەرجان قازىحان, قر ادام قۇقىقتارى جونىندەگى ۋاكىلى ەلۆيرا ءازىموۆا, قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى ءلاززات رامازانوۆا جانە شەت مەملەكەت وكىلدەرى بار.
قر پرەزيدەنتىنىڭ حالىقارالىق ىنتىماقتاستىق جونىندەگى ارناۋلى وكىلى ە.قازىحان ازاماتتىق قوعام, ادام قۇقىقتارىن قورعاۋ, حالىقارالىق ىنتىماقتاستىقتى دامىتۋ سالاسىندا ەۋروپالىق تاراپپەن ءوزارا ءىس-قيمىلدىڭ ءتۇرلى جولىن قاراستىرۋعا دايىن بولۋ بولىگىندە رەفورما جۇرگىزۋ تۋرالى اتاپ ءوتتى. سونىمەن قاتار وڭىرلىك ىنتىماقتاستىق قازاقستاننىڭ باستى نازارىندا ەكەنى ايتىلدى.
«فورۋم كوروناۆيرۋستىڭ جاھاندىق جاعىمسىز سالدارىمەن كۇرەس جانە ازاماتتىق سەكتوردى قوسا العاندا, بارلىق مۇددەلى تاراپتىڭ كۇش-جىگەرىن بىرىكتىرۋ اياسىندا ەرەكشە وزەكتىلىككە يە بولدى.
قازاقستاندا ءىس-شارانى وتكىزۋدىڭ ماڭىزدىلىعى ازاماتتىق قوعامدى دامىتۋ جانە ادام قۇقىقتارىن قورعاۋ سالاسىندا بەلسەندى جۇمىس جۇرگىزۋگە نەگىزدەلگەن», دەپ جازادى اقدم ءباسپاسوز قىزمەتى.
شارانىڭ كۇن ءتارتىبى قازاقستاننىڭ ساياسي دامۋىنىڭ 30 جىلدىق جەتىستىكتەرىن اتاپ وتۋگە, ورتالىق ازياداعى ىنتىماقتاستىققا دەگەن كوزقاراستى جانە اۋعانستانداعى قۇبىلمالى جاعدايدى انىقتاۋعا مۇمكىندىك بەردى.
ءۇش تاقىرىپتىق سەسسيا الەۋمەتتىك ينتەگراتسيا ارقىلى تۇراقتىلىقتى ارتتىرۋ, جاسىل وركەندەۋ – ايەلدەر مەن جاستاردىڭ ءال-اۋقاتىن ارتتىرۋ جانە وڭىرلىك ىنتىماقتاستىق-ەكولوگيالىق پروبلەمالاردى بىرلەسىپ شەشۋ ماسەلەلەرىنە ارنالدى.
بۇل ورتالىق ازيا ارەناسىنداعى ءۇشىنشى فورۋم. وتكەن جىلى شارا ەپيدەميولوگيالىق جاعدايعا بايلانىستى ونلاين فورماتتا ءوتتى.
ۇيىمداستىرۋشىلار فورۋمنىڭ ومىرشەڭدىگىنە ۇلكەن ءۇمىت ارتادى.
ەو-نىڭ ورتالىق ازيا بويىنشا ستراتەگياسىنا سايكەس, ازاماتتىق قوعام تۇراقتىلىق پەن وركەندەۋدى نىعايتۋدا, سونداي-اق وڭىرلىك ىنتىماقتاستىقتى ىلگەرىلەتۋدە ماڭىزدى ءرول اتقارۋعا ءتيىس.
